Ieremia

40 TE TUATUA i tae mai kia Ieremia ra, no ko mai ia Iehova ra, kia oti aia i te tukuia e te rangatira vaeaue Nebuzaradana i Rama ra; i te rauka anga ra, i tapeka katoaia oki aia i te pirianganaoa i rotopu i e aronga tuikaa katoa ra i Ierusalema e Iuda, ko tei apaiia ki Babulonia ra.

2 Kua rave iora te rangatira vaeau ia Ieremia, e kua na ko atura kiaia, Na to Atua ra na Iehova i tuatua mai i teianei kino ki teianei, ngai.

3 E kua apai mai oki a Iehova e kua rave mai i tana i tuatua maira: no te mea kua ara kotou ia Iehova ra, e kare i akarongo i tona reo, i rokoia mai ei kotou i teianei mea.

4 E tenana, i na, kua tukuia koe e au i te au pirianganaoa i runga i to rima na i teianei rā. E mea meitaki ia koe ra kia aere katoa taua ki Babulonia, ka aere mai; e naku e akara meitaki atu kia koe ra: e mea kino ia koe kia aere katoa taua ki Babulonia, auraka: i na, te vai ua ra te enua katoa ki mua ia koe ra: ko tei meitaki ia koe ra, e tei tau ia koe ra ka aere, ka aere ki reira.

5 E kare akera aia i oki, kua karanga atura aia, Ka oki mari kia Gedalia, te tamaiti a Ahikama, te tamaiti a Saphana, tei akariroia e te ariki o Babulonia ei tutara ki runga i te au oire i Iuda nei, ka noo atu ei ki ona ra ki rotopu i te au tangata nei: e kare ra, ko te ngai i tau ia koe i te aere, ka aere. Kua oronga maira te rangatira o te aronga vaeau i te manga nana, e tetai apinga, e kua tuku ua atura iaia.

6 Aere atura oki a Ieremia kia Gedalia, te tamaiti a Ahikama, ki Mizepe; noo iora ki ona ra, i rotopu i te au tangata i vaooia ki runga i te enua ra.

7 Akarongo akera te au rangatira katoa o te au nuku i noo ki te ngai atea ra, ratou e to ratou au tangata e, kua akariroiā Gedalia e te ariki o Babulonia ei tutara no te enua, e kua tukuia kiaia te au tane, e te au vaine, e te tamariki, e tetai pae tangata rikiriki no te enua ra, tei kore i apai katoaia ki Babulonia;

8 Kua aere maira ratou ki Mizepe, kia Gedalia ra, ko Isemaela oki, te tamaiti a Netania ra, e ko Ioanana, e ko Ionatana, nga tamariki a Karea ra, e ko Seraia, te tamaiti a Tanumeta, e nga tamariki a Ephai i Netopha, e ko Iezania, te tamaiti a tetai ngati Maaka, ko ratou, e to ratou au tangata.

9 Kua taputou aturā Gedalia, te tamaiti a Ahikama, te tamaiti a Saphana, kia ratou, e to ratou au tangata, na ko atura, Auraka e mataku i te tavini atu ki te au Kaledea: e noo ua i te enua nei, ma te tavini atu i te ariki o Babulonia, e meitaki ïa kotou i reira.

10 Kareka au nei, i na, ei Mizepe au noo ei, ei raverave i ta te au Kaledea, te ka aere mai ki o tatou nei: kareka kotou, e akaputuputu mai kotou i te wina, e te kai mou ra, e te inu ka tuku ei ki roto i ta kotou au vairanga ra, ka noo uaʼi ki roto i to kotou au oire i rauka ia kotou ra.

11 Kia akarongo oki te au ngati Iuda katoa i Moabi, e i roto i te au tamariki a Amona, e i Edoma oki, e tei noo i te au enua katoa ra, e kua orongaia e te ariki o Babulonia tetai toenga no Iuda, e kua akariro aia ia Gedalia, te tamaiti a Ahikama, te tamaiti a Saphana, ei tutara ki runga ia ratou;

12 Kua oki anake maira te au ngati Iuda, mei te au ngai katoa maira i tuaruia atu ei ratou ra, e kua aere maira ki te enua ra ki Iudea, kia Gedalia ki Mizepe ra, e kua akaputuputu iora i te wina e te au kai mou ra e manganui.

13 Kua aere mairā Ioanana, te tamaiti a Karea, e te au rangatira katoa no te nuku i noo i te ngai atea ra, kia Gedalia, ki Mizepe ra,

14 E kua karanga atura kiaia, Te kite meitaki ra ainei koe, e kua tono mai te ariki o te tamariki a Amona ra, ko Baalisa, ia Isemaela, te tamaiti a Netania, e ta ia koe kia mate? Kare akerā Gedalia, te tamaiti a Ahikama, i akarongo atu ia ratou.

15 Kua karanga poiri aturā Ioanana, te tamaiti a Karea, kia Gedalia, i Mizepe, na ko atura, Teia taku tuatua kia koe, e tuku ake ana koe iaku, ka aere au e ta ia Isemaela, te tamaiti a Netania ra, e kare rava e tangata e kite: eaa aia ka ta mai ei ia koe, e pueurikiriki ke atura te au ngati Iuda katoa, te aronga i putuputu mai ia koe ra, e te toenga o Iuda kia pou?

16 Kua tuatua mairā Gedalia, te tamaiti a Ahikama, kia Ioanana, te tamaiti a Karea ra, Auraka rava koe e pera: no te mea e tuatua pikikaa taau ia Isemaela.