Levitiku

19 KUA tuatua mairā Iehova kia Mose, na ko maira,

2 E karanga atu ki te uipaanga katoatoa a te tamariki a Iseraela ra, e na ko atu kia ratou, Kia tapu kotou, no te mea te tapu nei oki au, ko to kotou Atua ra ko Iehova.

3 E akangateitei te tangata katoa i tona metua vaine, e tona metua tane; e akono oki i toku au sabati: ko au to kotou Atua ra ko Iehova.

4 Auraka kotou e ariu ki te au idolo, auraka kotou e anga i te au atua akato: ko au to kotou Atua ra ko Iehova.

5 E kia apai kotou i te atinga au kia Iehova ra, ei apai anga marekaia mai ta kotou.

6 Ei te rā e apaiiaʼi e kotou na e kaiiaʼi, e kare ra, kia popongi ake: te toe ra tetai vaʼi kia tae ki te po toru ra, e taʼuia ki te ai.

7 E kia kai uaia ki te po toru ra, e mea viivii ïa; kare e marekaia mai.

8 E te tangata i kai ra, ei runga iaia uaorai tana ara iri ei, no te mea kua akanoa aia i te mea tapu a Iehova; ka tipu keia te reira tangata i tona iti-tangata ra.

9 Kia kokoti kotou i te mou o to kotou enua na, auraka kotou e kokoti akapou takiri rava i te poo o ta kotou koro, e auraka oki kotou e koi i te toenga kai akaū na kotou na. 10 Auraka oki koe e koi i te toenga i to kainga vine ra, auraka oki koe e koi i te vine i topa i to kainga vine ra; ka vaoo koe i te reira na te putaua, e na te uarere: ko au to kotou Atua ra ko Iehova. 11 Auraka kotou e keia, auraka e tapikipiki, auraka e pikikaa ki tetai ki tetai.

12 Auraka kotou e taputou pikikaa i toku nei ingoa, i te akanoa anga i te ingoa o toou Atua: ko au ko Iehova.

13 Auraka koe e takingakino i to tangata tupu, auraka oki e aō: te tutaki a te tangata i ouia ra, auraka e vaoo i o ou kia ao te po ra.

14 Auraka koe e akakino i te turi, auraka oki e tuku i te tukiaanga ki mua i te matapo, kia mataku ra koe i toou Atua: ko au ko Iehova.

15 Auraka kotou e akatika i te tuatua-tika kore i te akava anga: auraka koe e uri ki te tangata rikiriki, auraka oki e tatomo atu ki te tangata mamaata: ka akava koe i to tangata tupu ma te tuatua-tika ra.

16 Auraka koe e monomono korero aere na roto i to iti-tangata na: auraka oki koe e tu ki runga ei tapepe pikikaa i to tangata tupu kia mate: ko au ko Iehova. 17 Auraka koe e riri ua i to taeake i roto i to ngakau; e ako ra koe i to tangata tupu, auraka e vaoo iaia kia ara ua na.

18 Auraka koe e akaoko, auraka e akamopuku i te tamariki a toou iti-tangata na, e aroa ra koe i to tangata tupu mei toou aroa ia koe uaorai na; ko au ko Iehova.

19 Ko taku ra au akonoanga ta kotou e akono. Auraka koe e vaoo ua i taau au puaka e manganui te tu kia kairo pu ua na; auraka koe e ruru i taau koro ki te ua iro uaia ra: auraka oki koe e kakau ki te kakau orongā e te uru-mamoe i irokia ra. 20 Ko te moe ua i te vaine tavini, i momokoia i te tane ra, kare i okoia, kare oki i tataraia; e pāpāia ïa: kare raua e mate takiri rava, no te mea kare te vaine i matara.

21 E ka apai taua tangata ra i tana tutakingaara kia Iehova ra, ki te ngutupa o te Are uipaanga ra, ei mamoe toa tana tutakingaara e apai. 22 E na te taunga e apai i taua mamoe toa tutakingaara ra ei tapokiangaara nana ra ki mua i te aroaro o Iehova, i tana ara tana i rave ra: e ka akakoreia tana ara i raveia e ia ra. 23 E kia tae kotou ki te enua, kia tanu kotou i te au rakau ravarai nei ei kai, e tuatua kotou i to reira kai e, e mea peritome koreia ïa: e riro te reira ei mea peritome koreia ia kotou e kia toru ake mataiti; kare ïa e kaingaia atu.

24 E kia tae ki te a o te mataiti, e akatapuiaʼi to reira au kai katoa ra, ma te akameitaki ia Iehova.

25 Kareka kia tae ki te rima o te mataiti ra, ka kai ïa kotou i to reira au kai ra, kia ua mai oki taua au rakau ra i to ratou ua na kotou: ko au ko to kotou Atu ra ko Iehova. 26 Auraka kotou e kai i te kai ma te toto: auraka kotou e purepure, e te akara ki te au tumurangi. 27 Auraka kotou e mangore takatii i te rauru o to kotou mimiti, auraka oki e rave kino i to kotou kumikumi.

28 Auraka kotou e kotikoti ito kotou kopapa i te tangata mate ra; auraka rave oki ei tata i tataia ki runga ia kotou na: ko au ko Iehova.

29 Auraka koe e akariro i taau tamaine ei akaturi; ko te riro aea te enua i te akaturi, e ki akera te enua i te kino.

30 E akono kotou i toku au sabati, e e akatapu i toku ngai-tapu ra: ko au ko Iehova.

31 Auraka kotou e akono i te au vaerua kino ra, e auraka e kimi i te purepure, kia viivii kotou i te reira: ko au ko to kotou Atua ra ko Iehova.

32 E tu koe ki runga ki mua i te aroaro o te upoko inaina, e akangateitei koe i te tangata metua; E e mataku oki koe i toou Atua: ko au ko Iehova.

33 E kia noo tuitarere mai te tangata ke i o ou, i to kotou na enua, auraka kotou e takinga-kino iaia.

34 Kia riro ra te tangata ke e noo i o kotou na mei te tangata tupu katoa ia kotou, e aroa oki koe iaia mei te aroa ia koe uaorai; e tangata ke katoa oki kotou i te enua ra i Aiphiti: ko au ko to kotou Atua ra ko Iehova.

35 Auraka kotou e akatika i te tuatua-tika kore i te akava anga; i te aite anga i te roa, te teiaa, e te rai.

36 Ei aite-akateiaa tika, ei toka tika, ei epha tika, e te ina tika, ta kotou: ko au to kotou Atua ra ko Iehova, ko tei arataki mai ia kotou mei te enua maira mei Aiphiti.

37 E teianei e akono kotou i taku ra au akonoanga katoa, e taku au tuatua-tau katoa, e rave ïa kotou: ko au ko Iehova.