Levitiku

14 KUA tuatua mairā Iehova kia Mose, na ko maira,

2 Teia te ture no te lepera i te rā tamā anga iaia ra: Ka aratakiia mai aia ki te taunga ra:

3 Ka aere oki te taunga ki vao mai i te puakapa; e kua akara te taunga iaia, e i na, kua ora te maki lepera i taua tangata lepera ra;

4 Ei reira te taunga e akaue ei iaia, e tiki, ei tamā anga, i nga manu ora viivii kore kia rua ake, e te rakau ra e arezi, e te uru muramura, e te isopa: 5 Ka akaue ei te taunga e, kia tamate ravaia tetai i aua nga manu ra ki roto i tetai āriki karakaraea ki rungao i te vai mapia:

6 Ka rave aia i te manu i ora ra, e te rakau ra e arezi, e te uru muramura, e te isopa, ka taruku ei ma te manu ora katoa ki roto i te toto o te manu i taia i rungao i te vai mapia ra; 7 Ka pîpî ei aia ki rungao i taua tangata e tamāia i te lepera ra, e kia itu pîpî anga; ka tuatuaʼi kiaia e, kua mā; ka tuku ei aia i te manu ora ra kia rere ua ra ki runga i te enua.

8 E ka orei oki taua tangata e tamāia ra i ona kakau, ka varu ei i tona rauru e kia pou takiri roa, e paî ei aia ki te vai, kia mā aia; e muri akera ka aere mai aia ki roto i te puakapa, ei te atea ke ra aia noo ei, auraka i roto i tona uaorai are, e kia po itu ake.

9 Kia tae ra ki te po itu ra, e varu takiri aia i tona rauru i tona mimiti, e te kumikumi, e te tukemata, e tona uruuru katoatoa tana e varu; e ka orei oki aia i ona kakau ki te vai, e paî oki aia uaorai ki te vai, e ka mā ïa aia. 10 E kia tae ki te po varu ra, ka rave ei aia i nga punua mamoe e rua ra, e puke toa kino kore, e tetai punua mamoe, e ua mataiti okotai rai e te kino kore, e te faraoa pueu e toru ake omera ei atinga kai, i irokia ki te inu, e te manongi okotai loga. 11 E na te taunga, na te tamā iaia ra, e akakite i taua tangata e tamāia ra, e taua au mea ravarai, ki mua i te aroaro o Iehova, i te ngutupa o te Are uipaanga ra: 12 E rave oki te taunga i tetai punua mamoe toa, ka apai ei ei tutakingaara, e te loga manongi, ka ruru ei ei atinga-ruru ki mua i te aroaro o Iehova:

13 Ei te ngai i taiaʼi te tarangaara e te atinga karakaratio, ki roto i te ngai tapu ra, e taiaʼi te punua mamoe; na te taunga oki te tutakingaara, mei te tarangaara katoa ra: e mea tapu roa ïa:

14 Ka rave oki te taunga i tetai manga toto no taua tutakingaara ra, e na te taunga oki e tuku ki runga i te tapa o te taringa katau o te tangata e tamāia ra, e ki runga katoa i te maikao maata o tona rima katau, e ki runga katoa i te matikao nui o tona vaevae katau ra:

15 Ka rave oki te taunga i taua loga manongi ra, ka riringi ei i tetai ngai ki roto i te kapu-rima kaui nona ra;

16 Ka tutou oki te taunga i tona maikao katau i te manongi e vai i roto i tona kapu-rima kaui ra, ka pîpî ei i taua manongi ra i tona maikao-rima, e kia itu pîpî anga, ki mua i te aroaro o Iehova:

17 E te toenga o taua manga manongi i te rima ra, ka tuku te taunga i to te reira ki runga i te tapa o te taringa katau, e ki runga i te maikao maata o te rima katau, e ki runga i te matikao maata o te vaevae katau, o taua tangata e tamāia ra, ei runga i te toto o te tutakingaara ra: 18 E te toenga o te manongi i te rima o te taunga ra, ka riringi aia ki runga i te mimiti o taua tangata e tamāia ra: e akapera te taunga i te apai i te tapokiangaara nana ki mua i te aroaro o Iehova.

19 Ka apai oki te taunga i te tarangaara, ka tapoki ei i te ara nana, na te ka tamāia i tona viivii; ei reira ka taiaʼi te atinga karakaratio ra; 20 E na te taunga e apai i te atinga karakaratio e te atinga kai ki runga i te atarau; na te taunga oki e apai i te tapokiangaara nana, e ka mā ïa aia.

21 Kareka te putaua ra, e kare e tika iaia kia apai mai i te reira; okotai mai ana punua mamoe e rave mai ei tutakingaara kia ruruia, ei tapokiangaara nana, e okotai oki omera faraoa pueu i irokia ki te inu ei atinga kai, e okotai oki loga manongi; 22 E e rua ake oki kukupa, e kare ra, kia rua ake punua rupe, te rauka iaia ra; ei tarangaara tetai, ei atinga karakaratio tetai.

23 E i te po varu o tona tamā anga, ka apai mai ei aia i te reira ki te taunga ra, ki te ngutupa o te Are uipaanga, ki mua i te aroaro o Iehova ra.

