Kua ‘Oko Ratou i te Tuatua-Mou’!

“E OKO i te tuatua-mou, e auraka rava e oko akaouia atu.” (Maseli 23:23) I ako ei te tangata pakari ko Solomona. Koi raukaʼi teia kia karangaia ei tuatua mou tika, ka tau tikai ia me e tuatua mou te reira tei kitea i roto i te Tuatua na te Atua, koia te Pipiria. Ka arataki teia tuatua mou ki te ora mutu kore! (Ioane 17:3, 17) Kia kite, ra, e na te raukaanga teia tuatua mou kare ia e aere mai ma te kore e tutaki. Kia puareinga ua tetai i te “oko” i te reira, koia oki, te oronga atinga me kore te akaruke i tetai mea e raukaʼi te reira. (Akaaite ia Mataio 13:45, 46.) Te maata anga o te taime, kare te au tangata e puareinga ua ana i te rave i te reira. Inara, i te au enua e manganui, e maata ua atu te au tangata tataki tai e oko ra i te tuatua mou Pipiria​—te maata anga o te taime ma te tutaki anga maata uaorai.

Ka akara ana, ei akaraanga, i te Au Kite o Iehova i te enua o Ghana. I te tae anga kia Tiunu 1989, te vaira e tere atu i te 34,000 au tangata tataki tai i te reira enua tei mou ra i te tuatua mou Pipiria e te maroiroi ra i te oronga i te reira ki tetai atu. I reira kua tukuia te au arairai anga ture ki runga i te angaanga tutu aere ki te katoatoa. Noatu ra, kua rave ua atu te au tangata ngakau tika i te “oko i te tuatua-mou”​—noatu te au arairai anga ture. Kua akamutu te arairai anga i roto ia Okotopa 31, 1991, e te tae anga ki roto i te 1995, e toru anake e te apa mataiti i muri i te akaatea angaia taua au arairai anga, kua tupu te numero o te Au Kite maroiroi o Iehova i Ghana ki te 46,104! E i teia mataiti kua tupu te numero ki te tere atu i te 52,800.

Eaa tei akakeu i te au tangata ki te tuatua mou o te Tuatua na te Atua? Eaa te au atinga ta etai pae i rave no te “oko i te tuatua-mou”? Ei pau anga, ka akara ana tatou i te au kite anga a te au Kerititiano Ghana e toru.

Akakeuia e te Au Apiianga Pipiria

Ka akara ana tatou na mua i tetai vaine mei te 20 aere mataiti. E orometua tona papa, inara kua iki aia i te akaruke i te akonoanga a tona papa. Te tumu? No tona inangaro i te tuatua mou.

Kua akamarama atu aia e: “I aere mai ana te Au Kite ki to matou kainga ia ratou e atoro aere ra mei tera are i tera are. I muri ake i tetai au uriurianga meangiti kia ratou, kua kite mai au e ko ta ratou e apii ra kua akanoo meitakiia ki runga i te Pipiria. Kua ui au i te au uianga no runga i te au tumu manako mei te Toru Tai, te ai era, te mate kore o te meta, e te rapakauanga akarongo tikai. Kua irinaki pakari au e no roto mai teia au apiianga i te Pipiria. Inara kua tauturu mai te Au Kite iaku kia kite e kare te reira.”​—Ei akakite anga i to te Pipiria manako no runga i teia au tumu manako, e akara ine ia Mareko 13:32; Roma 6:23; Angaanga 10:40; e 1 Korinetia 13:8-10.

Kua tuatua atu te mapu vaine: “Noatu rai, te vaira te patoi anga pakari a toku ngutuare tangata, mei toku papa tikai. Kua manako aia e te arataki keia ra au. Inara, kua kite au e ko taku e apii ra mei te Au Kite o Iehova ko te tuatua mou ia. Kua tauta au i te akakite i teia au mea ki toku papa no roto mai i te Pipiria, inara kare aia e akarongo. Tei kitea mai, kua kino pakari atu te patoi anga.

