1 Samuela

28 KUA akaputuputu iora te Philiseti i to ratou au nuku i taua au rā ra e tamaki, e tamaki ia Iseraela. Kua karanga aturā Akisa kia Davida, E aere katoa tatou ki te tamaki, ko koe, e toou au tangata, kia kite pu mai koe.

2 Kua tuatua mairā Davida kia Akisa, Ka kite ïa koe i ta to tavini e rave. Kua karanga aturā Akisa kia Davida, E teianei, e akariro au ia koe ei tiaki i toku upoko e tuatau ua atu.

3 Kua mate anā Samuela i reira, e i aue ana oki Iseraela ravarai iaia, e kua tanu ratou iaia i tona uaorai oire i Rama. Kua kopae oki a Saula i te aronga i uruia e te vaerua kino e te purepure i taua enua ra.

4 Kua akaputuputu iora te Philiseti, e kua aere maira, e kua patia maira i te puakapa i Sunema: e kua akaputuputu mairā Saula ia Iseraela katoa, e kua patia iora ratou i te puakapa i Gilaboa.

5 E kia akara akerā Saula o taua nuku o te Philiseti ra, mataku iora aia, e kua kurukuru rava atura tona ate.

6 E kia ui atu a Saula kia Iehova ra, kare ake rai a Iehova i tuatua mai kiaia, i te moe, e te Urima, e te peroveta.

7 Kua karanga aturā Saula ki tona au tavini, E kimi kotou i tetai vaine i uruia e te vaerua kino, kia aere atu au kiaia ra, ka ui atu ei kiaia. Kua tuatua maira tona au tavini kiaia, I na, tera tetai vaine vaerua kino tei Eni-dora.

8 Kua akatu ke iorā Saula iaia orai, kua kaku iorā ki te kakau ke, e aere atura ma nga tangata toko rua i te aere katoa anga, e tae atura ratou ki taua vaine ra i te po: e kua karanga atura aia, Teia taku tuatua kia koe, e akakite mai koe kiaku i te vaerua kino na, e apai mai koe i taku e akakite atu kia koe ra.

9 Kua tuatua maira taua vaine ra kiaia, I na, tei raveia e Saula ra kua kite oki koe, e kua ta aia i te aronga i uruia e te vaerua kino e te au purepure i te enua nei: eaa oki koe i tuku mai ei i te ereere i toku ora, kia mate au?

10 Kua taputou aturā Saula iaia ia Iehova ra, na ko atura, Te ora rā Iehova, kare rava koe e akautungaia i taua mea ra.

11 Kua tuatua maira taua vaine ra, Koai taku e apai mai kia koe nei? Kua karanga atura aia, Ko Samuela taau e apai mai.

12 Kite akera taua vaine ra ia Samuela, kua kapiki maira aia ma te reo maata; e kua tuatua maira taua vaine ra kia Saula, na ko maira, Eaa koe i pikikaa mai ei iaku? ko Saula oki koe na.

13 Kua karanga atura te ariki kiaia, Auraka koe e mataku; koai oki taau i akara na? Kua tuatua maira taua vaine ra kia Saula, Te kite nei au i te au atua i te kake anga mai ki runga mei raro mai i te enua ra.

14 Kua karanga atura aia kiaia? Eaa tona tu? Kua tuatua maira aia, E tangata ruaine tei kake mai nei; e kua tapokiia aia ki te kakau. Kua kite akerā Saula e ko Samuela, kua tupou iora aia i tona mata i raro i te one, kua piko iora aia ki raro.

15 Kua karanga aturā Samuela kia Saula, Eaa ra koe i akaanaanata mai ei iaku, i tiki mai ei iaku ki runga nei? Kua tuatua mairā Saula, E tumatetenga rava toku; te tamaki maira te au Philiseti nei iaku, e kua akaruke te Atua iaku, kare oki i tuatua mai kiaku, e kare oki i te peroveta, kare oki i te moe nei; no reira au i kapiki atu ei kia koe, kia akakite mai koe kiaku i taku e rave ra.

16 Kua karanga aturā Samuela, Eaa oki koe i ui mai ei kiaku nei, i tei akaruke a Iehova ia koe, e kua riro ïa ei enemi noou?

17 I akaperā Iehova uaorai i tana i tuatua mai kiaku ra; e na Iehova e aeae mai i te basileia i to rima na, e apai atu ei na to tangata tupu ra na Davida:

18 Ko koe kare i akarongo i te reo o Iehova, kare oki koe i akatupu i tona riri viviki i runga ia Amaleka, no reirā Iehova i rave ei i teianei rā i taua mea nei.

19 Kare oki koe teia anake nei, ka tuku katoā Iehova ia Iseraela e ko koe katoa ki roto i te rima o te Philiseti; e apopo ka kapiti katoaia mai ei koe e to au tamariki i oku nei: e na Iehova e tuku i te nuku o Iseraela ki roto i te rima o te Philiseti ra.

20 Kua topa pu ua iorā Saula ki raro i reira ra, tipapa rava atura i runga i te one ra, ko te maata ïa o tona mataku i te tuatua a Samuela: kare oki e maroiroi i roto iaia; kare oki aia i kai i te kai i taua rā ra, e taua po ra.

21 Kua aere atura taua vaine ra kia Saula ra, e kite akera aia e kua tumatetenga rava aia, e kua karanga atura kiaia, I na, kua akarongo to tavini vaine i toou reo, e kua akaruru atura au i toku mate, e kua akarongo au i toou reo i taau i tuatua maira kiaku nei.

22 Ei teianei, teia taku tuatua kia koe, e akarongo katoa mai koe i te reo o to tavini vaine nei, e tuku atu ana au i tetai manga kai ki mua i to aroaro na; ka kai ei kia maroiroi koe, kia aere koe i toou ra aerenga.

23 Kare ra aia i akatika atu, e kua karanga atura, Kare au e kai. Ko tona au tavini ra e taua vaine katoa ra, māro atura; e kua akarongo atura aia i to ratou reo. Kua tu akera aia ki runga mei raro mai i te one, e kua noo ki runga i te roi.

24 E punua puakatoro ta taua vaine ra i roto i te are kua matu; e kua rapurapu aia i te rave, e kua ko iora, kua rave iora i te faraoa pueu, kua oi iora aia i taua faraoa ra ei areto akaopue koreia, tao atura:

25 Kua tuku iora aia ki mua i te aroaro o Saula, e ki mua i te aroaro o tona au tavini; kua kai iora. Tu akera ratou ki runga i taua po ra, aere ke atura ratou.