24 Ka rave oki te taunga i te punua mamoe tutakingaara, e te loga manongi, e na te taunga e ruru i te reira ei atinga ruru ki mua i te aroaro o Iehova;

25 Ei reira te punua mamoe tutakingaara ka taiaʼi, e rave oki te taunga i tetai manga toto no taua tutakingaara ra, ka tuku ei ki runga i te tapa o te taringa katau o te ka tamāia ra, e ki runga i te maikao maata o tona rima katau, e ki runga i te matikao maata o tona vaevae katau ra;

26 E riringi oki te taunga i tetai manga manongi ki roto i te kapu-rima kaui nona ra;

27 E na te taunga e pîpî ki tona maikao katau i tetai vaʼi i taua manongi i roto i tona rima kaui ra, e kia itu pîpî anga, ki mua i te aroaro o Iehova;

28 E tuku oki te taunga i tetai manga i te manongi i roto i tona rima ki runga i te tapa o te taringa katau o taua tangata e tamāia ra, e ki runga i te maikao maata o tona rima katau, e ki runga i te matikao maata o tona vaevae katau ra, i te ngai i tukuiaʼi te toto tutakingaara ra: 29 E te toenga o te manongi i te rima o te taunga ra, e tuku aia ki runga i te mimiti o te tangata e tamāia ra, ei tapokiangaara nana ki mua i te aroaro o Iehova.

30 E ka apai aia i tetai i taua nga kukupa ra, e kare ra, i tetai punua rupe, ko tei rauka iaia ra;

31 I tei rauka oki iaia, ei tarangaara tetai, ei atinga karakaratio tetai, e te atinga kai katoa oki: ko te taunga te ka apai i te tapokiangaara na te ka tamāia ki mua i te aroaro o Iehova. 32 Ko te ture teia no te maki lepera, ko tei kore e tika iaia kia apai i te apinga mou tikai no tona tamā anga ra. 33 Kua tuatua mairā Iehova kia Mose raua ko Aarona, na ko maira,

34 Kia tae kotou ki te enua ra ki Kanaana, i taku e oronga no kotou ei nooanga ra, kia tuku ra au i te maki lepera ki roto i tetai are i taua enua ra i nooia e kotou na; 35 Ka aere te tangata are i reira ki te taunga, e karanga atu ei kiaia, Te manako nei au e, e maki tei te are akera: 36 E na te taunga e akaue e, e akaope mai te apinga i roto i taua are ra ki vao, ka aere ei te taunga, ka akaraʼi i te maki, kia kore rava oki tetai apinga i roto i taua are ra e viivii: e i muri ake ka aere ei te taunga ki roto, e akaraʼi i taua are ra;

37 E kia akara aia i taua maki ra, e i na, tei te ngaika te maki i taua are ra, te vai ra te karavarava ruarua, e te rengarenga, e te muramura, e te oonu ra kia akara kare tei te ngaika anake ra; 38 Ei reira te taunga ka aere ei ki vao i taua are ra i te ngutupa o taua are ra, ka momani ei i taua are ra e kia po itu:

39 E ka oki akaou mai te taunga kia tae ki te po itu ra, ka akaraʼi, e i na, kua raa te maki i roto i te ngaika i taua are ra;

40 Ei reira te taunga ka akaue ei e kiriti ratou i te au toka tei reira taua maki ra, ka akaruke ei ratou i taua au toka ra ki tetai ngai viivii ki vao mai i te oire: 41 E nana oki e akaue kia varuia taua are i roto ra e pini ua ake, ka riringi oki ratou i te ngaika i varuia e ratou ra ki vao mai i te oire, ki tetai ngai viivii ra:

42 Ka rave oki ratou i te au toka ke, ei paʼu i te au toka i kiritiia ra; e rave oki ratou i te ngaika ou, ka amo ei i taua are ra. 43 E kia oki akaou mai te maki, e kia tupu i taua are ra, kua oti oki te toka i te apai keia, e kua oti i te varuia te are, e kua oti i te amoia;

44 Ka aere mairai taua taunga ra e akara, e i na, kua raa te maki i taua are ra, e lepera kakai ïa tei taua are ra: kua viivii.

45 E ka vavaʼiia taua are ra ki raro, te au toka ra, e te rakau ra, e te ngaika katoa no taua are ra; ka apaiia ïa ki vao mai i te oire, ki tetai ngai viivii ra. 46 E tei tomo ki roto i taua are ra i te au rā katoa i momaniiaʼi ra, ka viivii ïa aia e aiai ua atu.

47 E tei moe i roto i taua are ra, e orei aia i ona kakau; e tei kaikai i roto i taua are ra, ka orei aia i ona kakau.

48 Kia aere ra te taunga ki roto e akara, e i na, kare taua maki ra i raa i taua are ra, kia oti taua are ra i te amoia; ka tuatua te taunga i taua are ra i reira, kua mā, no te mea kua ora taua maki ra.

49 E tikiia oki nga manu e rua no te tamā anga i taua are ra, e te rakau ra e arezi, e te uru kutekute, e te isopa: 50 E ka taia tetai manu ki roto i tetai āriki karakaraea i rungao i te vai mapia:

51 E rave oki aia i taua rakau ra e arezi, e te isopa, e te uru kutekute, e te manu ora ra, ka taku ei ki roto i te toto o te manu i taia, e ki roto i te vai mapia ra, ka pîpî ei i taua are ra, e kia itu katoa pîpî anga;

52 E tamā oki aia i taua are ra ki te toto o taua manu ra, e te vai mapia, e te manu ora, e te rakau arezi, e te isopa, e te ao kutekute: 53 Kareka te manu ora ra, e tuku aia i te reira kia rere ua na ki vao i te oire, ki te ngai atea ra; e pera aia i te apai i te tapokiangaara no taua are ra; e ka mā ïa. 54 Ko te ture teia no te au maki lepera ravarai, e te topakapaka marō,

55 No te lepera oki ki runga i te kakau, e ki roto i te are,

56 No te uaua oki, e no te paka, e no te titoutou:

57 Ei akakite kia kotou i te mea viivii e te mea viivii kore: ko te ture ïa teia no te lepera.