Ioane

10 TIKA, tika tikai taku e karanga atu kia kotou, Ko te kore e na te ngutupa te tomo ki roto i te koro o te mamoe ra, ko te kake na runga i tetai ara ke ra, e keia ïa, e te noni.

2 Na te ngutupa rai te tiaki mamoe i te tomo.

3 E kiriti mai ïa te tiaki pa ra iaia; e ka akarongo mai te mamoe i tona reo: e karanga atu aia ki tana uaorai mamoe ma te taiku atu i te ingoa; e e arataki aia ia ratou ki vao.

4 E arataki aia i tana uaorai mamoe ki vao ra, e na mua aia ia ratou te aere; e ka aru mai te au mamoe iaia, kua kite oki ratou i tona reo.

5 Kare ratou e aru i te tangata ke, ka oro ke ratou i reira: kare oki ratou e kite i te reo o te tangata ke.

6 I karanga tika aturā Iesu kia ratou i taua parabole nei: kare ua ra ratou i kite i te tuatua tana i karanga atu kia ratou ra.

7 Kua karanga akaou aturā Iesu kia ratou, Tika, tika tikai taku e karanga atu kia kotou, Ko au te ngutupa o te mamoe.

8 Ko to mua ravarai iaku ra, e keia ïa, e te noni: kare ra te mamoe i akarongo ia ratou.

9 Ko au te ngutupa; ko te na ko nei mai iaku nei te tomo ra, ka ora ïa, ka aere ua ratou ki roto e ki vao, ka rauka oki te kai.

10 Ko te keia anake ua ta te keia i aere mai ei, ko te ta oki, e kia pou takiri: i aere mai nei ra au kia rauka to ratou ora, e kia maata ua atu te ora.

11 Ko au te tiaki mamoe meitaki ra: ka oronga te tiaki mamoe meitaki i tona uaorai ora no te mamoe.

12 Ko tei ouia ra, kare aia i te tiaki mamoe ra, kare oki tona uaorai te mamoe, kia kite ra aia i te luko i te aere anga mai, te akaruke ra i te mamoe, oro ke atura: te motumotu ra tetai papaki i te luko, pueurikiriki ke atura te anana.

13 I oro ei tei ouia ra, no te mea e tangata ouia aia, kare aia i akono i te mamoe.

14 Ko au te tiaki mamoe meitaki ra: kua kite au i taku uaorai, e kua kitea au e ratou.

15 Mei te Metua i kite iaku nei ra, e ko au i kite i te Metua: e e oronga oki au i toku ora no te mamoe.

16 E mamoe ke atu rai taku, kare no teianei koro: e arataki katoa mai au ia ratou e tikaʼi, e akarongo mai oki ratou i toku nei reo: kia okotai oki anana, okotai oki tiaki.

17 I akaperepere mai ei taku Metua iaku, ko au i oronga i toku ora, ka rave akaou atu ei.

18 Kare e riro e na tetai ke e rave; naku uaorai e oronga ua atu: Ka tika oki iaku kia oronga, ka tika oki kia rave akaou. Ko ta toku Metua ïa i akaue mai iaku nei.

19 Kua mavete akaou iora te ngati Iuda i taua tuatua ra.

20 Kua tuatua iora tetai pae o ratou, E demoni tona, e kua neneva; eaa kotou i akarongo atu ei iaia?

21 Kua na ko akera tetai papaki, Kare teia tuatua i ta te tangata demoni: ka puera ainei te mata o te matapo i te demoni?

22 I reira te oroa o te akatapu akaou anga i Ierusalema, e paroro taua tuatau ra.

23 E te aaere ua rā Iesu i roto i te iero i te tomoanga o Solomona ra.

24 Kua akapini akera te ngati Iuda iaia, kua tuatua maira kiaia, Mei te aa ra te roa o to matou ekoko anga ia koe? Ko te Mesia koe ra, ka akakite ua mai koe.

25 Kua karanga aturā Iesu kia ratou, Kua akakite atu oki au kia kotou, kare ra kotou i akarongo mai: ko te angaanga tini taku e rave ma te ingoa o taku Metua ra, ko te akakite mai ïa iaku.

26 Kareka kotou, kare ïa e akarongo, no te mea kare kotou i taku mamoe.

27 Ka akarongo mai taku mamoe i toku reo, taku rai oki i karanga atu na kia kotou, kua kite oki au ia ratou, e ka aru mai oki ratou iaku:

28 E oronga atu au i te ora mutu kore no ratou; kare rava ratou e mate, e kare rava oki ratou i roto i toku nei rima e riro ia etai ke, me āru mai.

29 Ko taku Metua i oronga mai ia ratou noku ra, ko te maata ua atu ïa; e kare e tika ia etai kia āru atu ia ratou i roto i te rima o toku Metua ra.

30 Ko au e te Metua ra, okotai ïa.

31 Kua rave akaou iora te ngati Iuda i te toka e peî iaia.

32 Kua karanga aturā Iesu kia ratou, Manganui oki taku angaanga meitaki i akakite atu au kia kotou na toku Metua; no teea ra i taua angaanga tini ra, i peî mai ei kotou iaku i te toka na?

33 Kua tuatua maira te ngati Iuda kiaia, na ko maira, Kare to te angaanga meitaki i peî atu ei matou ia koe i te toka, no te akakino Atua; ko koe te tangata na, i akaatua ia koe uaorai.

34 Kua karanga aturā Iesu, Kare ainei i tataia i roto i ta kotou ture ra e, I tuatua na au e, e atua kotou?

35 I karanga aia ki te aronga i tuatuaia atu te tuatua a te Atua ra e, e atua ratou, e kare oki e apa te tuatua i tataia ra;

36 I tapepe mai oki kotou i te akakino Atua i ta te Metua i akataka e i tono mai i te ao nei, ko au i karanga ra e, ko te Tamaiti au na te Atua?

37 Kare au i rave i te angaanga a taku Metua ra, auraka e akarongo mai iaku.

38 Te rave nei ra au, e kare kotou i akarongo mai iaku ra, ka akarongo i te au angaanga: kia kite kotou, kia akarongo kotou e, tei roto iaku te Metua, e tei roto oki au iaia.

39 Kua timata akaou atura ratou i te opu iaia; ora atura ra aia i to ratou rima.

40 Aere akaou atura aia e topa maira Ioridana, i te ngai ta Ioane i bapetizo i muatangana, noo atura i reira.

41 E manganui tei aere mai kiaia ra, e kua karanga iora e, Kare ua a Ioane e akairo i rave: kareka te au tuatua katoa ta Ioane i tuatua i teianei tangata, e tuatua-mou anake ïa.

42 E manganui oki tei akarongo iaia i reira.