Iobu

21 KUA tuatua mairā Iobu, na ko maira,

2 Akarongo meitaki mai ana kotou i taku nei tuatua, e ei akapumaana anga teia na kotou.

3 Ka akakoromaki mai kotou iaku kia karanga atu au; e kia oti taua tuatua naku nei, ka taitoito mai ei.

4 Kareka au nei, ko te tangata ainei taku e tuatua nei? naringa ko te reira, eaa ka kore ei i potopoto taku aʼo!

5 E akara mai kotou iaku, ka va atu ei, ka tuku ei te rima ki runga i te vaa.

6 Te rikarika nei au i te maara ua anga atu, e kua rokoia taku kiko nei e te rurutakina.

7 Eaa te mea i oraʼi te aronga kino nei, i ruaine ei, e i maataʼi i te mana?

8 Kua akatinamouia to ratou uanga ki mua i to ratou aroaro, ma ratou katoa, e ta ratou au tamariki ki mua i o ratou mata.

9 Te vai au ua ra to ratou au are kare e mataku anga, kare oki te pāpā a te Atua i runga ia ratou.

10 Te nui nei ta te puakatoro toa na ratou, kare e kore; e te anau nei ta ratou puakatoro ua, e kare tana punua e maemo.

11 Te tuku nei ratou i ta ratou au tamariki mei te anana, e te ura nei ta ratou au tamariki.

12 Te rutu nei ratou i te paʼu e te kinura, e te rekareka nei ratou i te tangi koê.

13 Te akaope nei ratou i to ratou puke rā i te meitaki, e mei te kamo anga mata nei, riro atura ki raro i te vaarua.

14 E kua tuatua ratou ki te Atua, Kia atea ke atu ia matou nei; kare oki matou i inangaro i te kite i toou ra au arataa:

15 Eaa te Mana katoatoa, ka tavini atu ei tatou iaia? eaa oki ta tatou puapinga e rauka, kia pure atu tatou iaia?

16 I na, kare tei to ratou uaorai rima to ratou meitaki i te vairanga: ei te atea ke atu te tuatua a te aronga kino iaku nei.

17 Kua putuputu te lamepa o te aronga kino i te tamate angaia, e to ratou mate i te tae anga mai ki runga ia ratou, ei tona riri e tuaʼi aia i te au mate.

18 Kua tu a ngangaere ratou ki mua i te matangi ra, e mei te ota i apai keia e te uriia ra.

19 Te vaio nei te Atua i tana ara no tana ra au tamariki: te akautunga maira, te Atua iaia, tena aia ka kite.

20 Ka kite tona uaorai mata i tona mate, e ka inu aia i te riri o te Mana katoatoa.

21 Eaa oki aia ka rekarekaʼi i tona ngutuare i muri ake iaia, tei akaopeia tona au marama?

22 Naai e apii atu i te Atua i te kite? tei akatau maira i te utunga i te aronga teitei.

23 Te mate nei ra tetai; e kua noo marie te maroiroi, kare rava e mamae, kare oki e kino.

24 Kua ki tana au bakete ki te u puakatoro, e te maru nei tona au ivi i te matu.

25 E te mate nei ra tetai ma te ngakau mamae maata, e kare i topa meitaki tana kai.

26 Okotai rai o ratou moe anga ki raro i te one-pueu, e ka tapokiia ratou e te toke.

27 I na, kua kite au i to kotou manako, e te patoi ta kotou e kimi ei mate noku nei.

28 Te tuatua nei oki kotou, Teiea te are o te ariki kino? e teiea te puakapa nooanga o te aronga kino?

29 Kare ainei kotou i ui i te aronga i aere na te ara? e kare ainei kotou i kite i ta ratou au akairo e,

30 Te taporoporoia nei te aronga kino no te rā e mate ei ra? e i te rā tutaki anga ra ka aratakiia ratou ki vao ra?

31 Naai ra e akakite i tona aerenga ki mua i tona mata? e naai e tutaki atu iaia i tana i rave ra?

32 E apaiia atura aia ki te vaarua, e ka tapapaia tona menema.

33 Nga vaanga one o te o ra te ka maru i runga iaia, e e aruia aia e te tangata katoa, mei tei na mua iaia kare e pou kia tatau.

34 Eaa oki au e pumaanaʼi i tenana tuatua puapinga kore, te vai ra oki te pikikaa i ta kotou tuatua?