“Kua tu ngaueue kore ua au. Kua kite au e ko te kite mou tikai anake ua te ka arataki ki te oraanga mutu kore i Parataito, e kua titau au i te mou tamou i te reira. I te rongo anga te Au Kite o te reira ngai i te au manamanata taku e aro atura, kua aere aroa ua mai ratou ki toku tauturu, te akamaroiroianga iaku e te oronga anga i tetai au apinga tei anoanoia e au. Kua akamaara mai teia iaku te au tuatua a Iesu tei kitea ia Ioane 13:35: ‘Ko te mea teia e kite ei te tangata katoa e e pipi kotou naku, kia aroa kotou ia kotou uaorai.’ Kua oonu roa atu toku irinaki anga e te taangaanga ra te Au Kite o Iehova i te akonoanga tika. I muri mai, i te kite anga toku nga metua e kua taui au i toku oraanga kia meitaki atu, kua reka raua i ta raua i kite, e kua taui to raua tu iaku​—no teia i pati toku papa i te Au Kite kia apii i te Pipiria ki toku tungane maata!”

Akapapuanga i te Tuatua Mou kia Koe Uaorai

Te ‘okoanga i te tuatua-mou’ ko tetai akaaoanga katoa ia no etai au mapu tei utuutuia mai e te au metua Kite. Te manako ua ra etai au mapu i te rave i te tuatua mou Pipiria ma te puapinga kore. Me kare ratou e akariro i taua au tuatua mou ra na ratou uaorai, ka manga apikepike i reira to ratou akarongo, ma te tutu ua. (Akaaite ia Mataio 13:20, 21.) Te akakite maira a Nathaniel, e tangata Ghana i tona 30 anga mataiti, e akapeea aia i te ‘oko anga i te tuatua-mou’ iaia e meangiti ra rai.

“Kua apii toku nga metua i te Pipiria kiaku mei toku pepe anga,” i maaraʼi iaia. “Iaku e maata mai ra, kua aru au ia raua ki roto i te angaanga tutu aere, inara kare tikai au i manako ana kia riro mai ei Kite. I muri akera, kua kite mai au e ka anoanoia au kia akara matatio i te au mea naku uaorai.

“Te mea mua, kia papu iaku e ko te Pipiria, kare ko tetai atu puka tapu akonoanga, te Tuatua na te Atua. Na roto i tetai apii naku uaorai, kua kite mai au e ko te puka tapu anake ua te reira tei ki i te au totou taka meitaki tei totou tikaia. Kua apii katoa au e te ki ra te Pipiria i tetai au tuatua mou taineti​—ei akaraanga, te ‘akauta ra te enua ki runga i te kore.’ (Iobu 26:7) Kua tataia teia au tuatua e au tauatini ua atu mataiti i mua ake ka kite ei te au taineti i to tatou solar system. Ko te Atua anake ua te ka rauka i te akauru i te au tangata kia tata i teia au mea!a

“Tei aru mai, kua inangaro au i te kite e ko teea akaaerenga akonoanga te apii ra e te taangaanga ra i te au tuatua mou tei apiiia i roto i te Pipiria. Te apii ra te maata anga o te au akonoanga i te ai era, te Toru Tai, e tetai meta mate kore i te oraanga atu i te mate. Inara kare au i marama ana i teia au apiianga. Kua manako au: Kare ainei e e papa kino tei tuku ra i te rima o tana tama ki roto i tetai pani vai pupu ei utunga? Akapeea, i reira, tetai Atua aroa i te tuku ua anga i tana tamariki ki roto i tetai era ai vera ma te vaoo ua ia ratou kia mamae? Inara, te apii ra te Au Kite o Iehova kia rotai ki te au irava Pipiria mei ia Roma 6:23, tei karanga ra: ‘Te utunga a te ara ko te mate’​—kare ko etai era ai vera. Kua marama tikai au i teia.

“Kua kite katoa au e te umuumu ra te Au Kite o Iehova i te au mema katoatoa kia noo na te au turanga Pipiria e ka akaatea ratou i te katoatoa tei rave tataraara kore i te ara. Te manako katoatoa anga i teia, kua taopenga au e tei te Au Kite o Iehova te tuatua mou, e naku rai i tuku i toku uaorai manako kia riro mai ko au tetai ia ratou. Kua angaanga pakari au kia tau meitaki au no te papetito anga ei Kite.”​—1 Korinetia 5:11-13.

Te akaari maira to Nathaniel kite anga e ka anoanoia te au mapu tei utuutuia mai e te au metua Kerititiano kia “oko i te tuatua-mou.” Kare ratou e tau kia noonoo ua i te aere anga ki te au uipaanga putuputuanga. Mei te Berea i taito ra, ka tau ratou kia ‘kimi i te tuatua i tataia ra, i te tau anga oki i taua tuatua ra, kare e rā i tukua.’ (Angaanga 17:11) Ka anoanoia te taime e te tauta anga, inara ka riro te reira ei akarongo e te irinaki anga ketaketa.​—Akaaite ia Ephesia 3:17-19.

