Koheleta

10 NO te rango mate i kino ei e i pirau ei te manongi a te tangata iro-manongi ra; koia katoa te manga tuatua neneva okotai ra i te tangata rongonui i te pakari e te ngateitei.

2 Te ngakau o te tangata pakari, tei tona rima katau ïa; te ngakau o te neneva ra, tei tona kaui ïa.

3 E kia aere ua taua neneva ra na te arataa ra, te ngere ua ra aia i te pakari, e kua karanga ki te tangata katoa e, kua neneva aia.

4 Kia tupu te riri o te tangata tutara ia koe ra, auraka e akaruke i to ngai; tei te tuku maru ua oki e anga ai te riri maata rava.

5 Teia oki tetai kino i kitea e au i raro ake i te rā nei, e ē ïa no te ariki uaorai:

6 Te akateitei roaia nei te neneva ra, e te noo nei te aronga apinga nui ki te ngai akaaka.

7 Kua kite au i te aronga tavini i te na runga anga i te oroenua, e te ui ariki i te aere ua anga na raro i te enua mei te tavini.

8 Ko tei ko i te vaarua ra, nana uaorai e topa ki roto; e tei vavaʼi i te koro ra, e kakatiia aia e te ovi.

9 Ko tei apai ke i te toka ra, e paruparu aia i te reira, e ko tei pāpā i te vaie ra, e riro i te pepe.

10 Te mania ra te auri, e kare i akakinaia te mata ra, kia akamaata aia i te ririnui i reira; na te pakari ra e akakite mai i te ravenga.

11 Kua kakati ua mai te ovi, kare i akarekarekaia: kare e puapinga to te akarekareka i reira.

12 E kiteia mai te tua tua a te tangata pakari; na te vaa ra o te neneva ra e apuku iaia uaorai.

13 Neneva te akamataanga o te tuatua o tona vaa, e te openga o tana tuatua, ko te neneva kino ïa.

14 E akamaataia ta te neneva ra tuatua; kare oki e tangata i kite i te tupu a muri ake: e tika oki iaai kia akaite iaia i te ka tupu a muri ake?

15 Te roiroi ra te neneva i tana uaorai angaanga; kare oki aia i kite i te arataa kia aere ki te oire.

16 E ae oki koe e tera ra enua, e tamaiti mea-ngiti toou ra ariki, e te kaikai ra te au ariki ki o ou ra i te popongi.

17 E ao toou, e tera ra enua, tei riro toou ariki ei tamaiti na te aronga mana, kia kaikai te au ariki ki o ou ra i te tuatau tikai ra, ei akamatutu, auraka ei akakona anga!

18 Tei te akaruke takiri e pe ei te are, e tei te akatau o te rima ra e tuturu ei te are.

19 I akonoia te kaingakai ei akatupu i te kata, e rekareka te aronga e ora nei i te wina: tei te moni ra e raukaʼi taua au mea katoa ra.

20 Auraka e tao i te ariki, auraka i roto i toou manako, auraka oki e tao i te tangata mana i roto i toou ra pia moe: na tetai manu o te reva e apai i taua reo ra, e na tetai mea peau ra e akakite i taua tuatua ra.