Maseli

4 E AKARONGO mai, e te au tamariki ra, i te ako a te metua tane; e akono marie mai kia rauka ia kotou te kite.

2 Ko te tuatua meitaki oki taku e akakite atu kia kotou; auraka kotou e akaruke i taku nei ture.

3 E tamaiti moekau oki au na toku ra metua tane; te akaperepere e te anau tai, i mua i te aroaro o toku ra metua vaine.

4 E kua apii mai aia iaku, e kua na ko maira, E tāpu marie to ngakau i taku nei tuatua; e akono i taku au akauenga, e ora oki koe i reira.

5 E aruaru i te pakari, e aruaru i te kite: auraka e ngaropoina; auraka e ariu ke i te tuatua a toku vaa nei.

6 Auraka e akaruke iaia, e nana e tapapa ia koe: kia inangaro marie koe iaia, e nana koe e tiaki.

7 Ko te pakari rai te mea meitaki; e aruaru i te pakari: e te au mea katoa e rauka ia koe ra, e aruaru rai i te kite.

8 E akateitei koe iaia, e nana e akateitei ia koe; e takave koe iaia, e nana e akangateitei atu ia koe.

9 Nana e oronga mai i te pare manea no to upoko na: e korona kakā tana e tuku mai ki runga ia koe ra.

10 E akarongo mai, e taku tamaiti e āriki mai i taku nei tuatua e e riro toou ra au mataiti i te maata i te ora anga nei.

11 Ko te mataara o te pakari taku e apii atu ia koe nei; te arataki nei au ia koe na te au ara tika ra.

12 Kare e kopiri toou vaevae me aere; e kia oro ua koe, kare koe e turori.

13 E mou piri tikai i te ako; auraka roa e tukua: e tāpu marie i te reira; ko toou ïa ora.

14 Auraka e ē ua atu i te arataa o te aronga kino ra, auraka oki e aere na te arataa o te au tangata kino ra.

15 Kia ataata i te reira; eiaa e tikoti ua atu na rungao; e ariu ke atu; e aere ke.

16 Kia kore oki ratou e rave i te mea kino ra, kare ratou e varea e te moe; kua ngere ïa ratou i te moe, kia kore e inga tetai tangata ia ratou ra.

17 Ko te kai a te tangata kino ra ta ratou e kai, e te wina a te takinga-kino ra ta ratou e inu.

18 Ko te arataa oki o te aronga tuatua-tika ra, e tau ïa ki te mārama kakā ra, ko tei tupu ua kakā anga e tae ua atu ki te avatea tikai ra.

19 Ko te arataa ra o te aronga kino ra, e tau ïa ki te poiri; kare ratou i kite i ta ratou e turori ra.

20 E taku tamaiti, e akono meitaki mai i taku nei au tuatua; e ariu mai i to taringa ki taku e tuatua nei.

21 Auraka te reira e ngaro ke i to mata na: e tāpu marie ra i te reira ki roto rava i to ngakau na.

22 Ko te ora oki te reira ki te aronga i kite atu ia ratou ra, e ora oki to ratou au kopapa katoa i te reira.

23 I te au mea katoa taau ka tapapa ra, kia maata taau tapapa anga i to ngakau; ko te tumu oki te reira o te ora.

24 Te māro o te vaa ra, e tuku ke atu ïa ia koe ra; e te vaa ketaketa, e akaatea ke atu ïa ia koe ra.

25 E akara tika atu to mata ki mua ia koe, e anga i to topiri-mata ki mua atu ia koe.

26 E akamaara meitaki i te arataa o to vaevae, e e akatinamouia toou katoa ra au aerenga.

27 Auraka e tapaepae ki te pae katau e te pae kaui: e tāpu ra i to vaevae, auraka ei kino.