Luka
3 E TAE akera ki te ngauru ma rima o te mataiti i te au o Kaisara Tiberio, ko Ponotio Pilato te tutara i Iudea, e ko Heroda te teterareka i Galilea, e tona taeake oki ko Philipa te teterareka i Iturea, e te pae i Terakoniti, e ko Lisania te teterareka i Abilene,
2 Ko Ana e ko Kaiapha nga taunga nunui, i tae mai ei te tuatua a te Atua kia Ioane te tamaiti a Zakaria i te medebara ra.
3 Aere atura aia na te au ngai katoa i Ioridana ra, i te tutu aere anga i te bapetizoanga tataraara kia akakoreia te ara;
4 Mei tei tataia ki roto i te buka a te peroveta ra a Isaia, i te na ko anga e, “E reo no tetai i te tutu aere anga i te medebara, Ka akameitaki i te arataa o te Atu, e akatika ua i tona aerenga.
5 Kia ope te au o i te akakiia, e kia ope te au maunga e te au tuaivi i te taakaakaia; kia akatikaia te ara mingi, e kia akamaniaia te au ngai pukupuku:
6 Kia kite katoatoa te tangata i te ora a te Atua.”
7 Kua karanga atura aia ki taua aronga maata i aere mai kia bapetizoia e ia ra, E te anaunga vipera e, naai kotou i ako atu e e rere ke kotou i te mate e vaitata mai nei?
8 E tenana ka tuku mai na i te akonoanga tau i te tataraara; e auraka kotou e tuatua i roto ia kotou uaorai e, E metua to matou ko Aberahama: e karanga atu oki au kia kotou, Ka tika i te Atua i te akatupu i te tamariki na Aberahama no roto i teianei au toka.
9 Te vai nei rai te tarapa i te tumu rakau i teianei; e te rakau katoa kare i ua mai i te ua meitaki ra, ka tipuia ïa, e titiriia atu ki roto i te ai.
10 Kua ui maira taua aronga maata ra kiaia, na ko maira, E akapeea oki matou nei?
11 Kua karanga atura aia kia ratou, E rua ona pereue ra, e oronga atu aia i tetai no tei ngere; e kai tana ra, e pera katoa aia.
12 Kua aere katoa maira te au telona kia bapetizoia, e kua tuatua maira kiaia, E te Orometua ra, e akapeea matou?
13 Kua karanga atura aia kia ratou, Auraka e umuumu atu i tei kore i akonoia na kotou ra.
14 Kua ui maira oki te au vaeau kiaia, na ko maira, E akapeea oki matou? Kua karanga atura aia kia ratou, Auraka e takinga-kino i tetai tangata, eiaa e tapepe pikikaa atu; kia mareka oki kotou i ta kotou tutaki.
15 Te tapapa ua ra te au tangata katoa, e te akaeatu anake ïa i roto i to ratou ngakau ia Ioane, ko te Mesia aina aia me kare aina?
16 Kua karanga aturā Ioane kia ratou ravarai, na ko atura, Ko au nei, te bapetizo nei ia kotou ki te vai; te aere mai na ra tetai, e mana maata tona i toku, kare au e tau kia tatara i te itiki i tona tamaka: nana e bapetizo ia kotou ki te Vaerua Tapu, e te ai:
17 Tei tona rima tana tairi, e tamā marie aia i tana ngai pāpā sitona, e ka akaputuputu aia i te sitona ki roto i tana vairanga sitona; kareka te ota, ka tutungiia ïa e ia ki te ai mate kore.
18 E manganui atu rai tana ako anga atu e te akakite anga atu ki te tangata i te tuatua meitaki.
19 Kareka te teterareka ra ko Heroda, no te mea i akoia aia e ia ia Herodia, i te vaine a tona taeake ra a Philipa, e te ara katoa i raveia e Heroda,
20 Kapiti katoa atura i teia, momani atura ia Ioane ki roto i te are tapekaanga ra.
21 E iaia i bapetizo i te au tangata katoa ra, i bapetizo katoaiā Iesu, e te pure ra aia, mavete akera te rangi,
22 E kua eke maira te Vaerua Tapu ki rungao iaia mei te kukupa ra te tu, e kua tae maira tetai reo mei runga mai i te rangi, i te na ko anga mai, Ko taku tamaiti akaperepere koe; kua mareka rava au ia koe.
23 Kua tae paa ki te toru o te ngauru anga o to Iesu mataiti, i rave ei aia i tana taoonga, i manakoia ra oki, e tamaiti aia na Iosepha, na Eli,
24 Na Matata, na Levi, na Meleki, na Ianai, na Iosepha,
25 Na Matatia, na Amosa, na Nahuma, na Eseli, na Nagai,
26 Na Maata, na Matatia, na Semei, na Iosepha, na Ioda,
27 Na Ioana, na Resa, na Zerubabela, na Salatiela, na Neri,
28 Na Meleki, na Adi, na Kosama, na Elemadama, na Era,
29 Na Iose, na Eliezera, na Iorima, na Matata, na Levi,
30 Na Simeona, na Iuda, na Iosepha, na Ionana, na Eliakima,
31 Na Melea, na Menana, na Matata, na Natana, na Davida,
32 Na Iese, na Obeda, na Boaza, na Salamona, na Naasona,
33 Na Aminadaba, na Arani, na Eseroma, na Phareza, na Iuda,
34 Na Iakoba, na Isaaka, na Aberahama, na Tera, na Nahora,
35 Na Seruga, na Reu, na Pelega, na Ebera, na Sela,
36 Na Kainana, na Arepakasada, na Sema, na Noa, na Lameka,
37 Na Metusala, na Enoka, na Iareda, na Maleleela, na Kainana,
38 Na Enosa, na Seta, na Adamu, na te Atua.