Salamo

41 E AO to tei akono mai i te tangata putaua ra: ka akaoraia aia e Iehova i te tuatau tumatetenga ra.

2 Na Iehova aia e tiaki, e akaora oki iaia, e akameitakiia aia i te enua nei: auraka ra koe e tuku iaia ki te anoano o tona au enemi.

3 Na Iehova e akamaroiroi mai iaia i tona roi maki ra; e naau e eeu i tona roi katoa i te maki angaia ra.

4 Kua tuatua oki au, E Iehova, e aroa mai iakau; e akaora iaku, kua ara oki au ia koe ra.

5 E tuatua kino ta toku au enemi iaku, Aea ra aia nei ka mate atu ei, e ngaro atu tona ingoa?

6 E kia aere mai tetai e akara iaku ra, kua tapikipiki ua mai tana tuatua: te akaputuputu ra tona ngakau i te kino iaia uaorai; e kia riro ke aia ra, e tuatuaʼi.

7 Te aronga katoa i makitakita mai iaku ra, te koumuumu katoa iaku; te kimi ra i te ravenga e kino ei au ra, na ko maira,

8 E kino maata teia e maringi ua mai ki runga iaia, e tena ngai tana i moe ra, kare ïa e tu akaou mai.

9 E ko toku oa akaperepere nei oki i irinakiia e au ra, tei kai katoa i taku nei kai, ko tei akateitei i tona poo vaevae iaku nei.

10 Ko koe ra, e Iehova, e aroa mai iaku, e akatu iaku ki runga, kia tutaki atu au ia ratou.

11 Ko te mea teia i kite ei au e, kua akaperepere mai koe iaku, ko toku enemi nei kare rai aia i maeva ki runga iaku.

12 Kareka au nei, e tauturu mai koe iaku i taku nei apa kore, ka tuku oki koe iaku nei ki mua i to aroaro e tuatau ua atu.

13 Kia akameitakiia te Atua o Iseraela ra ko Iehova, mei tupua roa mairai e tuatau ua atu. Amene, e Amene!