Salamo

38 E IEHOVA, auraka koe e akamura mai iaku i toou riri, auraka e pāpā mai iaku ma to riri maata ra.

2 Kua mou ra oki to au kakao i roto iaku, e kua teimaa roa to rima i runga iaku.

3 Kare e ngai paruparu kore i toku nei kiko i te riri noou ra; kare e akamaruanga i toku nei au ivi i taku nei ara.

4 Kua na runga taku nei au ara i toku mimiti: mei te apainga teimaa kare e maranga iaku nei.

5 Kua aunga kino toku au puta, e kua pe, no toku nei manako kore.

6 Kua mingi rava au ki raro, kua tumatetenga roaia au: te aere ua nei au ma te aue e po ua atu te rā.

7 Kua pini toku taukupu i te veravera, e kare e ngai paruparu kore i toku nei kopapa.

8 Kua apikepike au, kua paruparu roa au; te kakaoa ua nei au i te ngarepurepu anga o toku ngakau.

9 E te Atu e, tena toku anoano tei mua anake ïa ia koe; kare oki toku nei ngengeti anga i ngaro ia koe.

10 Kua potopoto toku aʼo, kua kore toku maroiroi: e te mārama i vai i toku mata nei, kare ua.

11 Toku au oa e tei akaperepereia e au, kua akaatea ke te turanga i toku maki nei: e te au tangata tupu nei, tei te atea ke ïa te turanga.

12 E te aronga e kimi mai iaku nei kia mate, te tuku nei te ereere iaku; ko tei kimi mai iaku kia kino ra, te tuatua ïa i te tuatua kikino, te kimi ra i te pikikaa e po ua atu te rā.

13 Kua riro ra au mei te turi kare i akarongo; e mei te murare kare i ngae te vaa.

14 Kua riro au mei te tangata kare e akarongo, e kare e patoianga o roto i tona vaa.

15 Ko koe oki, e Iehova, taku e irinaki nei; naau e tuatua mai iaku, e taku Atu, e taku Atua.

16 I pera rai au, ko te rekareka aea ratou iaku, ko te akatietie aea ratou iaku me paeke toku vaevae;

17 Kua vaitata oki au i te turori, e te vai tamou nei toku mii ki mua iaku nei.

18 E aaki atu rai au i taku nei ara, e e aue rai au i toku nei kino.

19 Te maroiroi nei rai toku nei au enemi, te ririnui nei; e te aronga i makitakita puapinga kore ua mai iaku nei, kua maata roa ïa.

20 Te tutaki maira ratou i te kino no te meitaki; enemi ratou noku, ko au i aru i te mea meitaki ra.

21 Auraka koe e akaruke iaku, e taku Atua, e Iehova; auraka roa koe kia mamao ke atu iaku:

22 Kia ngakoikoi mai koe, e taku Atu, e taku ora, i te tauturu iaku.