1 Samuela

27 KUA manako akerā Davida, i roto i tona ngakau, Ka mate rai au i te rima o Saula i tona atu rā: kare atu rai e mea meitaki iaku, mari ra kia oro viviki au ki te enua o te Philiseti kia ora: ei reirā Saula e akapaki ei i te kimi iaku i te au tapere katoa o Iseraela nei, ka ora oki au i tona rima.

2 Kua tu akerā Davida e te au tangata nona e ono anere, e are atura ki te ariki o Gata ra kia Akisa te tamaiti a Maoka ra.

3 E noo iorā Davida ki o Akisa i Gata ra, koia e tona katoa au tangata, e to ratou katoa au ngutuare: ko Davida e ko ana puke vaine toko rua, ko Ahinoama i Iezereela, e te vaine a Nabala, ko Abigaila i Karamela ra.

4 E i akakiteia mairā Saula e, kua riro aturā Davida ki Gata; kare akera aia i kimi akaou iaia ra.

5 Kua karanga aturā Davida kia Akisa ra, Kua kite aroaia mai au e koe ra, e o mai i tetai nooanga noku i roto i tetai oire i uta ra, kia noo au i reira: eaa oki e tau ei ki to tavini nei kia noo i o ou na ki roto i te oire ariki ra?

6 Kua oronga mairā Akisa ia Zikelaga nona i taua rā ra: i riro mai ei Zikelaga no te au ariki o Iuda e tae rava akenei ki teianei rā.

7 E to Davida noo anga i te enua o te Philiseti ra, okotai mataiti tikai e a oki marama.

8 Kua are iorā Davida e tona au tangata ki runga, kua tamaki atura i to Gesura, e to Gezere, e te ngati Amaleka: ko te aronga enua ïa i taito ra, mei te ngai i aereia kia aere tika ki Sura, e tae ua atu koe ki te enua ra ko Aiphiti.

9 Pou iora taua enua ra ia Davida, kare rava tetai i ora, te tane e te vaine katoa; e kua rave maira aia i te mamoe, e te puakatoro, e te asini, e te kamela, e te kakau, e kua oki maira kia Akisa ra.

10 Kua karanga aturā Akisa, Koai tei raveia e kotou i nakonei? Kua tuatua mairā Davida, Ko to Iuda i te pae i te apatonga ra, e te pae i apatonga o te ngati Ierameeli ra, e te pae i apatonga o te ngati Keni ra.

11 kare rava oki e tangata i akaoraia e Davida, te tane e te vaine katoa, e tikaʼi kia apai i te tuatua ki Gata, na ko akera, Ko te aaki aea ia tatou, ko te tuatua aea e, I pera mai a Davida. Ko tana iora ïa ravenga iaia i noo i te enua o te Philiseti.

12 Kua akatika iorā Akisa ia Davida, na ko akera, Kua makitakita ravaia aia e tona au tangata e Iseraela, e tenana, ka riro aia ei tavini noku e tuatau au atu.