Deuteronomi

5 KUA kapiki aturā Mose kia Iseraela katoatoa, e kua karanga atura kia ratou, E akarongo mai, e Iseraela, i te au akonoanga, e te au tuatua-tau, taku e karanga atu ki to kotou au taringa i teianei rā; kia kite oki kotou, e kia mou piri tikai, e kia rave i taua au tuatua nei.

2 Kua papau mai to tatou Atua ra ko Iehova i te koreromotu kia tatou i Horeba.

3 Kare a Iehova i papau mai i taua koreromotu nei ki to tatou ai metua, kia tatou ra, ko tatou ravarai e ora ua nei i teianei rā.

4 I rotopu tikai i te ai ki runga i te maunga ra ta Iehova tuatua anga mai kia kotou, i te mata e te mata,

5 (Tu ua iora au i rotopu ia kotou e Iehova i reira, ei akakite ia kotou i te tuatua a Iehova; mataku iora oki kotou i te ai, kare akera oki i tae ki taua maunga ra;) na ko maira,

6 Ko au ko toou Atua ra ko Iehova, ko tei arataki mai ia koe mei te enua maira mei Aiphiti, mei te ngutuare i tavini ei ra.

7 Auraka rave toou ei atua ke atu iaku nei.

8 Auraka rava koe e rapa i te idolo akatikitikiia noou, e te tu no tetai mea i runga i te rangi ra, e no tetai mea i raro i te enua nei, e no tetai mea o te moana i raro ake i te enua ra:

9 Auraka rava koe e tupou ki raro ia ratou, auraka oki e akamori atu ia ratou: e Atua vareae oki au ko te Atua noou nei ko Iehova, i te tutaki anga i te ara a te aronga metua ki runga i te tamariki, e tae ua atu ki te toru e te a o te uki, kia kore ratou e inangaro mai iaku ra;

10 E te atoa anga atu i te aronga i inangaro mai iaku, e kua akono i taku au akauenga, e tausani ua atu.

11 Auraka koe e akaiki puapinga kore ua i te ingoa o to Atua ra ko Iehova: kare oki a Iehova e akatika iaia i tei akaiki puapinga kore ua i tona ra ingoa.

12 E akono i te rā sabati kia akatapuia, ta to Atua oki ta Iehova i akaue mai ia koe ra.

13 E tika ia koe kia angaanga, e kia rave i taau au angaanga katoa, i nga rā e ono ra,

14 Kareka te rā itu ra ko te sabati ïa no to Atua ra no Iehova; auraka rava koe e rave i te angaanga i te reira rā; ko koe, e taau tamaiti, e taau tamaine, e toou tavini tane, e toou tavini vaine, e taau puakatoro, e taau asini, e taau au puaka katoa ra, e to tangata ke katoa i o ou ra; kia akangaroi katoa oki toou tavini tane e to tavini vaine, mei ia koe katoa uaorai.

15 E akamaara io na oki koe e, e tavini katoa koe i te enua ra ko Aiphiti, e na to Atua ra na Iehova koe i arataki mai mei reira maira, i te rima marōrō, e te rima i akatikaia ra; i akaue ei to Atua ra ko Iehova ia koe e, e akono i te rā sabati.

16 E akangateitei atu i to metua tane, e to metua vaine, (ta to Atua ra ta Iehova i akaue mai kia koe ra,) kia akaroaia toou puke rā, e kia meitaki koe, i te enua ta toou Atua ta Iehova e oronga noou na.

17 Auraka rava koe e ta ua. 18 Auraka rave koe e akaturi.

19 Auraka rave koe e keia.

20 Auraka rava koe kia riro ei kite pikikaa i to tangata tupu na.

21 Auraka rave koe e morimori i ta to tangata tupu ra vaine, auraka oki koe e morimori i te are o to tangata tupu ra, e tona kainga, e tona tavini tane, e tona tavini vaine, tana puakatoro, e tana asini, e te au mea ravarai a to tangata tupu ra.

22 I tuatua mai a Iehova i taua au tuatua nei kia kotou ravarai, ma te reo maata, i runga i te maunga ra, i rotopu i te ai, e te tumurangi, e te poiri pangopango ra; e kua akapaki iora. Tata iora aia i taua tuatua ra ki runga i nga papa toka e rua ra, e kua tuku maira kiaku nei.

23 E kite akera kotou i taua reo ra no roto i taua poiri ra, ka ka uaʼi te maunga i te ai ra, kua aere maira kotou kiaku ra, te aronga ravarai no rungao i to kotou au kopu ra, e to kotou au tangata pakari ra;

24 E kua tuatua maira kotou, I na, kua akakite mai to tatou Atua ra ko Iehova i tona kakā e tona mana kia tatou nei, e kua akarongo tatou i tona reo no rotopu i te ai; kite pu akenei tatou i teianei rā e, e tuatua ua mai te Atua ki te tangata nei, e ora rai.

25 I teianei ra, eaa oki matou nei kia mate? kia akarongo akaou oki matou nei i te reo o to matou Atua o Iehova, ka pou matou i teianei ai maata, e ka mate matou.

26 Koai oki to te tangata katoa nei i kite i te reo o te Atua ora i te tuatua anga mai i roto i te ai, mei ia matou nei, ka ora atu ei?

27 Ko koe te akavaitata atu, ka akarongo atu ei i te au tuatua ravarai ta to tatou Atua ta Iehova e tuatua mai; e te au tuatua katoa, ta to tatou Atua ta Iehova e tuatua mai kai koe ra, ko taau ïa e tuatua mai kia matou; e na matou e akarongo atu, e na matou e rave.

28 Kua akarongo mairā Iehova i taua au tuatua ta kotou i tuatua ra, ia kotou i tuatua mai kiaku ra; e kua tuatua mairā Iehova kiaku, Kua akarongo au i te tuatua i tuatuaia e te au tangata nei, ta ratou i tuatua mai kia koe na: e tuatua tika anake ta ratou i tuatua maira.

29 Naringa e, ko te tu ïa o to ratou ngakau i roto ia ratou, kia mataku mai ratou iaku, e kia akono tikai i taku au akauenga katoa, auraka e tukumoe, kia meitaki ratou, e ta ratou au tamariki e tuatau ua atu!

30 E aere ka karanga atu kia ratou, Ka oki ki to kotou na au puakapa.

31 Kareka koe na, tu ua mai ana koe i ko nei kiaku nei, e e karanga atu au kia koe i te au akauenga katoa, e te au akonoanga, e te au tuatua-tau, taau e apii atu ia ratou, kia akono ratou i te reira i te enua taku e oronga atu no ratou ei nooanga.

32 E tenana, e akono kotou, e e rave i ta to kotou Atua ra ta Iehova i akaue mai ia kotou na; auraka kotou e anga ke na te pae katau e na te pae kaui.

33 E aere rai kotou na te au arataa katoa ta to kotou Atua ta Iehova i akaue mai ia kotou na, kia ora kotou, e kia meitaki oki kotou, e kia akaroaia to kotou au rā ki runga i te enua ta ka nooia e kotou na.