1 Ariki

3 AKAAITEITE akerā Solomona i te tuatua ki te ariki o Aiphiti ia Pharao, e kua rave akera i te tamaine a Pharao, e kua arataki maira ki roto i te oire o Davida, e kia oti akera te are nona uaorai i te akatuia, e te are o Iehova, e te patu o Ierusalema e pini ua ake.

2 Te apai ua ra te tangata i te atinga ki te au ngai teitei, no te mea kare e are i akatuia no te ingoa o Iehova, e tae ua maira ki taua tuatau ra.

3 Inangaro ua rai a Solomona ia Iehova, ma te aere i te au akonoanga a te tona metua a Davida; te apai ua ra aia i te atinga, e te tutungi ua ra i te atinga kakara i te au ngai teitei.

4 Aere atura te ariki ki Gibeona e apai i te atinga i reira; ko te ngai teitei maata oki ïa: okotai tausani a Solomona atinga karakaratio i apai ki runga i taua atarau ra.

5 I Gibeona to Iehova mama anga mai kia Solomona i te moe i te po: kua tuatua maira te Atua, Ka pati mai i taku e oronga atu naau.

6 Kua karanga aturā Solomona, E takinga-meitaki maata taau i akakite mai ki toku metua, ki to tavini kia Davida, koia oki i aere ki mua ia koe, i te tuatua-mou, e te tuatua-tika, e te tiratiratu o te ngakau ia koe; kua vaooia e koe teianei takinga-meitaki maata nona, ko koe i oronga i tetai tamaiti nana, ei noo ki runga i tona terono, mei tei teianei rai rā.

7 E teianei, e taku Atua, e Iehova, kua akariro mai koe i to tavini nei ei ariki ei kauono ake i toku metua ia Davida; e tamaiti ua oki au: kare au i kite i te aere ki vao, e i te oki mai ki roto.

8 Tei rotopu oki to tavini nei i te au tangata noou, i ikiia e koe ra, e aronga maata, kare e ope kia tatau, kare oki e tika kia tatau i te maata.

9 E teianei, ei ngakau kite taau e o mai no to tavini nei; kia tika kia tuatua ki toou nei iti-tangata, kia kite au i te meitaki e te kino; koai oki te tika kia tuatua ki teianei aronga maata noou ra?

10 Mareka rava akera te Atu, ko Solomona i pati i taua mea ra.

11 Kua karanga atura te Atua kiaia, No te mea i pati mai koe i taua mea nei, kare koe i pati mia kia akaoraia toou aʼo; kare oki i pati mai i te apinga maata naau uaorai; kare oki i pati mai e kia mate to au enemi; kua pati maira i te kite kia kite koe i te tuatua-tau ra;

12 I na, kua tika iaku taau i tuatua mai nei; i na, te oronga nei au i te ngakau karape e te kite noou; kare oou e aite i muao ia koe, e kare rai oou e aite e tupu a muri atu.

13 Teia oki au ka oronga atu i tei kore i patiia mai e koe ra, i te apinga, e te akangateitei: kare rava atu tetai o te au ariki ra e aite kia koe i toou katoa ra au rā.

14 Kia aere koe na toku nei au arataa, e akono i taku nei au akonoanga, e taku nei au akauenga, mei to metua mei ia Davida i aere ra, e akaroaia e au toou ra au rā i reira.

15 Kua ara akerā Solomona; e i na, e moe taua mea ra. Aere atura aia ki Ierusalema, kua tu ua iora ki mua ake i te aruna koreromotu a Iehova, e kua apai i te atinga karakaratio, e te atinga au, e kua akakaingakai atura na tona au tavini ravarai.

16 Kua aere maira i reira e toko rua puke vaine akaturi ki te ariki ra, kua tu maira ki mua iaia.

17 Kua karanga atura tetai vaine ra, E taku pu, ko au ma teianei vaine, okotai o maua are i te noo anga, e anau akera taku tamaiti ma tana katoa i roto i taua are ra.

18 E po toru akera taku tamaiti i te anau anga; kua anau katoa ta teianei vaine: okotai rai o maua noo anga; kare rava e tangata ke i roto i taua are ra, ko maua anake ra i roto i taua are ra.

19 Mate iora te tamaiti a taua vaine nei i te po; no te mea kua moeia e ia a rungao.

20 Kua tu maira aia ki runga i te turuaipo, kua rave maira i taku tamaiti tei taku pae, te moe ua ra to tavini vaine nei, e kua tuku iora ki roto i tona uaorai keke, e kua tuku maira i taua tamaiti mate nana ra ki roto i toku keke.

21 E kia tu au ki runga i te popongi e angai i taku tamaiti ki te u, i na, kua mate: kia maara ra au i taua popongi ra, i na, kare ïa i taku tamaiti, taku i anau.

22 Kua tuatua maira tetai vaine, Kare; ko te tamaiti ora ra taku, ko taau tamaiti tei mate. Kua tuatua maira tetai, Kare; ko tei mate ko taau ïa tamaiti, ko tei ora ra ko taku ïa tamaiti. Kua pera atura raua ki mua i te aroaro o te ariki.

23 Kua tuatua akera te ariki, Te tuatua maira tetai, Taku teia tamaiti e ora nei; ko taau tamaiti tei mate: te tuatua maira oki tetai, Kare; ko taau tamaiti tei mate, ko taku tamaiti tei ora.

24 Kua karanga atura te ariki, Ka apai mai ana i tetai koke. Kua apai maira ratou i te koke ki mua i te aroaro o te ariki.

25 Kua karanga atura te ariki, Ka tipu i te tamaiti i ora ra i rotopu, e apai atu i tetai pae na tetai, e tetai pae na tetai.

26 Kua tuatua maira te vaine nana te tamaiti ora ra ki te ariki, te aue ra tona ngakau i tana tamaiti, e kua tuatua maira, E taku pu, e tuku atu i te tamaiti ora kiaia; auraka rava kia taia. Kua tuatua maira tetai, Auraka katoa a taua, e tipu.

27 Kua karanga atura te ariki, na ko atura, Ka tuku atu i te tamaiti ora nana, auraka rava e taia: koia te metua vaine tikai.

28 Kite akera to Iseraela katoa i taua akava anga a te ariki ra; kua mataku akera ratou i te ariki: kua kite oki e, tei roto iaia te pakari no ko mai i te Atua ra, kia tuku mai i te tuatua-tau ra.