Maseli

10 TE au Maseli na Solomona. E tamaiti kite ra, e rekarekaanga ïa na te metua tane: kareka te tamaiti neneva ra, e aueanga ïa na tona metua vaine.

2 E apinga rauka anga kino ra, kare ïa e puapinga e rauka: kareka te mea tika ra, e ora oki te mate i te reira.

3 Kare te vaerua o te aronga tuatua-tika e paeua ia Iehova: kareka te apinga a te aronga kino ra, e ravea keia ïa e ia.

4 E putaua tona to tei angaanga ma te rima akatau: kareka te rima o te maroiroi ra, e apingaia ïa.

5 Ko tei akaputuputu i te tuatau mou ra, e tamaiti pakari ïa: ko tei moe ua i te mou ra, e tamaiti akatupu akama ïa.

6 Te vai ra te meitaki ki runga i te upoko o te tuatua-tika ra: te tapokiia ra te vaa o te aronga kino e te takinga-kino.

7 E akameitakiia te aronga tuatua-tika kia maaraia ra: kareka te ingoa o te aronga kino ra, ka pe ïa.

8 Tei pakari te ngakau ra, e āriki mai ïa i te akauenga: kareka te neneva tuatua ua ra, ka inga ïa.

9 Tei apa kore tona aerenga, te aere ra ïa ma te mataku kore: ko tei akamingi ra i tona aerenga, e akakiteia ïa.

10 Ko tei kamokamo i tona mata, kua akatupu ïa i te aue: kareka te neneva tuatua ua ra, ka inga ïa.

11 Te vaa o te tangata tuatua-tika ra, e punavai ïa no te ora: te tapokiia ra te vaa o te aronga kino ra e te takinga-kino.

12 Na te riri e akatupu i te taumāro: kareka te aroa ra, e tapoki ïa i te au ara katoa ra.

13 Tei te vaa o te tangata kite ra te tuatua pakari i te kitea anga: e te vai ra te pāpā no te tua o te neneva ra.

14 Te akaputu ra te aronga pakari i te kite: ko te mate ra tei vaitata mai i te vaa o te neneva.

15 Te apinga a te tangata taoiau ra, ko tona ïa oire matutu: ko te mate ra o te aronga ao ra, ko to ratou ïa putaua.

16 No te ora te angaanga a te aronga tuatua-tika ra: ko te apinga a te aronga kino kia rauka ra, no te ara ïa.

17 Ko tei tāpu i te apii ra, tei te ara ora ïa: ko tei akaruke ra i te ako ra, kua aere ke ïa.

18 Ko tei tapokipoki i te makitakita ra, e vaa pikikaa tona: ko tei tuatua ra i te tuatua akakino ra, e neneva ïa.

19 Te maata ra i te tuatua ra, kare e kore te ara: ko tei tāpu ra i tona vaa, e pakari tona.

20 Te arero o te aronga tuatua-tika ra, mei te ario tamāia ra ïa: kareka te ngakau o te aronga kino ra, kare ïa e puapinga.

21 E manganui te akaangaiia e te vaa o te aronga-tuatua tika ra: te mate ua nei ra te neneva i te kite kore.

22 Na Iehova te meitaki i apingaʼi te apinga, kare oki e kapiti katoaia mai te kino i te reira.

23 Mei te neneva e navenave i te rave anga i te mea kino ra: koia katoa te rave i te meitaki ra i te tangata kite.

24 Ka rokoia mai te tangata kino i tana e mataku ra: e akatikaia maira te inangaro o te aronga tuatua-tika ra.

25 Mei te puaioio e peke ra, koia katoa te tangata kino, kare ra ïa: e akatinamouia ra te tangata tuatua-tika e tuatau ua atu.

26 Mei te vinega i te nio ra, e mei te auai i te mata ra, koia katoa te tangata moe ua i te aronga i tono iaia ra.

27 Tei te mataku ia Iehova e roaʼi to te tangata nei puke rā: e akapotoia ra te mataiti o te aronga kino.

28 Ta te aronga tuatua-tika e tapapa ra, e rekareka ïa openga: ko tei irinakiia ra e te aronga kino ra, ka kore ïa.

29 E punanga ketaketa te arataa o Iehova no te aronga apa kore: ko te mate ra to te aronga i rave i te tuatua kino ra.

30 Kare rave te aronga tuatua-tika ra e ngaueue: kare ra te aronga kino e noo ki te enua.

31 Te tuatua pakari tei tukuia mai e te vaa o te tangata tuatua tika ra; ko te arero ra o te tangata māro ra, e kokoti keia ïa.

32 Kua kite te vaa o te aronga tuatua-tika ra i te tuatua e tau ei ra: ko te vaa ra o te aronga kino ra, e māro ïa.