E “Ngakau Kite” Ainei Toou?

TE RIRO mai anga a Solomona ei ariki no Iseraela taito ra, kua manako e kare aia i tau meitaki ana. No reira kua pati aia i te pakari e te kite i te Atua. (2 Paraleipomeno 1:10) Kua pure katoa a Solomona: “E teianei, ei ngakau kite taau e o mai no to tavini nei; kia tika kia tuatua ki toou nei iti-tangata.” (1 Ariki 3:9) Me e “ngakau kite” to Solomona, ka aru aia i te au ture tu-Atua e te au kaveinga e ka kite i ta Iehova akameitaki anga.

Kare te ngakau kite i te mea teiaa mari ra e tumu rekarekaia. Kua tata te apotetoro ko Ioane: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.” (1 Ioane 5:3) E tika tikai, ko te Atua ta tatou e akarongo. No te mea, ko Iehova Tei Anga Mekameka mai ia tatou. Nana te enua e te au mea pouroa i roto i reira, te ario e te auro katoatoa. No reira kare e rauka ia tatou i te oronga i tetai apinga materia ki te Atua, noatu e te akatika ra aia kia taangaanga tatou i te au apinganui o te moni kia akakite i to tatou inangaro nona ra. (1 Paraleipomeno 29:14) Te manako maira te Atua kia inangaro tatou iaia e kia aere taakaaka kiaia ra, na te raveanga i tona anoano.​—Mika 6:8.

Te ui angaia kia Iesu Karaiti e ko teea te akauenga maata roa atu i roto i te ture, kua karanga atura aia: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa. Ko te akauenga mua teia e tei maata.” (Mataio 22:36-38) Ko tetai mataara kia akakite i taua inangaro ra kia akarongo i te Atua. Ko te pure a tatou tataki tai i reira e kia oronga mai a Iehova i tetai ngakau kite no tatou.

E Ngakau Kite to Ratou

Kua kiia te Pipiria ma te au akara anga o taua aronga e ngakau kite to ratou. Ko tetai akatau anga, kua akakite atu a Iehova ia Noa kia patu i tetai araka maatamaata no te akaora anga i te oraanga. E 40 me kore e 50 mataiti te rave angaia teia angaanga maata nei. E rave anga enitinia tikai teia i te patu i taua apinga maatamaata te ka papanu, noatu te au apinga ririnui o teia tuatau e etai apinga te vaira i teia tuatau. Pera katoa oki, kua akamatakite a Noa i te au tangata kare e ekoko anga e kua aviri e kua taitoito iaia. Inara kua akarongo aia i te au mea katoatoa. Te karanga ra te Pipiria: “Ko tana ïa i rave marie.” (Genese 6:9, 22; 2 Petero 2:5) Kua akaari a Noa i tona inangaro no Iehova na te akarongo tiratiratu anga e tere atu te au mataiti e manganui. Mei teaa ra te akatauanga meitaki no tatou katoatoa!

E akamanako katoa ana, i te pateriareka ko Aberahama. Kua akakite te Atua kia neke aia mei Ura puapinga ra o te Kaledea ra ki tetai ngai kare i kitea. Ma te kore e ekoko anga kua akarongo a Aberahama. (Ebera 11:8) Kua noo aia e tona ngutuare i roto i te au puakapa i te toenga o tona oraanga. Ei tuitarere i taua enua i muri ake i te au mataiti e manganui ra, kua akameitakiia e Iehova aia e e tana vaine akarongo ra ko Sara, ma tetai tamaiti ko Isaaka te ingoa. Mei teaa ra te inangaro maata o Aberahama 100 mataiti ra i tana tamaiti i tona ruaine anga! I etai mataiti i muri mai, kua patiia atu a Aberahama e Iehova ra kia oronga ia Isaaka ei atinga. (Genese 22:1, 2) Te tamamae tikai ra te reira ia Aberahama te manako anga i te raveanga i te reira. Inara, no te mea e inangaro tona ia Iehova kua akarongo aia e kua irinaki e ka na roto mai te uanga taputouia ra ia Isaaka, noatu e ka akatu mai te Atua iaia mei te mate mai. (Ebera 11:17-19) Inara, te vaitata anga a Aberahama i te tamate i tana tamaiti, kua tapu a Iehova iaia te na ko anga e: “Kua kite oki au i teianei e, e mataku toou i te Atua, ko koe kare i karapii i to tamaiti, i to tamaiti okotai roa ra, iaku.” (Genese 22:12) No tona akarongo, kua riro mai a Aberahama mataku ra i te Atua ra ei “oa no te Atua.”​—Iakobo 2:23.

