Mataio

15 KUA aere maira kia Iesu i reira, tetai aronga tata tuatua, e te au Pharisea, no Ierusalema, kua na ko maira,

2 Eaa te aronga pipi aau nei i akaapaʼi i te tuatua a te aronga taito ra? kare oki ratou i orei i to ratou rima ka kai ei i te kai.

3 Kua karanga atura aia, na ko atura kia ratou, Eaa kotou uaorai i akaapaʼi i te akauenga a te Atua i ta kotou ikuiku?

4 Te akaue maira te Atua, na ko maira, “E akangateitei atu i to metua vaine,” e “ko tei akakino i te metua tane e te metua vaine, e tamate takiri roaia.”

5 E te tuatua nei kotou e, Ko tei karanga atu ki te metua tane e te metua vaine, Kia tapu te au mea katoa naku nei e puapingaiaʼi koe na;

6 Auraka atura aia e akangateitei i tona metua tane e tona metua vaine. Kua pera oki kotou i te akakore anga i ta te Atua akauenga i ta kotou uaorai ikuiku.

7 E te au pikikaa e, te tau tikai nei kotou i ta Isaia i tuatua ia kotou, i te na ko anga e,

8 “Te topiri mai nei teianei aronga iaku i to ratou vaa, e te akameitaki mai nei to ratou ngutu iaku; tei te atea ke ra to ratou ngakau iaku.

9 E akamorianga puapinga kore ra ta ratou iaku, ka apii ei i tei tukuia mai e te tangata anake ra.”

10 Kua karanga atura aia ki taua aronga maata ra, na ko atura kia ratou, E akarongo mai, kia kite:

11 Kare te mea i o ki roto i te vaa te mea e viivii ei te tangata; te no roto maira i te vaa, e viivii te tangata i te reira.

12 Kua aere maira tana au pipi, na ko maira kiaia, Te kite nei koe e, kua riri te aronga Pharisea i te akarongo anga i taua tuatua nei?

13 Kua karanga atura aia, na ko atura, Te au rakau ravarai, tei kore i tanumia e taku Metua i te ao ra, e kiritiia ïa.

14 E vaoo ua atu; e matapo arataki matapo ïa. E kia arataki te matapo i te matapo, e topa kapipiti ïa ki roto i te vaarua.

15 Kua tuatua mairā Petero kiaia, na ko maira, E akakite mai koe kia matou i taua parabole nei.

16 Kua na ko aturā Iesu, Kare katoa kotou nei i kite?

17 Kare rai kotou i kite e, tei o atu i te vaa e tae ïa ki roto i te kopu, e akarukeia atura ki vao?

18 Kareka ta te vaa e tuku mai, no roto mai ïa i te ngakau; koia te mea e viivii ei te tangata.

19 No roto mai oki i te ngakau te manako kikino, te ta tangata, te moeaana, te akaturi, te keia, te tapepe pikikaa, e te akakino Atua:

20 Ko te au mea ïa e viivii ei te tangata: kareka te kai ua ma te rima orei koreia ra, kare te tangata e viivii i te reira.

21 Tu akerā Iesu i reira, aere atura ki te kotinga i Turia e Sidona.

22 E i na, kua aere maira tetai vaine ngati Kanaana no reira, kua kapiki maira kiaia, na ko maira, E te Atu, e te Tamaiti a Davida, e aroa mai koe iaku! kua maata te mate o taku tamaine i tetai demoni.

23 Kare ra aia i ki atu kiaia. Kua akavaitata maira tana au pipi, kua pati maira kiaia, na ko maira, E tuku atu iaia: te kapiki aere mai nei i muri ia tatou.

24 Kua karanga atura aia, na ko atura, Kare au i tonokia mai i ko na, mari ra, ki te au mamoe i ngaro i te ngutuare o Iseraela.

25 Kua akavaitata ua maira aia, tipapa atura ki mua iaia, kua tuatua maira, E te Atu, turu mai koe iaku!

26 Kua karanga atura aia, na ko atura, Kare e tika kia rave i te kai a te tamariki, e titiri atu ei na te kuri.

27 Kua tuatua maira aia, Tika rai, e te Atu: te kai nei ra te kuri i te ungaungā kai i topa no runga i te kaingakai a to ratou pu.

28 Kua karanga aturā Iesu kiaia, na ko atura, E maine, e akarongo maata toou: ko taau i inangaro ra, kia akaperaia koe. Ora takiri akera tana tamaine i reira ra.

29 Akaruke mairā Iesu i taua ngai ra, tae atura i te pae roto i Galilea ra; kake atura ki runga i tetai maunga, noo iora ki raro i reira.

30 E manganui te tangata i aere mai kiaia ra, apai katoa maira i te pirikoki, te matapo, te murare, te paruparu, e te au maki ke katoa e manganui, kua tuku iora ki te pae vaevae no Iesu; kua akaora atura aia ia ratou:

31 Umere anake iora taua aronga maata ra, i te kite anga i te murare i te tuatua anga, te paruparu i te ora anga, te pirikoki i te aere ua anga, e te matapo i te akara anga; akakakā atura ratou i te Atua no Iseraela.

32 Kua karanga aturā Iesu ki tana aronga pipi ra, kua na ko atura, Te tangi atu nei au i teianei aronga maata, i te mea, ka po toru akenei ratou kiaku nei, e kare ua e manga kia kai; kare au e tuku pongi ua ia ratou, ko te paruparu aea ratou i te ara.

33 Kua tuatua maira tana au pipi kiaia ra, Eiea te kai e raukaʼi ia tatou i te medebara nei, e ravaʼi na teianei aronga maata?

34 Kua karanga aturā Iesu kia ratou, Eia a kotou manga? Kua tuatua maira ratou, E itu, e nga mea ika rikiriki.

35 Kua akaue atura aia i taua aronga maata ra kia moe ratou ki raro.

36 Kua rave iora aia i nga manga e itu ra, e nga ika, akameitaki atura, vavaʼi iora, tuku atura ki te au pipi, e na te au pipi i tua na te tangata tini.

37 Kai anake iora ratou ravarai, e pangia rava akera, akaputuia iora te ungaungā kai toe ra, e ki akera nga tapora e itu.

38 E a tausani tane taua aronga i kai ra, e te vaine oki ma te tamariki.

39 Kua tuku atura aia i taua aronga maata ra, aere atura aia ki runga i te pai, uru atura i te pae enua i Magadala.