Numero

20 I REIRA to te uipaanga tamariki katoa a Iseraela tae anga mai ki te medebara o Zini, i te marama mua ra: noo iora taua au tangata ra i Kadesa; e mate iorā Miriama i reira, e i reira tona tanu mangaia.

2 E kare rava e vai ta taua uipaanga ra; e kua akaputuputu maira ratou ia Mose raua ko Aarona.

3 Kua tauetono maira te tangata ia Mose, tuatua maira, na ko maira, Naringa matou i mate katoa ka mate ei to matou ai taeake ki mua i te aroaro o Iehova ra!

4 Eaa oki korua i arataki mai ei i te uipaanga o Iehova ki ko nei, ki teianei medebara, kia mate matou e ta matou au puaka i ko nei? 5 Eaa oki korua i arataki mai ei ia matou mei Aiphiti mai, e apai mai ia matou ki ko nei ki teianei ngai kino? e ngai ua kai kore, e te suke kore, e te vine kore, e te remuna kore; e te ngai vai kore oki kia inu.

6 E aere aturā Mose raua ko Aarona mei te aroaro atu o taua uipaanga ra ki te ngutupa o te Are uipaanga, kua tipapa iora raua i raro to raua mata: e kua mama maira te kakā o Iehova ra kia raua.

7 Kua tuatua mairā Iehova kia Mose, na ko maira,

8 Ka rave i te rakau ra, ka akaputuputu mai i te uipaanga ra, ko koe, e toou tuakana ko Aarona, ka tuatua atu ei ki te mato ki mua tikai i to ratou mata; e na te reira e tuku mai i te vai, naau e akataʼe mai i te vai na ratou no roto i taua mato ra, ka akainu atu ei koe i taua uipaanga ra, e ta ratou au puaka.

9 Kua rave iorā Mose i te rakau i mua i te aroaro o Iehova, tana i akaue mai iaia ra.

10 Kua akaputuputu iorā Mose raua ko Aarona i te uipaanga ki mua i taua mato ra, e kua karanga atura aia kia ratou, Ka akarongo mai ana, e tenana aronga meameaau; e tika aina ia maua kia apai atu i te vai na kotou no roto i teianei mato? 11 E kua tāki aturā Mose i tona rima, kua ta atura i te mato ki tana rakau e rua tainga, kua taʼe maira te vai e mea maata, kua inu iora taua uipaanga ra e ta ratou au puaka ra.

12 Kua tuatua mairā Iehova kia Mose raua ko Aarona, No te mea kare akenei korua i akarongo mai kiaku, kia akatapuia au ki mua i te aroaro o te tamariki a Iseraela, kare atura korua e arataki i teianei uipaanga ki te enua taku e oronga atu no ratou ra.

13 Ko Meriba teianei vai; kua tauetono oki te tamariki a Iseraela ia Iehova, e akatapuia aia ia ratou ra.

14 Kua tono aturā Mose i nga veka ki te ariki o Edoma mei Kadesa atu, karanga atu e, Te na ko maira to taeake ko Iseraela ra, Kua kite koe i to matou au tumatetenga katoa i rokoia mai ei matou ra: 15 E kua aere to matou ai metua ki Aiphiti, e i Aiphiti to matou noo anga e roa rava akenei; e kua takinga-kino mai to Aiphiti ia matou, e to matou ai metua:

16 Ia matou ra i tautopa atu kia Iehova ra, kua akarongo mai aia i to matou reo, e kua tono mai i te angela, e kua arataki mai ia matou mei Aiphiti maira; e i na, tei Kadesa matou, tei te oire ïa i te matamata o toou enua ra:

17 Teia ta matou tuatua kia koe, e tuku mai koe ia matou e na roto matou i toou nei enua i te aere: kare matou e na roto i te kainga, kare oki e na roto i te au kainga vine ra, kare oki matou e inu i te vai no te au punavai ra; e na runga ua matou i te ara tiroa o te ariki ra: kare matou e anga ke na te pae katau, e na te pae kaui, e topa ua mai toou ra enua.

18 Kua tuatua maira Edoma kiaia, Auraka koe e na roto mai i toku nei enua, ko te aravei atu aea au ia koe ma te koke.

19 Kua karanga atura te tamariki a Iseraela kiaia, E na te ara tiroa ua matou i te aere: e kia inu au e taku au puaka i to vai, naku ïa e tutaki: e tuku ua mai koe iaku kia aere ua na roto i to enua mei te tuitarere ua. 20 Kua tuatua maira aia, Auraka koe e na ko nei mai te aere.Tei vao maira Edoma e tamaki iaia ma te tangata katoa e manganui, e te rima ririnui.

21 Kare akera i tika ia Edomā i te tuku mai i te ara tiroa kia aere a Iseraela na roto i tona enua ra; ariu akera Iseraela na tetai ara ke.

22 Kua aere anake maira te tamariki a Iseraela, te uipaanga katoa ra, mei Kadesa mai, e tae maira ki te maunga ra ko Hora.

23 Kua tuatua mairā Iehova kia Mose raua ko Aarona i te maunga ra ko Hora, i te pae o te enua o Edoma ra, na ko maira,

24 Ka kapiti katoaiā Aarona ki tona iti-tangata: kare oki aia e tae ki te enua taku e oronga ki te tamariki a Iseraela ra, no te mea kua akono ngata korua i taku tuatua i te vai ra i Meriba.

25 E rave koe ia Aarona e tana tamaiti ia Eleazara, ka arataki ei ia raua ki runga i te maunga nei ko Hora:

26 Ka kiriti ei i te au kakau i runga ia Aarona, ka ao ei ki runga i tana tamaiti ia Eleazara; e ka mate a Aarona i reira, e ka kapiti katoaia atu ki tona uaorai iti-tangata. 27 Kua pera oki a Mose i ta Iehova i akaue maira; aere atura oki ratou ki runga i taua maunga ra ko Hora, ki mua i te aroaro o taua uipaanga katoa ra.

28 Kua kiriti akerā Mose i te au kakau i runga ia Aarona, e kua ao atura ki runga i tana tamaiti ia Eleazara; e mate iorā Aarona i reira ki runga i te take o taua maunga ra: e kua aere mairā Mose raua ko Eleazara, mei runga mai i taua maunga ra.

29 E kite akera te uipaanga katoa e, kua mate a Aarona, kua aue iora te ngutuare katoa o Iseraela ia Aarona, e toru akera ngauru anga o te po.