Ko Iesu Karaiti te akaraanga meitaki no tatou no te akarongo. I tona tuatau i ora ana i mua ake ka riro ei ei tangata ra, kua kite aia i te rekareka na roto i te tavini akarongo anga i tona Metua i te rangi ra. (Maseli 8:22-31) Ei tangata, kua akarongo a Iesu ia Iehova i roto i te au mea ravarai, te rave rekarekaanga i tona ra anoano. (Salamo 40:8; Ebera 10:9) No reira, kua rauka tikai ia Iesu te karanga e: “Kare aku peu rave ua; ko ta taku Metua ra i apii mai iaku ra, ko taku ïa e tuatua nei. Ko tei tono mai iaku nei, tei vaitata uaorai ïa iaku nei; kare te Metua i akaruke ua iaku nei ko au anake ra; kare oki au i tukumoe i te rave i te mea e mareka mai ei aia.” (Ioane 8:28, 29) I te openga ra, kua oronga puareinga ua mai a Iesu i tona oraanga, kia akatikaʼi i to Iehova tu ngateitei e kia oko i te au tangata akarongo ra, na roto i tetai matenga taakaaka maata e te mamae. Ko te tika, tei “kitea mei te tangata nei te tu, kua taakaaka iaia uaorai i te akonoanga e tae ua atu ki te mate, ki te mate satauro ra.” (Philipi 2:8) Mei teaa te akaraanga tau i te akaarianga i te ngakau kite!

Kare e Rava Ua te Akarongo Papaki Tai

Kare te katoa anga i akarongo tikai iaia tei karanga e ko te Atua ta ratou e akarongo ra. E akamanako ana i te Ariki ko Saula o Iseraela taito ra. Kua ikuiku te Atua kia takore aia i te au Amaleka kino. (1 Samuela 15:1-3) Noatu e kua takore a Saula ia ratou ei pa enua, kua akaora ra aia i to ratou ariki e kua akaora i etai o ta ratou mamoe e te puakatoro. Kua ui a Samuela: “Eaa oki i kore ei koe i akarongo i te tuatua a Iehova?” Kua pau mai a Saula te karanga anga e: “Koia ïa, kua akamako au i te reo o Iehova . . . Kua rave ra te au tangata [o Iseraela] i te apinga, te au mamoe, e te au puakatoro, te au apinga memeitaki ra . . . , ei atinga na . . . Iehova.” Te akakite katoa anga tikai i te anoano no te akarongo ra, kua pau atu a Samuela: “Tei te atinga karakaratio e te atinga ta Iehova i pingapingareka, mei tei te akarongo i te tuatua a Iehova ra? I na, e meitaki maata tei te akono i tei te atinga e meitaki maata tei te akarongo i tei te tongaua mamoe ra. Kua aite katoa te meameaau ki te ara ra ki te purepure, e te māro ki te kino e te akamori idolo ra. E tenana, kua akaruke koe i te tuatua a Iehova, kua akaruke katoa aia ia koe, auraka koe ei ariki.” (1 Samuela 15:17-23) Mei teaa te maata tei ngaro ra ia Saula te kore anga ona ngakau kite!

Pera te ariki pakari ko Solomona, tei pure ana i tetai ngakau kite, kare i akarongo tamou ana ia Iehova. Tei tuke ki te anoano tu-Atua ra, kua akaipoipo aia i te au vaine ke te ara anga aia i te Atua ra. (Nehemia 13:23, 26) Kua ngaro te mareka anga tu-Atua ia Solomona no te mea kare aia i tamou ana i tetai ngakau kite. Mei teaa ra teia akamatakiteanga no tatou!

Kare te aiteanga o teia e te umuumu ra a Iehova i te apa kore mei ko mai i tona au tavini tangata. Kua ‘manako ra aia e one tatou.’ (Salamo 103:14) Ka rave katoatoa tatou i te au tarevake i tetai au taime, inara te kite ra te Atua e me te anoano ngakau tae ra tatou i te akamareka iaia. (2 Paraleipomeno 16:9) Me ka ara tatou no te mea no te tu apa tangata ra inara ka tataraara, ka rauka ia tatou i te pati i te akakore anga ara i runga i te tumu anga o to Karaiti ra atinga oko, te irinaki anga e te ‘maata ra oki te akakore i te ara,’ ia Iehova. (Isaia 55:7; 1 Ioane 2:1, 2) Penei ka anoano katoa ia te aroa tauturu o te aronga pakari Kerititiano kia rauka i te akaora mai ia tatou i te pae vaerua e kia rauka tetai akarongo anga meitaki e te ngakau kite.​—Tito 2:2; Iakobo 5:13-15.

Eaa ra te Katoa Anga o Toou Akarongo?

