Salamo

39 I TUATUA ana au e, E akono rai au i toku ra au aerenga, kia kore toku arero e ara: e vaoo rai au i te tavaa i toku nei vaa, koi vai ake te tangata kino ki mua iaku nei.

2 Te muteki rava ra au, kare akerai i tuatua i te mea meitaki, e kua taorioriia toku mamae.

3 Maana akera toku ngakau i roto iaku, e te akamaara ua ra au, kua ka akera te ai: e kua tuatua iora toku arero, na ko akera,

4 E akakite mai koe, e Iehova, i toku nei openga, e kua peea te rainga o toku nei puke rā, kia kite au nei i toku paruparu.

5 I na! kua akariroia e koe toku nei puke rā ei rima okotai! e toku nei ora anga mei te puapinga kore ïa i mua ia koe ra! koia tika, te tangata ravarai nei i te meitaki anga nei rai, e puapinga kore anake ïa. Sela.

6 Koia tika rai, te aruaru nei te tangata ravarai i te ata ua: koia tika rai, e tauta anga puapinga kore rai tana: te akaputu ra aia i te apinga, e kare aia i kite i te tangata e riro ei nana.

7 E teianei, e te Atu, eaa taku e tatari nei? teia ia koe anake toku manakonako anga.

8 E akaora koe iaku i taku au ara katoa ra; auraka au e akariroia ei akakino anga na te neneva.

9 Kua muteki ua au, kare au e tuatua, no te mea naau i rave mai.

10 E apai ke atu koe i taua pāpā naau ra: kua rarangoa oki au i te tainga a to rima.

11 Kia tairo nui koe i te tangata i tana ra ara, kua pou roa oki tona inuinu ia koe mei te kakau e pou i te ane ra: e puapinga kore tika rai to te tangata katoa nei. Sela.

12 E akarongo mai i taku pati anga, e Iehova e, e ariu mai i to taringa i taku kapiki anga: auraka koe e muteki ua mai i toku nei roi-mata; e tangata ke oki au nei ia koe; e te tuitarere, mei toku katoa nei ai metua.

13 Ka vaoo iti ua ana au, kia maroiroi ake, ka riro atu ei au, ka ngaro atu ei.