Maseli

28 TE ati ua ra te tangata kino, kare e tangata i te arumaki mai: kua tu a liona ra te aronga tuatua-tika i te mataku kore.

2 E takinokino au tei taua enua ra, e manganui tona ariki; ei tangata akono meitaki ra, oki atura ïa ki te akono anga tikai.

3 E tangata putaua tei takinga-kino i te ao ra, e tau ïa i te uriia maata kare e manga e toe ra.

4 Te aronga i akaruke i te ture ra, kua akapaapaa ïa i te aronga kino: ko tei akono ra i te ture ra, kua patoi ïa ia ratou.

5 Kare te aronga kanga e kite i te tuatua-tau ra; ko te aronga ra i kimi ia Iehova ra: e kite ïa i te au mea katoa ra.

6 E ngari to te ao tei aere ma te apa kore ra, i tei upokoango tona aerenga, maata ua atu ei te apinga.

7 Ko tei akono i te ture ra, e tamaiti pakari ïa: ko te oa ra o te kaituauau ra, kua taakama ïa i tona metua tane.

8 Ko tei akamaata i tona apinga i te rave tutaki e te oko tika kore ra, kua akamaata aia na tei takinga-meitaki i te ao.

9 Ko tei ariu ke, i tona taringa kia kore e kite i te ture, e riro tana pure ei mea viivii.

10 Ko tei akatatipake i te tangata tiratiratu ra kia aere na te ara kino ra, koia uaorai te ka inga ki roto i tona uaorai vaarua: ko te meitaki ra tei rauka i te aronga apa kore ra.

11 Te pakari ra te tangata apinga i tona uaorai manako anga, kua akamakitoro marieia ra aia e te ao kite ra.

12 Kia rekareka te aronga tuatua-tika ra, kua meitaki rava ïa: kia teitei te aronga kino ra, kua pipini te tangata i reira.

13 Ko tei tapoki i tana ara, kare ïa e manuia: ko tei aaki ra e kua akaruke, e aroaia ïa.

14 E ao to te tangata kare i tivata i te mataku ra; ko tei akaketaketa ra i tona ngakau, e rokoia ïa e te kino.

15 Mei te liona ngunguru ra, e te daba mate pongi ra, koia te tutara akono ngata ki runga i te au tangata rikiriki.

16 Ko te ariki kite kore ra, e takinga-kino maata ïa: ko tei kore ra e noinoi i te apinga ra, e roa ïa ona puke rā.

17 Ko te tangata teiaa i te toto nana i akamaringi ra, te oro ra ïa ki te vaarua, auraka aia kia opukia mai e te tangata ra,

18 Ko tei aere ma te apa kore ra, e ora ïa; ko tei akamingi ra i tona aerenga, e topa pu ua ïa i reira ra.

19 Ko tei tanu i tona kainga, e rai ïa tana kai: ko tei piri aere ra ki te tarevakaua ra, e rai ïa tona putaua.

20 Ko te tangata pikikaa kore ra, te maata ra tona meitaki; ko tei rapurapu ra i te akaputu i te apinga kia maata, kare e kore te ara.

21 Kia akono i te tu o te tangata i te akava anga, kare ïa te mea meitaki; okotai rava manga kai iti kia apai atu ki te reira tangata, e ara aia.

22 Te tangata mata noanoa, te rapurapu ra ïa kia maata te apinga; kare ra aia i kite e, ka rokoia mai aia e te putaua.

23 Ko tei kauvae atu i te tangata ra, e kite aroaia mairai aia i muri ake, i tei taparu atu tona arero kiaia.

24 Ko tei keia i ta te metua tane, e ta te metua vaine, ka karangaʼi e, kare i te ara: e tau aia kia kapiti ki te aronga ta tangata ra.

25 Te tangata ngakau akatietie ra, kua akatupu aia i te tamaki: ko tei irinaki ra kia Iehova, e akamatuia ïa.

26 Ko tei irinaki ki tona uaorai ngakau, e neneva ïa: ko tei akapakari marie ra i tona aerenga, e ora ïa.

27 Ko tei oronga i ta te ao ra, kare aia e ngere: ko tei uuna i tona mata ia ratou ra, e maata te taumaa e iri ki runga iaia.

28 Kia akateiteiia te aronga kino, te pipini nei te tangata: kia mate ra ratou, te maata ra te aronga tuatua-tika.