Akavareia e te Akonoanga Pikikaa

Kua vaitata tetai tangata Ghana ko Godwin tona ingoa i te 70 mataiti i tona akaruke anga i te Akonoanga Perepitero e tetai Masonic Lodge. “Te tupu ra tetai au mea i roto i te akonoanga kare au i mareka ana,” i karangaʼi a Godwin. “Ei akaraanga, e maata te au tamaki anga e tupu ra i roto, e te tupu ra rai. I etai taime kua anoanoia te akava kia aere mai kia akaau e te akaoki i te tu mako! Kare au i manako ana e e mea meitaki teia no te au pipi a Karaiti. I reira kua tupu tetai manamanata i rotopu i tetai tangata Perepitero e au. Kua rongo te are akavaanga i te akavaanga e kua akava i tetai atu tangata e kua apa. Inara, kua piripiri tau kore ua te orometua o te akonoanga ki teia tangata e kua tauta i te akaapa iaku ki mua i te putuputuanga katoa! Kua oronga tikai au i toku manako kiaia e kua aere ki vao i te are pure​—e kare rava i oki ana.

“Kua topa tetai tuatau, e kua atoro mai te Au Kite o Iehova i toku kainga. I te akamata anga, kua akarongo ua au no te mea kare au i inangaro i te uri ke mai mei te au tangata tei tuatua no runga i te Atua. Inara kua akamata au i te kite e noatu e e Perepitero au no tetai au ngauru mataiti, e maata taku kare au i kite no runga i te Pipiria. Ei akaraanga, kare rava au i kite ana e te mou ra te Pipiria i te manakonakoanga o te nooanga e tuatau ua atu i Parataito i te enua nei.b E i toku akamata anga i te aere ki te au uipaanga a te Au Kite o Iehova, kua umere maata tikai au i te au tu, e te kakau e te akamaneaanga a te au mapu i rotopu ia ratou. E au tangata tikai teia tei noo tikai na te au kaveinga Pipiria!”

Noatu rai, na te ‘okoanga i te tuatua-mou’ kua umuumuia aia kia rave i etai au akatikatika anga mamae i tona oraanga. I maaraʼi ia Godwin: “E mema au no tetai Masonic Lodge. E noatu kua kiteaia ei taiate akataeake anga tei oronga i te tauturu ki tona au mema, kua akono au i te au peu tei o maira te taangaanga anga i te au katu tangata e te au ivi e te patianga i te tauturu o te au vaerua. Kua tamanakoia te tauturu ra teia au vaerua i te aronga tei piri ra kia ratou kia tupu i te pae vaerua.

“Kua tauturu te au apii iaku kia kite e te rikarika ra te Atua ko Iehova i tetai ua atu o anga ki roto i te angaanga vaerua no te mea ka riro tetai ra ki raro ake i te mana o Satani e tana au vaerua kikino.c Ka rave ua atu ainei au ei mema o te Masonic Lodge ma tana au ravenga purepure katoatoa, me ka akaruke ainei au ma te akamareka ia Iehova? Kua iki au i te mea openga. Kua takore au i te au apinga Freemason katoatoa taku i rauka, pera katoa te au kakau taku i aao ki te au uipaanga Lodge. Kua kite au i te tuatua mou o ta Iesu taputou i tona karanga anga, ‘Ka akarangatira te tuatua-mou ia kotou’! (Ioane 8:32) I teianei te mataora nei au i te akakitekite i te au mea taku i apii mai ki tetai pae atu. Kare roa oku manako no te oki ki muri.”

E manganui te au tauatini aronga ngakau tika tei rave i te au atinga maata e raukaʼi i te “oko i te tuatua-mou.” Mei te au Kerititiano e toru tei uriuriia ake nei, kare o ratou manako no te oki ki muri no runga i te au taui anga ta ratou i rave. Kua oronga te tuatua mou Pipiria kia ratou “te meitaki tumu no ratou uaorai a muri atu, kia rave ratou i te ora mutu kore.” (1 Timoteo 6:19) Te reira “ora mutu kore” e tana au akameitakianga katoatoa ka aru mai ka riro katoa noou ma te mutu kore me ka ‘oko koe i te tuatua-mou.’

[Au Tataanga Rikiriki i Raro]

[Tutu i te kapi 9]

Nathaniel

[Tutu i te kapi 9]

Godwin