Ei au tavini no Iehova, kare e ekoko anga e te manako ra te maata anga o tatou e e ngakau kite to tatou. Penei ka manako tatou e, Kare ainei au i piri ana i roto i te angaanga tutu aereanga i te Patireia? Kare ainei au i tu ngaueue kore ana i te au maro anga maata tei tupu ana no te tu neutara? E kare ainei au i tae putuputu ana ki te au uipaanga Kerititiano, mei ta te apotetoro ko Paulo i raurau maira? (Mataio 24:14; 28:19, 20; Ioane 17:16; Ebera 10:24, 25) E tika tikai, te akaari ra te au tangata katoa o Iehova ra i te akarongo ngakau tae i roto i taua au tu puapinga ra.

Inara akapeaa to tatou tu i te au mea i te au ra ravarai, noatu paa te au tumu meangiti ra? Kua akakite mai a Iesu e: “Ko te akono meitaki i te mea ngiti ra, kua akono meitaki katoa i te mea maata; e ko te pikikaa i te mea ngiti ra, kare katoa ïa i akono i te mea maata.” (Luka 16:10) No reira e mea meitaki no tatou tataki tai kia ui kiaia uaorai, E ngakau kite ainei toku me tupu mai tetai au apinga meangiti me kore tetai au tumu kare etai ke ra i kite ana?

Kua akaari mai te tata taramo e noatu tei roto i tona are ra, kare etai i kite atu iaia, ka ‘aaere ua [aia] ma tona ngakau apa kore ra.’ (Salamo 101:2) Te nooanga i roto i toou are, penei ka pata i te tivi e ka akamata i te akarakara i tetai teata. I reira tikai, kua timata ia toou akarongo. Penei e kare te mea i roto i te teata e tau ana. Ka akarakara ua atu ainei koe, te karanga anga e ko teia ainei te tu o te teata te akaariariia nei i teia tuatau? Me kare ka akakeu ainei toou ngakau kite ia koe kia aru i te akauenga a te Tuatua Tapu, ‘auraka rava te akaturi e te au tuatua viivii ravarai e akaikiia ki o kotou na’? (Ephesia 5:3-5) Ka tamate ainei koe i te tivi noatu e te reka ra te tua? Me kare ka taui ainei koe i te au porokaramu me kino tetai porokaramu? “Te timata mairā Iehova i te tangata tuatua-tika: kareka te tangata kino,” te imene ra te tata taramo, “e tei inangaro i te takinga-kino, kua riri roa tona ngakau iaia.”​—Salamo 11:5.

Te Oronga Maira te Ngakau Kite i te Au Akameitakianga

Inara e manganui te au ngai o te oraanga te ka rauka ia tatou i te akara matatio ma te puapinga no tatou uaorai i te akara e me te akarongo tikai ra tatou i te Atua mei te ngakau. Ka tau to tatou inangaro ia Iehova kia akakeu ia tatou kia akamareka iaia e kia rave i tana e akakite maira kia tatou i roto i tana Tuatua, koia te Pipiria. Ka tauturu te ngakau kite ia tatou kia akono i tetai pirianga meitaki kia Iehova. E tika tikai, me akarongo tikai tatou, ko ‘te tuatua a to tatou vaa e te manako o to tatou ngakau kia tikaia i mua i te aroaro o Iehova.’​—Salamo 19:14.

No te mea te inangaro ra Iehova ia tatou, te apii maira aia ia tatou kia akarongo ei meitaki no tatou uaorai. E ka puapinga maata uaorai tatou na te akono marie anga ma te ngakau katoa i te apiianga tu-Atua. (Isaia 48:17, 18) No reira, e tau kia ariki rekareka tatou i te tauturu tei orongaia mai e to tatou Metua ra i te rangi na roto i tana Tuatua, e tona vaerua, e tana akaaerenga. Kua apii meitakiia tatou mei te mea rai e te rongo ra tatou i tetai reo i muri ia tatou te karanga anga e: “Teia te ara, e na reira te aere.” (Isaia 30:21) Ia Iehova e apii maira ia tatou na roto i te Pipiria, te au puka Kerititiano, e te au uipaanga putuputuanga, kia akono marie rai tatou, kia akono rai ta tatou e apii ra, e kia “akarongo i te au tuatua katoa nei.”​—2 Korinetia 2:9.

Ka tupu te rekareka maata e te au akameitaki anga e manganui me e ngakau kite tetai. Ka orongaia mai te manako au kia tatou, no te mea kua kite tatou e te akamareka meitaki ra tatou i te Atua ia Iehova e te akarekareka anga i tona ngakau. (Maseli 27:11) Ko te ngakau te akarongo ra e paruru angaia no tatou me te timataia ra tatou kia rave i te tarevake. No reira e mea tau kia akarongo tatou i to tatou Metua ra i te rangi e e tau kia pure: “Ei ngakau kite taau e o mai no to tavini nei.”

[Akameitakianga no te Tutu i te kapi 29]

From the Self-Pronouncing Edition of the Holy Bible, containing the King James and the Revised versions