Nehemia

9 E TAE akera ki te rā tai takau ma a i taua marama nei, kua kuku maira te tamariki a Iseraela ma te akakore i te kai, e te kakau paoa; e ma te one i runga ia ratou.

2 Kua akataka atura te uanga o Iseraela i te au tangata ke katoa, e kua tu ua iora e kua aaki i ta ratou au ara, e te au ara a to ratou ai metua.

3 Kua tu ua iora ratou i to ratou turanga, e kua tatau iora i te buka ture a to ratou Atua a Iehova, tetai kuata i taua rā ra; e to tetai kuata rā ra, e aaki anga ïa i ta ratou ara, e kua akamori i to ratou Atua ia Iehova.

4 I reira te au ngati Levi, ko Iesua, e ko Bani, ko Kadimiela, ko Sebania, ko Buni, ko Serebia, ko Bani, e ko Kenani, i te tu anga ki runga i te paata ra, e kua kapiki nui atura ki to ratou Atua kia Iehova.

5 E te au ngati Levi, ko Iesua, e ko Kadimiela, ko Bani, ko Hasabania, ko Serebia, ko Hodiia, ko Sebania, e ko Petaia, kua tuatua akera, Ka tu ki runga, e akameitaki i to kotou Atua ia Iehova e tuatau e tuatau ua atu: kia akameitakiia oki toou ra ingoa kakā, ko tei teitei rava i runga rava ra, kare e taea e te akameitaki e te akapaapaa.

6 Ko koe, ko koe anake ra ko Iehova; naau rai te rangi i anga, te rangi o te au rangi ra, e to ratou au nuku katoa ra, te enua, e te au mea katoa i rungao ra, te tai e te au mea katoa i roto ra, e naau oki ratou ravarai i tiaki; e te nuku o te rangi, tei akamori ia koe.

7 Ko koe te Atua ko Iehova, ko tei iki ia Aberama, e naau aia i arataki mai mei Ura mai i o te Kaledea, e naau i tapa i tona ingoa ia Aberahama;

8 E kua kite atura koe i tona ngakau i te pikikaa kore ki mua i to aroaro ra, e kua papau i te koreromotu kiaia ra, e oronga mai i te enua o te ngati Kanaana, to te ngati Heta, to te ngati Amori, e to te Perizi, e to te ngati Iebusi, e to te Geregasi, e oronga mai no tona ra uanga, e kua akatupu koe i taua au tuatua naau ra; no te mea e tuatua-tika taau:

9 E kua akara koe i te tumatetenga anga o to matou ai metua i Aiphiti, e kua akarongo i to ratou aue i te Tai Muramura ra;

10 E kua akakite i te au akairo e te au ravenga taka ke ki runga ia Pharao, e tona katoa ra au tavini, e ki runga katoa i te tangata tini o tona enua; kua kite oki koe e, e ravenga parau ta ratou ia ratou ra. Rauka iora toou ingoa mei tei teianei rai rā.

11 Kua mavete iora te tai ia koe ki mua i to ratou aroaro, aere ua atura ratou na rotopu i te tai ra, i runga i te one marō; e kua titiri iora koe i te aronga i takinga-kino mai ia ratou ki raro i te moana, mei te toka ki raro i te au vai maata ra.

12 E kua arataki oki koe ia ratou i te pou tumurangi i te ao; e i te po ra i te pou ai, ei akamārama i to ratou arataa kia aere ratou ra.

13 E kua eke mai oki koe ki raro ki runga i te maunga ra i Sinai, e kua tuatua mai koe kia ratou i runga i te rangi ra, e kua oronga mai koe i te au tuatua-tau tikai no ratou e te au ture mou, te au akonoanga meitaki, e te au akauenga ra;

14 E kua akakite mai kia ratou i to sabati tapu ra, e kua tuku mai i te au akauenga, e te au akonoanga, e te au ture, i to tavini ra ia Mose;

15 E kua oronga mai i te kai no te rangi mai i to ratou pongi anga, e kia kaki vai ratou, kua oronga mai i te vai na ratou no roto i te mato; e kua tuatua mai kia ratou kia aere ratou ki roto noo ei i te enua, taau i taputou e oronga mai no ratou.

16 Kareka ratou, e to matou ai metua, e ravenga parau ta ratou, e kua akamāro ketaketa akera i to ratou au kaki, kare akerai i akarongo i taau au akauenga ra.

17 Kare akerai i mako, kare oki i akamaara i taau au ravenga taka ke i raveia e koe i rotopu ia ratou; akamāro ketaketa akera ra i to ratou au kaki, e i to ratou meameaau anga kua akono i tetai rangatira kia oki ki to ratou ao anga ra: kareka koe, e Atua koe, e akakore mairai i te ara, e te aroa ua, e te akaperepere mai, kare rava e riri vave, e te takinga-meitaki maata, kare akerai koe i akaruke mai ia ratou.

18 E kia anga oki ratou i te punua puakatoro akato na ratou, e kia karanga ra e, Ko to atua teia tei arataki mai ia koe mei Aiphiti mai, e maata rava akera oki ta ratou au akakokoanga ia koe;

19 Kare akerai koe i akaruke ia ratou i te medebara, no toou aroa tumatatini: kare rai taua pou tumurangi ra i akaruke mai ia ratou i te ao, ei arataki ia ratou na te arataa; e te pou ai oki i te po, ei turama no ratou, i te arataa ta ratou i aere ra.

