1 Samuela

23 KUA akakite maira ratou kia Davida, no ko maira, I na, te Philiseti, te tamaki maira ia Keila, e te āru ra i te au ngai pāpā sitona ra.

2 Kua ui aturā Davida kia Iehova, na ko atura, E aere ainei au e ta i taua au Philiseti ra? Kua tuatua mairā Iehova kia Davida, E aere, ka ta i te au Philiseti, e akaora ia Keila.

3 Kua tuatua maira to Davida ra au tangata kiaia, I na, te mataku ua nei tatou i ko nei i Iuda nei: ka tangaʼi oki kia ta tatou ki Keila, e rave i te au nuku Philiseti ra?

4 Kua ui akaou aturā Davida kia Iehova. E kua tuatua mairā Iehova kiaia, kua na ko maira, Ka tu, ka aere ki raro ki Keila ra; naku oki e tuku mai i te Philiseti ki to rima na.

5 Aere aturā Davida e tona au tangata ki Keila, e kua tamaki atura ki te Philiseti, e pou atura ratou e pou maata ra, e kua taki maira i ta ratou au puaka.

6 Kua ora to Keila ia Dvaida. E oro mairā Abiatara, te tamaiti a Ahimeleka, kia Davida ki Keila ra, kua aere maira aia ki raro ma tetai tiputa i tona rima.

7 E i akakiteia akerā Saula e, kua tae mairā Davida ki Keila. E kua tuatua akerā Saula, Kua tukuia maira aia e te Atua ki toku rima nei; kua mopaniia aia ki roto, koia i tomo ki roto i te oire pa e te tea ra.

8 Kua akaputuputu mairā Saula i te tangata ravarai ki te tamaki, e aere ki raro ki Keila ra, e tamaki ia Davida, e tona katoa ra au tangata ra.

9 Kua kite oki a Davida e, te kimi poiri ua rā Saula i te ravenga kia takinga-kino aia iaia ra; e kua karanga atura aia ki te taunga ra kia Abiatara, Ka apai mai ana i te tiputa.

10 Kua karanga aturā Davida, E te Atua o Iseraela ra, e Iehova, kua rongo akenei to tavini nei e, te umuumu ra Saula e aere mai ki Keila nei, e tae tika mairai aia e tairipoti rava i teianei oire noku.

11 E tuku ainei to Keila nei iaku ki tona rima? ka tae mai ainei a Saula ki raro nei, mei ta to tavini i akarongo akenei? E te Atua o Iseraela e, e Iehova, teia taku tuatua kia koe, e akakite mai koe ki to tavini nei. Kua tuatua mairā Iehova, Ka tae mai aia ki raro nei.

12 Kua karanga aturā Davida, E tuku ainei to Keila nei iaku, e toku au tangata, ki te rima o Saula? Kua tuatua mairā Iehova, Ka tuku ïa ratou ia koe.

13 Kua tu akerā Davida e tona au tangata, e ono paa anere, ki runga, e aere ke atura ki te ngai aere anga atu. E akakiteia akerā Saula e, kua akaruke a Davida ia Keila, e kua ora atura; kua akaruke iora aia i taua tere nona ra.

14 E noo ua aturā Davida i te medebara ra, ki roto i te au punanga etaeta, e ki runga i tetai maunga i te medebara ra ko Zipha. E kimi ua oki a Saula iaia i te au rā katoa ra, kare rai te Atua i oronga iaia ki tona rima.

15 Kua kite oki a Davida e, i aere mai a Saula e kimi iaia kia mate; e e noo rā Davida i te medebara ra i Zipha, i roto i te vaorakau ra.

16 Kua tu akera te tamaiti a Saula ra ko Ionatana, e aere atura ki taua vaorakau ra kia Davida, e kua akamaroiroi atura iaia i te Atua.

17 Kua karanga atura aia kiaia, Auraka e mataku: kare oki koe e rauka i te rima o toku metua ra o Saula; ka riro oki koe ei ariki ki runga ia Iseraela, e ei raro iti ake au ia koe; kua kite katoa oki toku metua ra ko Saula i te reira.

18 Kua papau iora raua i te koreromotu ki mua i te aroaro o Iehova; noo iorā Davida i roto i te vaorakau, aere mairā Ionatana ki tona ngutuare.

19 Kua riro ana to Zipha ki Gibea kia Saula ra, e kua karanga atu e, Kare ainei tei ko akera i o matou a Davida i te pipini anga i roto i te au punanga etaeta i roto i te vaorakau, ki runga i te tuaivi ra ko Hakila, tei te pae i apatonga i te medebara ra?

20 E teianei, e ate ariki, e aere mai koe ki raro, ta to ngakau oki i inangaro i te aere na; e ei ia matou nei te tuku atu iaia ki te rima o te ariki na.

21 Kua tuatua mairā Saula, Kia ora kotou ia Iehova; te aroa mai nei oki kotou iaku.

22 Ka aere ana, taku ïa tuatua kia kotou, e ui kia kite kotou, e akara oki kotou i te ngai i mātauia e ia, e te aronga i kite iaia i reira: kua akakiteia mai oki au e, e ravenga pakari maata tana.

23 E tenana, e akara matariki ana kotou; e kitea tona au pipini anga ravarai i mātau ei aia i te pipini, ka oki akaou mai ei kotou kiaku nei ma te kite pu tikai, e naku ïa e aere e kotou katoa oki; e tei te enua nei aia ra, e kimiia aia e au e pini ua ake te au kopu-tangata katoa o Iuda nei.

24 Kua tu akera ratou, e kua aere maira ki Zipha na mua ia Saula: karekā Davida e tona au tangata, tei te medebara ra ïa tei Maona, tei te Araba, tei te pae i te apatonga i te medebara ra.

25 Kuu akakiteia mai oki a Davida e, kua riro mai anā Saula e tona au tangata e kimi iaia; i aere ei aia ki raro, i runga i te mato ra, e kua noo iora i te medebara ra ko Maona ra. E kite akerā Saula i te reira, kua aru iora aia ia Davida ki taua medebara ra ki Maona ra.

26 Kua aere iorā Saula na tetai pae maunga, e te aere ra oki a Davida e tona au tangata na tetai pae maunga: kua rapurapu iorā Davida i te aere no te mataku ia Saula; kua akapini oki a Saula ma tona au tangata ia Davida e tona au tangata e rave ia ratou.

27 Ko te tae anga mai ïa te karere kia Saula, i te tuatua anga mai e, E aere viviki mai koe; kua kapi oki te enua i te Philiseti.

28 Kua oki mairā Saula, kare akera i aruaru ia Davida, e kua aere atura e tamaki i te Philiseti: i tapaiaʼi taua ngai ra ia Selahamalekota.

29 E mei reira oki aere aturā Davida ki runga, noo iora ki roto i te au punanga etaeta i Eni-gedi.