Ieremia

39 TAE akera ki te iva o te mataiti o te ariki o Iuda ra o Zedekia, e te ngauru o te marama, i tae mai ei te ariki o Babulonia ra ko Nebukanesa, e te nuku katoa nana, ki Ierusalema, e kua akapini maira.

2 E tae akera ki to Zedekia ra mataiti okotai ngauru ma tai, i te ao o te marama, i te iva oki o te rā i taua marama ra, i ngaangaaʼi taua oire ra.

3 Kua tomo iora te ui ariki katoa ki o te ariki o Babulonia ra ki roto, e kua noo iora ki te ngutupa i rotopu ra, Ko Neregala-sarezara, ko Samagara-nebo, ko Saresikima, te rangatira o te au eunuka, ko Neregala-sarezara, te rangatira o te aronga pakari, e te aronga katoa i toe i te ui ariki ki o te ariki o Babulonia ra.

4 E kite akera te ariki o Iuda ra ko Zedekia, e te au toa katoa ra, ia ratou, ati iora ratou, aere atura ki vao mai i taua oire ra i te po, na te kainga o te ariki ra, na te ngutupa i rotopu i nga patu e rua ra: aere atura aia na te pae o te Araba ra.

5 Kua arumaki atura te nuku o te Kaledea ia ratou, e rokoia aturā Zedekia ki te ngai mataataa i Ieriko ra: kua opu iora ratou iaia, e kua arataki maira ratou iaia ki te ariki o Babulonia kia Nebukanesa, i Ribila, i te enua o Hamata ra; e kua akautunga atura aia kiaia.

6 Kua ta iora te ariki o Babulonia i nga tamariki a Zedekia i Ribila, ki mua tikai i ona mata: kua ta katoa iora te ariki o Babulonia i te ui ariki katoa o Iuda ra.

7 E kua oiti akera aia i nga mata o Zedekia, e kua tapeka iora aia iaia ki te tapeka veo, e apai iaia ki Babulonia ra.

8 Kua tutungi iora te Kaledea i te are o te ariki, e te au are o te au tangata ra, ki te ai, e kua vavaʼi iora i te au patu i Ierusalema.

9 E te toenga o te tangata tei toe i roto i te oire, e te aronga i aere takere atura kiaia ra, e te aronga katoa i toe i taua au tangata ra, apaiia atura e te rangatira o te aronga vaeau e Nebuzaradana ki Babulonia.

10 Ko te au tangata rikiriki ra, tei kore rava a ratou, kua vaooia ïa e te rangatira o te aronga vaeau e Nebuzaradana, i te enua ra i Iuda, e kua oronga mai oki i te au kainga vine, e te au kainga katoa, no ratou i taua rā ra.

11 Kua poroaki maira oki te ariki o Babulonia ra ko Nebukanesa ki te rangatira o te aronga vaeau ra kia Nebuzaradana, ia Ieremia, na ko maira,

12 Ka rave koe iaia, ka akara meitaki atu iaia, auraka rava e takinga-kino atu; ko tana ra e tuatua mai kia koe ra, e pera atu koe kiaia.

13 Kua tono akera te rangatira o te aronga vaeau ra ko Nebuzaradana, e ko Nebusabana, te rangatira o te au eunuka, e ko Neregala-sarezara, te rangatira o te aronga pakari, e te ui ariki katoa ki o te ariki o Babulonia;

14 Kua tono oki ratou e kua rave maira ia Ieremia, mei roto mai i te paepae o te are tapeka anga ra, e kua tuku atura iaia kia Gedalia, te tamaiti a Ahikama, te tamaiti a Saphana, kia arataki iaia ki te ngutuare: noo ua iora aia i rotopu i te au tangata ra.

15 Tae maira oki te tuatua a Iehova kia Ieremia, i tona tapeka angaia ki roto i te paepae o te are tapeka anga ra, na ko maira,

16 Aere ka karanga atu kia Ebede-meleka ngati Kusa, na ko atu, Te na ko mairā Iehova Sabaota ra, te Atua o Iseraela; I na, ka akatupu au i taku tuatua ki runga i teianei oire kia kino, auraka kia meitaki; e ka tupu ïa oki ki mua i to aroaro i taua rā ra.

17 E akaora ra au ia koe i taua rā ra, te tuatua mairā Iehova: kare oki koe e orongaia atu ki te rima o te au tangata taau i mataku ra.

18 E akaora tikai oki au ia koe, e kare koe e inga i te koke, e riro ra toou ora ei apinga noou: no te mea kua irinaki koe iaku nei, te tuatua mairā Iehova.