Esdras
3 Canzhis quilla pactamushcai, israelitaguna ña paiguna llactagunai aushcaibi, huingunami shuc rana munashcallahuan Jerusalenbi tandarinaura. 2 Jehozadacpa churi Jesua, paiba compañero saserdotegunas, chasnallata Sealtielba churi Zorobabel, paiba huauquigunas, Israelmanda Diosraicu animalta rupachingahua altarta shayachinaura, sirtu Diosta sirvic Moisespa leybi quillcasha churashca shina. 3 Paiguna mayambi causac runagunata manzhashahuas, chi altarta, pai aushca pistullaita shayachinaura. Chi huasha, chi altarbi Jehovaraicu rupachishca animalgunata cui callarinaura: tutamanda, chishibi, animalgunata rupachic anaura. 4 Leybi quillcashca shina, pangamanda ichilla ranchuta rasha istangahua callarinaura, caran punzha rupachina ac animalgunata rupachic anaura. 5 Chi huasha, animalgunata caran uras rupachisha catinaura, mushuc quillamanda rupachina animalgunata, Jehovaraicu caran santo istagunamandas animalgunata rupachinaura, maican runa Jehovata shungumanda cuna munashcatas cuc anaura. 6 Canzhis quillamanda punda punzhaibi, Jehovaraicu animalgunata rupachic callarinaura, Jehovahua templo istandiguna mana shayachishca acpihuas. 10 Tarabac runaguna Jehovahua templo istandigunata shayachishcaibi, sacerdotegunaga sumacta churarisha curmitagunata apanaura, Asafpa churi levitagunas, cimbalogunata apanaura. Jehovata alabangahua shayarinaura, rey David mandashca shina. 11 Jehovata pagrachusha alabangahua callarinaura. Turnarisha cantanaura: “Pai ali shungu ashcamanda, Israelta llaquina huiñairaicu manga”. Chi huasha, Jehovahua huasi istandigunata churashca ashcamanda, huin runaguna sinzhita caparisha Jehovata alabangahua callarinaura. 12 Ashca sacerdoteguna, levitaguna, caran ailluta cuirac cariguna, ñaupa huasita ricuc rucuyashca runagunaga, cai huasi istandigunata shayachiushcata ricusha, huacasha caparinaura. Shuccuna randiga cushiyashami sinzhita caparinaura. 13 Huacasha capariushca, cushiyasha capariushcatas mana musiaibac chara. Runaguna sinzhita caparishcaga caruibi uyarira.