Isaia

14 E AROA oki a Iehova ia Iakoba, e e iki akaou rai aia ia Iseraela, e ka akanoo oki aia ia ratou ki runga i to ratou uaorai enua: e e kapiti katoa mai oki te tangata ke ke ia ratou ra, e e piri mai oki ki te ngutuare o Iakoba.

2 E rave oki te au tangata ia ratou, e arataki atu ki to ratou ngai tikai ra: e ka riro oki ratou no te ngutuare o Iseraela, ei tavini tane e ei tavini vaine, i te enua o Iehova ra: e ka akatuikaa atu ratou i te aronga i tei akatuikaa mai ia ratou ra; e tutara oki ratou ki rungao i te aronga i takinga-kino mai ia ratou.

3 E kia tae ki te rā e akaangaʼi a Iehova i toou ra roiroi, e toou ra mataku, e te angaanga maata i tukuia mai ki runga ia koe ra.

4 Ka atuatu ei koe i teianei peʼe i te ariki no Babulonia, ka na ko ei e, Aue te tangata takinga-kino i kore e! te umuumu auro i kore e!

5 Te rakau a te tangata ara kua aatiia e Iehova, te sepeta a te au tutara ra;

6 Ko tei ta riri rava i te au tangata, ma te ta akapaki kore; ko tei tutara ki runga i te pa enua ma te riri, kio tei rave kino nei, e kare e akaperepere.

7 Kua noo ponuiaau ua te ao katoa nei, kua akaanga te roi; kua puroro ua mai to ratou reo imene.

8 Koia rai ïa, ko te au berusi teia e rekareka nei ia koe, e te au arezi o Lebanona, i te na ko anga e, Mei toou taakaaka angaia, kare ua e tipu i tae mai kia matou nei.

9 Ko ade i raro ra te akakeuia nei ia koe, kia aravei ia koe, i toou aerenga atu; noou i akaaraʼi aia te aronga mana i mate ra, te aronga nunui katoa o te enua nei ra; te akatutu anake ra te au ariki o te pa enua i to ratou au terono.

10 E tuatua anake mai ratou, e na ko mai ïa ia koe, Ko koe nei oki, kua riro katoa koe mei ia matou nei i te parukaua? kua akaaiteia koe kia matou nei?

11 Kua tukuia toou parau ki raro i te vaarua, te aruru oki o to au nabala ra: kua totoaia te pe i raro ake ia koe e kua tapokiia koe ki te toke.

12 Ko toou oki topa mei te rangi mai, e te Etu kakā, tamaiti a te popongi e! ko toou oki tipu angaia ki raro roa i te one, e tei akavi aere i te pa enua e!

13 Kua karanga ra koe i roto i toou ngakau e, E kake atu au ki runga roa i te rangi ra, ki runga ake i te au etu o te Atua e akateitei ei au i toku terono; e noo au ki runga i te maunga uipa anga ra, ki te au ngai mamao ki te pae ki apatokerau:

14 E kake atu au ki runga ake i te au tumurangi; kia aite au i Tei Teitei ra.

15 E tukuia ra koe ki raro roa i te po, ki te pae oonu rava o te vaarua ra.

16 Te aronga e kite ia koe ra, ka akara matariki ua maira ia koe, ka akamaara tikai ia koe, ka na ko ei e, Ko te tangata ainei teia i ruketekete ei te enua katoa nei, i ngaueue ei te au basileia?

17 I riro ei te ao nei mei te medebara, e i pou takiri ei te au oire; kare takiri i tuku i tona au tuikaa kia aere ua na te kainga?

18 Te au ariki katoa o te pa enua ra, te taravarava anake ra ki raro ma te manea, i tona menema i tona menema.

19 Kua akarukeia ra koe ki vao mai i to vaarua ra, mei te rara rakau i akaviiviia ra: i vaiia ki tei taia ra, ki tei puta i te koke ra, i tei riro ki raro ki te au toka o te vaarua ra; mei te ivi i takatakaiia e te vaevae ra.

20 Kare koe e kapiti katoaia kia ratou i te tanumanga, no te mea, kua pou ia koe toou uaorai enua, toou uaorai au tangata kua taia e koe: kare rava te uanga o te aronga rave tuatua kino e akapaatuia.

21 E akateateamamao i te ta i tana au tamariki i te ara a to ratou au metua ra; ko te tu aea ratou kï runga e rave i te enua no ratou; ko te ki aea te ao nei i te oire ia ratou.

22 Te tuatua maira oki a Iehova Sabaota, E tu au e rave ia ratou; e tipu ke atu i te ingoa i Babulonia nei, e nga toenga; te tama, e te mokopuna: te tuatua mairā Iehova.

23 E e akariro au iaia ei nooanga no te kephoda ra, e ei vai punapuna anake: e pakoko takiri au iaia ki te pakoko o te mate, te tuatua mairā Iehova Sabaota ra.

24 Kua taputou oki a Iehova Sabaota ra, na ko maira, Ko taku oki i maara ra, ko te reira te ka tupu; e ko taku i akakoro ra, ko te reira te ka mou:

25 Kia pou te ngati Asura i toku nei enua, e kia takatakiia aia ki runga i toku ra au maunga i raro ake i te vaevae: ei reira tana zugo i runga ia ratou e taka ke ei, e e kore ei tana apainga i runga i to ratou pakuivi.

26 Ko te tuatua teia i akakoroia no te pa enua katoa nei: teia oki te rima i akatikaia ra na rungao i te au enua katoa ra.

27 Kua akakoro oki a Iehova Sabaota ra, e naai oki e akakore? tona rai te rima i akatikaia, e naai e akaoki mai?

28 Te mataiti i mate ei te ariki ra ko Ahaza i akakiteia mai ei teianei tuatua:

29 Auraka e rekareka, e Philisetia, e pini ua ake koe na, i te mea kua aati te rakau i pāpā ia koe ra: e vipera oki te ka tupu na roto i te ovi ra, e tona uanga ei ovi rere aere ïa mei te ai ra.

30 E kaikai te ao kino ra, e e moe reka ua te tangata putaua ra: ka ta ra au i toou ra tumu ki te onge, e te totoenga noou ra, e taia ia.

31 E raungara, e te ngutupa e, kia pukaoa, e te oire e; aue koe, e Philisetia katoatoa e, kua taravai rava! e auai tei peke mai mei apatokerau, e kare ua tetai i taka ke i roto i tona nuku ra.

32 Eaa te ka karangaia atu ki te au karere a te pa enua nei? Kua akatinamouia Ziona e Iehova, e rauka te akapuanga no te aronga ao o tona ra au tangata ki reira.