Salamo

145 E AKATEITEI au ia koe, e taku Atua, e te ariki; ka akameitaki rai au i toou ra ingoa e tuatau e tuatau ua atu. 2 Ka akameitaki rai au ia koe i te au rā katoa nei; ka akapaapaa au i to ingoa e tuatau e tuatau ua atu. 3 E maatā Iehova e kia akapaapaa maataia; kare oki tona maata e kitea kia kimi. 4 E akameitakiia taau au angaanga mei tetai uki e tae ua atu ki tetai, e na ratou e akakite i taau ra angaanga mana. 5 E tuatua au i te ngateitei kakā o toou ra mana, e taau ra au ravenga taka ke. 6 E tuatua ratou i te ririnui anga o taau au ravenga mataku, ka akakite oki au i taou maata anga. 7 E tuatua rai ratou i te manako anga o toou ra meitaki maata, ka imene nui oki i taau ra tuatua-tika. 8 E takinga-meitaki e te aroa to Iehova; kare e riri vave, e te akaperepere maata. 9 Takinga-meitaki to Iehova ki te tangata ravarai; e te vai ra tona aroa akaperepere ki runga i tana katoa ra au angaanga. 10 Ka akapaapaa taau katoa ra au angaanga ia koe, e Iehova, e na toou aronga tapu e akameitaki ia koe. 11 E tuatua ratou i te kakā o toou ra basileia, e karangaranga ua oki i toou ra ririnui, 12 I te akakite anga ki te tamariki a te tangata nei i tona ra mana, e te mana kakā o tona ra basileia. 13 Ko toou ra basileia, e basileia mutu kore ïa, e toou ra mana ka tae ïa ki te au uki ravarai. 14 Te mou rā Iehova i te aronga katoa e inga ra; kua akatu i te aronga katoa e piko ki raro. 15 Te akara nei te mata o te au mea katoa nei ia koe, e te oronga maira koe i te kai na ratou i te tuatau tikai. 16 Te oora nei koe i to rima, e te akamerengo nei i te kaki o te au mea ora katoa nei. 17 E tuatua-tika ta Iehova i tona katoa ra au aerenga; e te takinga-meitaki i tana katoa ra au angaanga. 18 Te vaitata mairā Iehova i te aronga i kapiki atu iaia, i te aronga i kapiki atu iaia ma te pikikaa kore. 19 E akatika aia i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou. 20 Te tiaki nei a Iehova i te aronga katoa i inangaro iaia; kareka te aronga kino katoa ra, ka akapouia ïa e ia. 21 Ka tuatua toku vaa ma te akapaapaa ia Iehova; e kia akameitaki te tangata ravarai i tona ra ingoa tapu e tuatatau ua atu.