20 Kua oronga mai oki koe i toou Vaerua meitaki ei ako mai ia ratou, e kare oki i karapiiia e koe taau māna i to ratou vaa, e kua oronga mai oki koe i te vai ta ratou i kaki.

21 E a ngauru oki oou mataiti i te angai anga mai ia ratou i te medebara, kare rava ratou i ngere; kare akerai to ratou kakau i piro, e kare to ratou vaevae i ē.

22 E kua oronga mai oki koe i te au basileia ra e te pa enua no ratou, kua tua takiriia e koe tei ia ratou: tei ia ratou te enua o Sihona, e te enua o te ariki o Hesebona, e te enua o Oga ariki no Basana.

23 E kua akamaata oki koe i ta ratou au tamariki mei te au etu o te rangi ra, e kua arataki koe ia ratou ki te enua taau i tuatua mai ki to ratou ai metua, e aere ratou ki roto noo ei.

24 Kua aere atura oki te au tamariki ki roto, e kua noo i taua enua ra, e kua vi iora to te enua ia koe i mua ia ratou, i te ngati Kanaana, e kua tuku mai koe ia ratou i to ratou au rima, to ratou ui ariki, e te tangata tini o te enua ra, kia rave ratou i ta ratou i anoano ra.

25 E aronga oire ketaketa tei pou ia ratou, e te enua kai maata; e kua noo i te au are i ki i te au mea memeitaki katoa, te au ruavai kua oti i te koia, te kainga vine, e te kainga olive, e te au rakau kai e manganui: kua kai iora oki ratou, e merengo akera, e poria atura, mareka rava akera ratou i to takinga-meitaki maata ra.

26 Kare rai ratou i akono, e kua meameaau iora ratou ia koe, akaruke iora i taau ture ki muri i to ratou tua, e kua ta i te au peroveta naau, tei ako mai ia ratou, kia anga mai ratou ia koe, maata ua atura ta ratou akakokoanga ia koe ra.

27 I tuku ei koe ia ratou ki te rima o to ratou au enemi, ko tei taeko mai ia ratou: kia rokoia ra ratou e te tumatetenga, kua kapiki atu ratou kia koe, e kua akarongo mai koe i runga i te rangi ra: e no to aroa tumatatini, kua oronga mai koe i te au akaora no ratou, ko tei akaora ia ratou i te rima o to ratou au enemi.

28 E au iora to ratou, kua oki akaou ratou e rave i te kino ki mua ia koe: i vaooiaʼi ratou e koe ki te rima o to ratou au enemi, tei tutara ki runga ia ratou: kia oki ra ratou, e kia kapiki atu kia koe ra, kua akarongo mai koe i runga i te rangi; e manganui toou akaora anga atu ia ratou, no toou ra aroa;

29 E kua ako atu oki ia ratou ei akaoki mai ia ratou ki te ture naau ra: e ravenga parau ra ta ratou, e kare i akarongo i taau au akauenga ra, kua ara ra ratou i taau au tuatua-tau, (kia rave oki te tangata i te reira, ka ora ïa aia i te reira;) kua kiriti iora i te pakuivi, e kua akaketaketa i to ratou kaki, kare akerai i akarongo.

30 E manganui rai toou mataiti i te akakoromaki anga ia ratou, e te ako anga oki ia ratou i te Vaerua noou i te au peroveta naau ra; e kare akerai ratou i ariu mai i te taringa: no reira koe i tuku ei ia ratou ki roto i te rima o te au tangata no te pa enua.

31 No toou ra aroa maata, kare akera koe i tairiiripoti rava ia ratou, e kare oki i akaruke ia ratou; e Atua takinga-meitaki oki koe e te aroa.

32 E teianei, e to matou Atua, te Atua maata, te ririnui e te matakuia, ko tei akono i te koreromotu e te aroa ra, auraka kia iti a koe te au tumatetenga katoa i rokoia mai ei matou nei, to matou ui ariki, to matou aronga mana, e to matou kau taunga nei, e to matou au peroveta, e to matou ai metua, e i runga katoa i toou ra iti-tangata, mei te tuatau mairai o te au ariki o Asura ra e tae rava akenei ki teianei rā.

33 E tuatua-tika taau i te au mea katoa i apaiia mai ei ki runga ia matou nei; kua rave oki koe i te tika, kua rave ra matou i te kino:

34 Kare oki to matou ui ariki, to matou aronga mana, to matou kau taunga, e to matou ai metua, i akono i taau ture, kare oki i akarongo i taau au akauenga, e taau ra au tuatua-akakite i taau i akakite mai kia ratou ra.

35 Kare oki ratou i akarongo ia koe i to ratou ra basileia, taau, i to takinga-meitaki maata, i oronga mai no ratou ra, i roto oki i taua enua maata e te kai meitaki, taau i tuku mai ki mua ia ratou ra, kare ua ratou i akaruke i ta ratou au ravenga kino.

36 I na matou i teianei rā kua riro ei tavini, e te enua taau i o mai ki to matou ai metua, kia kai ua ratou i te ua o te reira, e to reira meitaki, i na, kua riro matou ei tavini i taua enua nei.

37 E kua ua iora ïa i te kai maata na te au ariki i tukuia mai e koe ki runga ia matou nei, no ta matou nei au ara: e te tutara nei oki ratou ki runga i to matou nei au kopapa, e ta matou nei au puaka, te rave nei i ta ratou i anoano; e tumatetenga maata oki to matou.

38 E no taua au mea katoa ra kua papau matou i tetai koreromotu maroiroi, e kua tata; e na to matou aronga mamaata, te au ngati Levi, e te kau taunga, i topiri.