Ieremia

25 TE TUATUA i tae mai kia Ieremia i te au tangata katoa no Iuda ra, i te mataiti a o Iehoiakima, te tamaiti a Iosia, ariki no Iuda, ko te mataiti mua ra o te ariki o Babulonia ra ko Nebukanesa;

2 I ta te peroveta ra i ta Ieremia i karanga atu ki te au tangata katoa o Iuda ra, e to Ierusalema katoa ra, i te na ko anga e,

3 Mei te mataiti okotai ngauru ma toru mai o Iosia, te tamaiti a Amona, ariki no Iuda, e tae rava akenei ki teianei rā, ko te tai takau ma toru teia o te mataiti, ko te tae anga mai ïa o te tuatua a Iehova iaku, e kua karanga atura au ia kotou, i te tu popongi anga, e te tuatua anga; kare ra kotou i akarongo mai.

4 Kua tono mai oki a Iehova i tona katoa ra au tavini i te au peroveta ia kotou, i te tu popongi anga, e te tono anga; kare ra kotou i akarongo, e kare i ariu mai i to kotou taringa kia akarongo:

5 I te na ko anga atu e, Ka ariu mai ana kotou katoa i tenana i tona ra aerenga kino, e te kino o ta kotou ravenga ra, ka noo ei kotou i te enua nei, ta Iehova i oronga mai no kotou, e no to kotou ai metua, e tuatau, e tuatau ua atu.

6 E auraka e aru aere i te au atua ke, i te tavini anga atu ia ratou; e te akamori anga atu ia ratou; e auraka e akakoko mai iaku kia riri i te angaanga a to kotou rima ra, e kare oki au e rave kino atu ia kotou.

7 Kare ra kotou i akarongo mai iaku, te tuatua mairā Iehova, kia akakoko mai kotou iaku kia riri i te angaanga a to kotou rima ra, kia kino atu kotou.

8 E teianei, te na ko mairā Iehova Sabaota; No te mea kare kotou i akarongo mai i taku tuatua nei,

9 I na, e tono atu au, e rave mai i te au kopu-tangata katoa i te pae ki apatokerau ra, te tuatua mairā Iehova, e toku tavini katoa, i te ariki o Babulonia, ia Nebukanesa, e arataki mai au ia ratou ki runga i teianei enua, e ki runga i tei noo i reira, e ki runga i teia katoa nei au enua, e pini ua ake, e akapou roaia ratou, e akariro oki au ia ratou ei vavaranga, e ei akavaavaa anga, e ei tanea, e tuatau ua atu.

10 E e apai keia e au te reo rekareka ia ratou, e te reo maeva-kata, te reo o te tane akaipoipo ou, e te reo o te vaine akaipoipo ou, te aruru taviri sitona, e te mārama o te mori ra.

11 E riro te enua katoa nei i te tanea, ei vavaranga; e riro oki taua au enua nei ei tavini no te ariki o Babulonia, e kia itu ngauru i te mataiti.

12 E riro oki ïa, kia ope aua nga mataiti e itu ngauru ra, e tutaki atu au i te ariki no Babulonia, e taua enua ra, te tuatua mairā Iehova, i ta ratou ara, e te enua o te Kaledea, e akariro atu au i te reira ei tanea e tuatau ua atu.

13 E e akatae atu au ki runga i taua enua ra, te au tuatua katoa taku i tuatua i te reira ra, te au tuatua katoa i tataia ki roto i teianei buka, tei totouia e Ieremia, i te pa enua katoa ra.

14 No te mea ka taaoia ratou e te au enua e manganui, e te au ariki nunui katoa ra, e tutaki atu oki au ia ratou e kia aite i ta ratou angaanga, e kia aite ki tei raveia e to ratou uaorai rima.

15 Te na ako maira oki te Atua o Iseraela ko Iehova iaku nei; Ka rave mai na i te kapu wina o teianei riri otooto i toku rima nei, ka akainu atu ei i te au enua katoa, taku e tono atu ia koe ra kia ratou:

16 Ka inu oki ratou, e ka turorirori, e ka nenevaia, i te koke taku e akaunga atu ki roto ia ratou.

17 Kua rave atura au i te kapu i te rima o Iehova, e kua akainu atura au i te au enua katoa, i ta Iehova i tono iaku ra:

18 Ia Ierusalema, e te au oire o Iuda ra, e te au ariki, e te ui mataiapo no reira, kia akataneaia ratou, e ei vavaranga, e ei akavaavaa anga, e ei taumaa, mei tei teianei rai rā.

