Iobu

22 KUA karanga aturā Eliphaza ngati Temana, na ko atura,

2 E riro ainei ta te tangata nei ei puapinga i te Atua, mei tei pakari e puapinga iaia uaorai?

3 Te pereperekavana nei ainei te Mana katoatoa i taau ra tuatua-tika? e puapinga ainei tana, ko koe i akatika oru ua i toou ra au arataa?

4 No te mataku ainei ia koe e māro mai ei aia ia koe? e kapiti katoa ainei aia ia koe i te akavaanga?

5 Kare ainei toou i te kino maata? e taau ra au ara kare e ope kia tatau.

6 Kua rave puapinga kore ua koe i te tutaki i to taeake, e kua tatara koe i te kakau o te aronga putaua.

7 Kare koe i akainu i tei kaki ra ki te manga vai, e kare koe i pa i te kai na tei pongi.

8 Kareka te tangata mana ra, tei iaia te enua; e kua noo te tangata taoiau i reira.

9 Kua akaoki puapinga kore ua koe i te au vaine takaua, e kua aatiia e koe nga rima o te aronga matiroeroe.

10 E tenana kua akapiniia koe e te ereere, e kua tamanamanataia koe e te mataku, kare i roaia;

11 E te poiri, kare e utoa ia koe; ngaromia iora koe e te vai e manganui.

12 Kare ainei tei te au rangi teitei te Atua? ka akara ana oki i te teitei o te au etu nunui!

13 E te tuatua maira koe, Eaa te Atua e kite ei! e tika ainei iaia kia akava na roto i te tumurangi poiri?

14 Te vaîia ra aia e te tumurangi patapatatue, e kare aia e kite mai; e te aaere ra aia na rungao i te tua o te rangi ra.

15 Kua akairo ainei koe i te arataa taito, tei takaiia e te au tangata kikino?

16 Ko tei tipu keia kare i tae ki te tuatau, kua ninaia to ratou tumu e te vai kava:

17 Ko tei karanga ki te Atua, Kia atea ke atu ia matou nei: e eaa ta te Mana katoatoa ravenga ia ratou?

18 Kua akaki ra aia i to ratou au are ki te meitaki: ei te atea ke atura ïa te tuatua a te aronga kino iaku nei.

19 Kua akara te aronga tuatua-tika, e kua rekareka: e kata oki te aronga ara kore ia ratou.

20 Kua tipu ke ravaia to matou au enemi, e kua pou to ratou apinga nui i te ai.

21 Ka akamātau ana koe iaia i tenana, ka noo ei ma te au: e rokoia mai koe e te meitaki i reira.

22 E āriki koe i te ture no roto i tona vaa, ko taku ïa tuatua ia koe, e e vaio marie i tana tuatua i roto i to ngakau na.

23 Kia oki akaou koe ki te Mana katoatoa, e patuia koe, ka tuku ke atu koe i te tuatua kino e kia atea ke atu i toou ra au puakapa.

24 Ka tangaakaputu koe i te auro mei te one-pueu i reira, e te auro Ophira mei te toka kauvai ra.

25 E riro oki te Mana katoatoa ei auro naau i reira, e mei te ario katoa e manganui naau.

26 E rekareka oki koe i te Mana katoatoa i reira, e nānā oki to mata ki te Atua ra.

27 Ka pure koe kiaia, e ka akarongo maira aia ia koe, e ka apai atu koe i taau i tia ra.

28 Ka akakoro koe i tetai mea, e ka akatinamouia te reira naau: e e kakā mai te mārama ki runga i toou ra au arataa.

29 Kia akaingaia te tangata ki raro, naau e tuatua e, Te vai nei te teitei; e te tangata akaaka ra, nana ïa e akaora.

30 Ka ora oki te tangata ara iaia; e na te viivii kore o to rima ra i akaoraiaʼi aia.