Angaanga

11 E KITE atura te au aposetolo e te au taeake i Iudea ra e, kua mou katoa te etene i te tuatua a te Atua.

2 E tae aturā Petero ki Ierusalema, kua taumāro maira to te peritome iaia,

3 Na ko maira, I tomo ana koe ki o te peritome koreia ra, e i kaikai ana koe e ratou katoa oki.

4 Kua akapapa marie aturā Petero i taua tuatua ra, i te akakite anga atu kia ratou mei muatangana mai, na ko atura,

5 Te pure ra au i te oire i Iopa; tareuia iora au e kite atura au i te orama, i tetai āriki mei te kakau pu ra i te topa anga mai no runga i te rangi, i na nga kautuai e a ra te tuku ki raro, e tae rava maira i vaitata kiaku:

6 E tiroi matariki atura toku mata ki taua mea ra, kite atura au i te au mea vaevae a o te enua nei, e te puaka taae, e te au mea totoro aere, e te manu o te reva ra.

7 E akarongo atura au i tetai reo i te tuatua anga mai kiaku, Ka tu, e Petero; ka ta, ka kai.

8 Kua karanga atura au, Auraka rava ïa, e te Atu; kare rava akenei te kai noa e te mea viivii i o ki roto i toku vaa, e teia noaʼi.

9 Kua tuatua akaou maira taua reo ra no runga i te rangi mai kiaku, Ta te Atua i tamā ra, auraka koe e tuatua e, e mea noa ïa.

10 E toru akera oki akapera anga mai: uti akaouia atura taua au mea ravarai ra ki runga i te rangi.

11 E i na, e toko toru puke tangata mei Kaisarea mai, i tonokia mai kiaku, tei roto maira i te are taku i noo i reira ra.

12 Kua akaue maira te Vaerua iaku e aere e ratou katoa, auraka rava e ekoko. E ko teia katoa nei oki au taeake toko ono nei i te aere katoa anga matou, e tomo atura matou ki roto i te are o taua tangata ra:

13 E kua tuatua maira aia kia matou, kua kite aia i tetai angela i te tu anga ki roto i tona are, e te tuatua anga mai kiaia e, Ka tono i te tangata ki Iopa e tiki ia Simona ko Petero tetai ingoa ona;

14 Nana e tuatua mai kia koe i te tuatua e oraʼi koe, ma to kopu-tangata katoa oki.

15 E tei te tuatua anga atu au ra, kua topa maira te Vaerua Tapu ki rungao ia ratou, mei tei ia tatou i muatangana ra.

16 Kua manako iora au i te tuatua a te Atu tana i tuatua maira e, I bapetizo rai oki a Ioane ki te vai; ka bapetizoia ra kotou ki te Vaerua Tapu.

17 E aite akera oki ta te Atua i oronga mai kia tatou nei i tei akarongo i te Atu ia Iesu Mesia, i tana i oronga atu kia ratou ra; koai oki au ka tika iaku kia māro atu i te Atua?

18 E kite akera ratou i taua au tuatua ra, kua tuku marie maira ratou, e akakakā atura i te Atua, na ko akera, Kua oronga katoa mari te Atua i te tataraara ora ki te etene.

19 Ko te aronga oki i pueurikiriki ke i te takinga-kino i tupu ia Setephano ra, aere rava atura ki Phenia, e ki Kupero, e Anetioka, i te tuatua anga i te tuatua ki te ngati Iuda anake ra.

20 E tetai papaki tangata o ratou, no Kupero ïa, e no Kurene, ko tei tuatua atu ïa ki te Eleni i to ratou tae anga atu ki Anetioka, i te tuatua anga i te Atu ia Iesu.

21 E tei ia ratou oki te rima o te Atu; e aronga maata oki tei akarongo, e kua ariu ki te Atu ra.

22 E kua tae rava atura te rongo ki te taringa o te ekalesia i Ierusalema, e kua tono oki ratou ia Banaba e aere aia ki Anetioka.

23 E tae atura aia e kite atura i te aroa ua o te Atua, mareka rava atura, e ako atura ia ratou ravarai, kia topiri atu ki te Atu ma te ngakau katoa.

24 E tangata meitaki oki aia, e kua ki i te Vaerua Tapu ma te akarongo: e aronga maata oki tei kapitiia ki te Atu ra.

25 E aere aturā Banaba ki Tareso e kimi ia Saula;

26 E kite atura aia iaia, kua arataki maira iaia ki Anetioka. E okotai katoa o raua mataiti i reira i te kapiti anga ki taua ekalesia ra, e apii atura i te tangata e manganui. E i Anetioka ana te tapa angaia te ingoa o te au pipi e Kerisitiano.

27 E puke peroveta tei aere mai ki Anetioka i taua au rā ra, mei Ierusalema mai.

28 Kua tu akera tetai o ratou ki runga, ko Agabo te ingoa, kua akakite maira i ta te Vaerua e, te vaitata maira te onge maata i te pa enua ravarai nei: ko tei tupu ïa i te au ia Kalaudio Kaisara ra.

29 Kua akakoro iora te au pipi e akau i te apinga, tona atu rai, tona atu rai, e tau iaia uaorai, ei turu atu i te au taeake i noo i Iudea ra:

30 I pera atura oki ratou, akau atura ki te aronga orometua i te rima o Banaba raua ko Saula.