Maseli

23 KIA noo koe e te tutara katoa ki te kaingakai ra, ka akamanako marie i tei tukuia mai ki mua i to aroaro na:

2 Te akavaitata ua ra oki koe i te matipi ki to karaponga me kai maata rava koe:

3 Auraka e kaki atu i tana ra au kai memeitaki ra; e kai pikikaa anake oki te reira.

4 Auraka e akaope i te ririnui ki te apinga kia maata; auraka e irinaki ki toou uaorai pakari.

5 Ka anaana rai koe i o mata ki runga i te mea e kare nei ïa? te rave nei oki te reira i te peau; te rere ke nei mei te aeto ki runga i te rangi ra.

6 Auraka koe e kai i te ma nga a te karapii, auraka koe e kaki i tana ra au kai memeitaki ra.

7 Ko tona ra manako i roto i tona ngakau, ko koia uaorai ïa: e riro aia i te karanga mai e, Ka kai, ka inu; kare ra tona ngakau i tae kia koe.

8 Taua manga mea ngiti taau i kai ra, e ruakiia ïa e koe ki vao; moumou atura taau tuatua akameitaki ra.

9 Auraka e tuatua ki mua i te aroaro o te neneva ra; e riro aia i te akavaavaa i te tuatua pakari naau ra.

10 Auraka e kiriti i te kena kainga taito ra: auraka e kai i te kainga o te aronga matiroeroe;

11 Ko to ratou oki Akaora, e ririnui tona; e nana e akatika i ta ratou tuatua ia koe ra.

12 E tavaitai i to ngakau ki te apii, e to taringa ki te tuatua kite ra.

13 Auraka e tāpu i te ako ki te tamaiti: kia pāpā koe iaia ki te rakau ra, kare ïa aia e mate.

14 Kua pāpā koe iaia ki te rakau ra, kua ora tona vaerua ia koe e kare e tae ki ade.

15 E taku tamaiti e, kia pakari toou ra ngakau, ka rekareka ïa toku ngakau, toku uaorai nei rai.

16 Ka rekareka to roto iaku nei, kia tuatua toou vaa i te tuatua tika.

17 Auraka to ngakau e vareae i te aronga rave ara: kia noo ra ma te mataku ia Iehova e po ua atu te rā;

18 Te vai ra oki te openga, kare oki taau e irinaki ra e akakoreia.

19 E akarongo mai, e taku tamaiti, kia pakari koe, e e arataki i to ngakau na te arataa.

20 Auraka koe e kapiti katoa ki te aronga i kona i te wina ra: ki roto i te aronga e kaituauau i te puaka.

21 Ko te konā kava oki, e te kaki nui ra, ka putaua ïa; e na te moe ua e akakakau mai ki te kakau ngaengae.

22 E akarongo mai i to metua tane i anau ei koe ra, e auraka e akavaavaa i to metua vaine me ruaine aia ra.

23 E oko i te tuatua-mou, e auraka rava e oko akaouia atu; te pakari, e te ako, e te kite.

24 E rekareka maata ïa te metua o te tangata tuatua-tika ra; e tei anau i te tamaiti pakari, e rekareka katoa ïa iaia.

25 E rekareka to metua tane e to metua vaine, e tei anau ia koe ra, ka rekareka ïa.

26 O mai na to ngakau kiaku nei, e taku tamaiti e; e akara marie oki to mata i toku nei au arataa.

27 E tau oki te vaine akaturi ki te vaarua oonu; e te vaine ke ra, mei te vaarua piripiri ïa.

28 Te moetapapa ra oki aia, mei te mea kia rauka te apinga ra; e manganui to roto i te tangata nei i araia iaia.

29 Koai tei aue nei? koai tei mii? koai tei taumāro? koai tei vaavaanunui? koai tei paruparu ara kore ua? toai te mata kutekute?

30 Te aronga noo roa i te inu anga wina ra; ko tei uipa e inu i te wina irokia ra.

31 Auraka e akara i te wina kia muramura mai, kia panapana i roto i te kapu ra, e topa ngoie iora ki raro.

32 Kia tae oki ki te openga ra, e tau tona kakati ki to te ovi, rato atura oki tona kava mei to te vipera ra.

33 E riro oki to mata i te akara i te vaine ke; e tupu oki te manako kino ki roto i to ngakau na.

34 E riro oki koe mei te tangata i moe ki rotopu i te moana ra; mei tei moe ki runga i te kauru tira ra.

35 E riro koe i te karanga e, Kua pāpā mai ratou iaku, kare ra au i mamae; kua ta mai ratou iaku, kare ra au i kite ana; kia ara na au ra, e kimi atu rai au.