19 Ko te ariki o Aiphiti ra ko Pharao, e tona au tavini, e te ui ariki ki ona ra, e te tangata katoa nona;

20 E te au tangata katoa i irokia ra, e te au ariki katoa o te enua ra o Uza, e te au ariki katoa o te enua o te Philiseti, e ia Asekelona, e ia Gaza, e ia Ekerona, e te toenga no Asedoda,

21 Ia Edoma, e ia Moabi, e te au tamariki a Amona;

22 E te au ariki katoa i Turia ra, e te au ariki katoa i Sidona, e te au ariki i te enua i taatai ra;

23 Ia Dedana ra, e ia Tema ra, e ia Buza ra, e te aronga katoa e varu i to ratou parata,

24 E te au ariki katoa i Arabia ra, e te au ariki katoa no te aronga i iro uaia, tei noo i te medebara ra;

25 E te au ariki katoa i Zimeri, e te au ariki katoa i Elama ra, e te au ariki katoa i Media,

26 E te au ariki katoa i te pae i apatokerau ra, tei vaitata mai e tei mamao ra, tetai e tetai, e te au basileia katoa o te ao nei ki runga i te enua nei: e na muri ia ratou te ariki o Sesaka i te inu.

27 E ka karanga atu koe kia ratou, Te na ko mairā Iehova Sabaota ra, te Atua o Iseraela, ka inu kotou, e kia kona, e kia ruaki, e kia inga atu, e auraka e tu akaou mai, i te koke taku e akaunga atu ki roto ia kotou na.

28 E kia kore e tika ia ratou kia rave mai i te kapu i to rima ra e inu, e karanga atu koe kia ratou i reira, Te na ko mairā Iehova Sabaota ra, E inu tika rai kotou.

29 I na oki, te akamata nei au i te apai mai i te kino ki runga i te oire i tapaia i toku nei ingoa, e ko kotou ainei te ka kore roa atu e akautungaia? Kare oki kotou e kore i te akautungaia; e kapiki atu oki au i te koke kia na runga i tei noo i te enua katoa nei, te tuatua mairā Iehova Sabaota ra.

30 E totou atu oki koe kia ratou i teianei au tuatua katoa, e na ko atu koe kia ratou, E ngunguru a Iehova no runga mai, e mei tona ra nooanga tapu e tuku mai ei aia i tona reo; e ngunguru nui mai aia ki runga i tona nooanga; e maeva aia, mei tei takatakai i te vine ra, i te aronga ravarai e noo i te enua nei.

31 E aruru te ka tae ki te openga o te enua ra; e taumāro anga ta Iehova i te au enua ra, e akava oki aia i te au tangata katoa ra; e tuku atu aia i te aronga kino i te koke, te tuatua mairā Iehova.

32 Te na ko mairā Iehova Sabaota ra; I na, ka riro atura te kino mei tetai enua e tae atura ki tetai enua, e akatupuia tetai puaioio maata, mei te openga mai o te enua ra.

33 E ko tei mate ia Iehova ra, kia tae ki te reira rā, e riro ïa mei tetai openga mai o te enua, e tae ua atu ki tetai openga o te enua ra; kare ratou e tangiia, e kare e akaputuia, e kare e tanumia; e riro ra ei teita ki runga i te enua nei.

34 Ka aue, e te au tiaki, e pukaoa, e ka taviriviri oki kotou, e te aronga nunui o te anana nei, ko to kotou au ra e mate ei ra, kua taʼe mai ïa; e e akapueurikiriki ke atu au ia kotou; e ka topa oki kotou ra mei te āriki inangaroia ra.

35 Kare e ngai e oro ei to te aronga tiaki, kare oki e akapuanga to te aronga nunui o te anana ra.

36 E reo aue no te aronga tiaki, e te puakaoa no te aronga nunui o te anana ra; no te mea kua kino ia Iehova ta ratou i kai ra.

37 E te au nooanga au ra, kua pou ïa, no te riri maata o Iehova.

38 Kua akaruke aia i tona pinanga, mei te liona ou ra, kua tanea oki to ratou enua i te riri o te takinga-kino ra, e no tona ra riri otooto.