Maseli

1 TE maseli a te ariki o Iseraela, a Solomona, te tamaiti a Davida;

2 Kia kite i te pakari, e te ako; ei akakite i te au tuatau kite;

3 Kia ārikiia ta te pakari i apii mai, te tuauta-tika, e te tuatua-tau, e te apa kore;

4 E o atu i te pakari ki te kamakura; te kite, e te akono meitaki, ki te tangata ou.

5 E riro te tangata pakari i te akarongo, e e tupu te kite, e rauka te kite tikai i te tangata akono meitaki;

6 E kite ei i te maseli, e te aiteite anga; te reo o te aronga pakari, e ta ratou tuatua pikipiki.

7 Ko te akamataanga o te kite ra, ko te mataku ïa ia Iehova; ko te pakari ra e te ako ra ko tei akavaavaaia ïa e te neneva.

8 E akarongo mai, e taku tamaiti, ki te apii a to metua tane, e auraka e akaruke i te ture a to metua vaine ra:

9 E riro oki te reira ei pare manea ki runga i to upoko ra, e ei pirianganaoa auro ki runga i to kaki na.

10 E taku tamaiti, kia akanauruia mai koe e te aronga rave ara ra, auraka koe e akatika atu.

11 Kia tuatua mai ratou e, Taki aere tatou, tatou e tapapa i te tangata kia mate, tatou e moetapapa ki te aronga ara kore e kare e tumu;

12 Tatou e apuku ora ua ia ratou, mei ia ade ra; kia pou takiri, mei te aronga e riro ki te vaarua ra;

13 E kitea e tatou te apinga meitaki roa ra, e ki to tatou au are i te apinga āru;

14 Ei ku nei katoa tatou; kia okotai rai pute apinga na tatou katoa ra:

15 E taku tamaiti, auraka koe e kapiti katoa ki to ratou mataara; kiritia mai to vaevae i taua aerenga no ratou ra:

16 Te oro ra oki to ratou vaevae ki te kino, e te rapurapu ra ratou i te akamaringi toto.

17 Totoa anga puapinga kore to te kupenga ki mua i te mata o te manu ra:

18 Ko te reira ra aronga, te tapapa nei ïa ki to ratou uaorai toto: te tuku nei ratou i te ereere kia mate ratou uaorai.

19 Ko te tu ïa o te aronga katoa e morimori i te apinga; e riro ke oki te aronga i rauka ta ratou ra.

20 Te kapiki nui nei te pakari ki te ngai atea ra; te puroro maira tona reo ki te au arataa.

21 I rotopu i te uipa anga mutamuta ra aia i te kapiki ua anga, i te tomoanga i te au ngutupa; ki roto i te oire i te akakite anga aia i tana tuatua, i te na ko anga e,

22 Mei te aa te roa, e te aronga kite kore, e inangaro ei kotou i te tuatua puapinga kore ra? e ko kotou te aronga akavaavaa, e rekarekaʼi i te akavaavaa, e te aronga neneva ra, i te inangaro kore anga i te kite?

23 E ariu mai kotou i taku e ako atu nei: i na, e riringi ua atu au i taku vaerua ia kotou, e akakite pu tikai au ia kotou i taku nei tuatua.

24 No te mea kua kapiki atu au, e kare i tika ia kotou; kua akatika atu au i toku rima, e kare rava e tangata i akono mai;

25 Kua ope ra taku i ako atu i te akarukeia e kotou, e kare i akono mai i taku i akaapa atu:

26 E kata katoa au kia rokoia kotou e te kino ra; e taitoito atu au, kia rokoia kotou e ta kotou e mataku ra;

27 Kia rokoia kotou e ta kotou e mataku mei te uriia ra, kia oro mai to kotou tumatetenga mei te puaioio ra; e rokoia iora kotou e te mate e te mamae maata.

28 Ei reira ratou e kapiki mai ei iaku, kare ra au e ki atu; e kimi vave mai ei ratou iaku, kare ra ratou e kite mai iaku:

29 Ko ratou oki kare i inangaro i te kite, e kare i anoano i te mataku ia Iehova:

30 Kare i anga mai ki taku tuatua; kua ope ra taku i ako atu i te akavaavaaia e ratou.

31 E teianei, e kai ratou i tei tupu i to ratou uaorai aerenga, e ka iu oki ratou i ta ratou uaorai i akakoro ra.

32 Ka mate oki te aronga manako kore ko ratou i tatipake ra, e na te irinaki anga o te aronga neneva ra ratou e akapou.

33 Ko tei akarongo mai iaku ra, ka noo marie ua ïa ma te ora; e akaea ua aia ma te mataku kore i te kino.