Salamo

25 TE apai atu nei au i toku vaerua kia koe, e Iehova:

2 E toku Atua, te irinaki atu nei au ia koe; auraka au kia akama; auraka toku au enemi kia maeva i runga iaku.

3 Auraka anake oki tei tapapa ia koe ra kia rokoia e te akama; ko tei rave pikikaa ua i te ara ra, kia akama atu ïa.

4 E akakite mai koe kiaku i to au arataa, e Iehova; e apii mai koe iaku i to au aerenga.

5 E arataki koe iaku i te tuatua-mou naau ra, e apii mai oki iaku; ko koe oki te Atua o toku ora; te irinaki nei au ia koe e po ua atu te rā:

6 E akamaara koe i to aroa maata, e Iehova, e toou takinga-meitaki, tei mei ito maira.

7 Auraka koe e manako mai i te kino, e te au ara, o toku ou anga ra: manako maira koe iaku ma te aroa noou ra, no toou takinga-meitaki ra, e Iehova.

8 Meitaki to Iehova e te tiratiratu ra: e apii mai ei aia i te aronga ara i te arataa.

9 E arataki aia i te aronga ngakau maru ma te tuatua-tau; e apii mai aia i te aronga ngakau maru i tona uaorai arataa.

10 Te au aerenga katoa o Iehova, ko te aroa ïa e te tuatua-mou, ki te aronga i akono i tana koreromotu e tana au tuatua-akakite.

11 Maata ua rai taku nei ara, e Iehova, e akakore mairai koe, i toou ra ingoa.

12 Koai te tangata i mataku ia Iehova? ka akakite aia kiaia i tana arataa kia inangaro ra.

13 Ka noo tona vaerua ma te meitaki; e ka riro te enua ki tona ra uanga.

14 Te tuatua-muna a Iehova ra, tei te aronga ïa i mataku iaia ra; e ko ratou tana e akakite mai i te koreromotu nana ra.

15 Te ana ua nei rai toku mata kia Iehova; no te mea e riro aia i te kiriti mai i toku vaevae i te ereere ra.

16 E ariu mai iaku, e aroa mai iaku; e tumatetenga oki toku e te noongata.

17 Kua maata io nei te mamae o toku ngakau: e akaora koe iaku i toku au tumatetenga nei.

18 E akara mai koe i toku mate e toku mamae; e e akakore mai koe i taku au ara katoa nei.

19 Ka akara ana i toku au enemi; kua maata oki ratou: e te viviki maira to ratou makitakita iaku.

20 Tiaki mai koe i toku vaerua, kia ora oki au ia koe: auraka au kia rokoia e te akama; te irinaki nei oki au ia koe.

21 Kia ora au i te apa kore e te tiratiratu: te manako nei oki au ia koe.

22 E te Atua e, kia ora Iseraela ia koe i tona katoa ra au tumatetenga.