Genesis
7 Chi huasha, Jehova Noeta nira: “Can, canba tucui aillundi arcaibi yaicui. Malu runaguna chaupibi causashahuas, can alita rac ashcata ricushcani. 2 Caran limpio animalgunamanda canzhista apana angui: cari, huarmita. Randi, caran mana limpio animalgunamanda ishcaita apana angui: cari, huarmita. 3 Cieloibi pahuac animalgunamanda canzhista apana angui, cari huarmita, paiguna mirai allpaibi quishpirichun. 4 Canzhis punzhallaibi tamiachingarauni, chuscu chunga punzhata, chuscu chunga tutata. Cai allpaibi tucui ñuca rashca causaccunata tucuchingarauni”. 5 Chasnami Noega, tucui Jehova mandashcata pactachira. 6 Noega sucta patsac huatata charira, allpaibi manzhanaita atun tamia shamushcaibi. 7 Manzhanaita atun tamia chara mana callarigllaita, Noega paiba churigunahuan, paiba huarmihuan, paiba cachugunahuanbas arcaibi yaicura. 8 Limpio animalguna, mana limpio animalguna, pahuac animalguna, allpaibi tucui cuyuric animalgunahuas, 9 Noe aushcata rinaura. Arcaibi ishcai ishcai yaicunaura, cari huarmi, Dios Noeta mandashca shina. 10 Canzhis punzhaguna huasha, manzhanaita atun tamia callarira. 11 Noe sucta patsac huatata charishcaibi, ishcai quillaibi chunga canzhis punzhaibi, chi punzhami allpaibi tiac tucui yacuguna tucllanaura, ciluibi tiac tucui yacugunahuas urmanaura. 12 Chasnami, allpaibi manacailla sinzhita tamiara, chuscu chunga punzhata, chuscu chunga tutata. 13 Chi punzhallatami, Noega arcaibi yaicura, paihua quimsa churigunandi: Sem, Cam y Jafet, paihua huarmi, paihua cachungunas. 14 Paigunaga tucui sami animalgunandi yaicunaura, tucui sami huiba animalgunahuan, allpaibi tucui sami llucac animalgunahuan, tucui sami huamburic animalgunahuan, tucui pahuac animalgunahuan, tucui rigrayuc animalgunahuanbas. 15 Tucui sami causaita charic animalguna, Noehuacta rinaura, arcaibi ishcai ishcai yaicunaura. 16 Chasnami, tucui sami animalguna huarmi cari yaicunaura, Dios Noeta mandashca shina. Noe arcama yaicushca huasha, Jehova punguta tapara. 17 Manzhanaita atun tamiami, chuscu chunga punzhata tamiasha catira. Yacu undashami arcata hambuchingahua callarira, allpamanda ahuama pulan huambuchira. 18 Yacu undasha mirashami, allpata tapara. Pero arca pulan huamburira. 19 Yacuga manzhanaita undashami, allpata tucui atun urcugunatas tapara. 20 Urcuguna pundamanda, 6 metroguna yalita ahuama undasha catara. 21 Chasnami, allpaibi tucui causaita chariccuna huañunaura. Pahuac animalguna, huiba animalguna, sacha animalguna, allpai miranacusha tiac animalguna, chasnallata tucui runagunahuas huañunaura. 22 Chaquishca allpaibi tucui tiaccuna, samaita chariccunas huañunaura. 23 Allpaibi tucui causaita chariccunata, Dios pichacta tucuchira. Runaguna, animalguna, llucac animalguna, ahuaibi pahuac animalgunahuas huañunaura. Tucuiguna pichacta chingarinaura. Noehuan arcaibi auccunalla quishpirinaura. 24 Yacuga 150 punzhagunata allpata catasha catira.