Genesis
6 Tucui allpaibi runaguna ashca tucusha ushigunata charicpi, 2 Sirtu Diospa churiguna runa huarmiguna gustu ashcata ricungahua callarinaura. Chasnami, paiguna munashcahuan cazarai callarinaura. 3 Chita ricusha Jehova nira: “Runagunata mana unaigama ahuantashachu, aichalla manaun. Chimanda, 120 huatallata causangauna”. 4 Chi timpuibi, nefilim nishca runaguna allpai causaunaura. Chai timpuibihuas, sirtu Diospa churiguna runa huarmigunahuan puñuc anaura, huahuagunatas charinaura. Chi huahuaguna, manzhanaita ursayuc ricsishca runaguna tucunaura. 5 Chasnami, Jehovaga malu, irus runaguna cai allpai mirashcata ricura. Astahuanbas, paiguna shungüibi tiac tucui yuyaiguna tucui timpuibi mana ali ashcata ricura. 6 Chiraicumi, Jehovaga cai allpaibi runagunata rashcamanda ashcata llaquirira, paihua shungüibi yapa nanarishca sintirira. 7 Chimanda, Jehova nira: “Runagunata allpamanda pichacta tucuchingarauni. Paigunata, animalgunatahuas tucuchisha, allpaibi puric animalgunata, pahuac animalgunatas tucushisha. Paigunata tarabashcamanda llaquirini”. 8 Chasna acpihuas, Jehovaga Noeta alita ricura. 9 Caiga Noemanda cuintashca man. Noega alita rac runa mara. Paihua timpuibi causac runagunamanda, mana culpayuc chara. Paiga sirtu Dioshuan puric ara. 10 Timpu pasashcai, Noe quimsa churigunata charira: Sem, Cam y Jafet. 11 Chasnami, sirtu Diosca cai allpa mana tunu acta ricura, runaguna piñanacushalla causanaura. 12 Chasna man, Dios cai allpama ricusha, mana tunu ashcata ricura. Cai allpaibi causac runaguna irus causaita charinaura. 13 Chasna asha Dios Noeta nira: “Tucui cai allpai causaccunata tucuchingarauni. Allpaga runagunamandami turmintu maun. Chimanda, tucui cai allpai tiaccunata pichacta tucuchingarauni. 14 Cambaraicu canua caspi ruyamanda shuc arcata rai. Chi arca ucuibi cuartugunata rai, ucuma canzhamahuas brea pungarahuan armachi. 15 Casna rai: 134 metros tupu sunima, 22 metros anzhuma, 13 metros ahuama midina an. 16 Quimsa pisota charina an: shuc, ishcai, quimsata. Luz yaicungahua ultimo pisoibi shuc ventanata rai. Arcama yaicungahua shuc partima punguta charina man. 17 Ñucami manzhanaita atun tamiata cai allpata tapasha tucui causaccunata tucuchingahua apamusha. Allpaibi tucui tiacmi huañunga. 18 Ñuca rimashcata pactachina mangui. Can camba churigunahuan, camba huarmihuan, camba cachungunahuanbas arcaibi yaicuna mangui. 19 Chasnallata, caran animalgunamanda ishcaita arcaibi yaicuchina mangui, shuc carita shuc huarmita, causasha catinauchun. 20 Cari huarmi caran tunu pahuac animalgunamanda ishcai, caran tunu huiba animalgunamanda ishcai, caran tunu llucasha puric animalgunamanda ishcai. Paiguna can aushcama ringauna, paiguna causasha catinauchun arcama yaicungauna. 21 Canga tucui sami micunagunata apana angui, cambas animalgunas micungahua”. 22 Chasnami Noega, tucui Jehova mandashcata pactachira. Pai mandashca shina rara.