1 Samuela

24 E KIA oki mairā Saula, mei te aruaru anga i te Philiseti ra, kua akakiteia atura aia, na koia atura, I na, tei te medebara i Enig-gedi rā Davida.

2 Kua rave aturā Saula i te au tangata e toru tausani i ikiia no roto ia Iseraela katoatoa, aere atura e kimi ia Davida e tona au tangata, i roto i te au mato i aereia e te au puakanio momoavao ra.

3 E kua tae atura aia ki te au are mamoe i te pae arataa ra, tei reira tetai ana; kua tomo aturā Saula ki roto e tapoki i tona vaevae. Te noo ua rā Davida e tona au tangata i roto i te pae o taua ana ra.

4 Kua tuatua maira to Davida au tangata kiaia, I na, ko te rā teia ta Iehova i tuatua mai kia koe na e, I na, naku e tuku atu i to enemi ki roto i to rima na, kia rave koe i taau e anoano i te rave iaia ra. Kua tu akerā Davida, kua kokoti poiri maira i te tapa kakau o Saula ra.

5 I muri akera, kua akaapa maira to Davida ngakau iaia uaorai, koia i kokoti mai i te tapa kakau o Saula ra.

6 E kua karanga atura aia ki tona ra au tangata, Kia akakore mai oki a Iehova, auraka au kia pera ki toku pu, ki to Iehova ra tangata i akatainuia ra, auraka toku rima kia rave ua atu iaia, ko tei akatainuia oki aia e Iehova ra.

7 I tāpu iorā Davida i tona au tavini i taua tuatua ra, kare aia i tuku ia ratou kia tu mai ki runga e rave ia Saula. Kua tu iorā Saula ki runga e kia tomo ki vao i taua ana ra, e riro atura.

8 Kua tu akerā Davida i muri ake, e aere atura ki vao i taua ana ra, e kua kapiki atura na muri ia Saula, karanga atura, E taku pu, e te ariki e. E kia akara mairā Saula ki muri, kua tupou iorā Davida ki raro tona mata i te one ra.

9 Kua karanga aturā Davida kia Saula, Eaa koe i akarongo ei i ta te au tangata na tuatua, ko teia tuatua kia koe e, I na Davida, te kimi maira i te takinga-kino ia koe?

10 I na, kua kite pu akenei to mata i teianei rā, i tukuia mai koe e Iehova ki roto i toku rima i na konei i roto i te ana nei; e kua tuatuaia mai au, e ta ia koe; akaperepere akera au ia koe: i tuatua oki au e, Kare rava toku rima e rave ua atu i toku pu; ko te tangata i akatainuia oki aia na Iehova.

11 Ka akara mai ana, e taku metua, ka akara mai ana i te tapa o to kakau i toku rima nei; e akara mai oki koe ei kite noou, e kare rava oku kino e te tatipake, e kare aku ara ia koe, ko au i kokoti mai i to tapa kakau na e kare i ta ia koe ra; e te aruaru ua maira koe iaku kia mate.

12 Na Iehova e akataka i te tuatua ia taua, e na Iehova e tutaki atu ia koe e iaku; kare ra toku rima e rave ua atu ia koe;

13 Mei tei tuatuaia e te aronga takere ra e, No roto mai i te tangata kino te kino; auraka ra toku nei rima e rave ua atu ia koe.

14 I aere mai te ariki o Iseraela ra e kimi iaai? Koai taau e aruaru nei? I te puaka-aoa mate, i te tutua?

15 E teianei, ei ia Iehova te akava, e nana e akamakitoro marie ia taua, e nana e akara, e nana e tuatua i taku tuatua, e nana e akaora iaku i to rima na.

16 E ope akera te reira tuatua i te karangaia e Davida kia Saula ra, kua tuatua mairā Saula, Ko toou ainei ïa reo, e taku tamaiti e Davida? Kua kakaoa ua aturā Saula i tona reo, aue atura.

17 E kua tuatua maira aia kia Davida, Ko koe te tangata tuatua-tika kare au: kua takinga-meitaki oki koe iaku i toku oki takinga-kino ia koe ra.

18 Kua akakite mai oki koe i te tu o toou takinga-meitaki iaku i teianei rā, ka tuku atu ei oki a Iehova iaku ki roto i to rima na, kare koe i ta mai iaku.

19 Koai oki ïa tangata kia rauka tona enemi iaia, ka tuku ua atu ei kia aere ua ana ma te ora? Kia takinga-meitaki mai oki a Iehova ia koe i toou takinga iaku i teianei rā.

20 E teianei, i na, kua kite pu tikai au e, e ariki koe, e ka akatinamou ravaia te basileia o Iseraela nei i to rima na.

21 E teianei, e taputou mai koe kiaku nei ia Iehova ra, kare koe e tipu ke atu i toku uanga i muri ake iaku, e kare koe e akapou i toku nei ingoa i te ngutuare o toku metua ra.

22 Kua taputou iorā Davida kia Saula ra. E riro aturā Saula ki tona ngutuare; karekā Davida e tona au tangata, oki atura ïa ki runga i te punanga.