2 Samuela

22 KUA karanga aturā Davida kia Iehova i te au tuatua o teianei salamo, i te rā i akaoraiaʼi aia e Iehova i te rima o tona katoa ra au enemi, e te rima o Saula:

2 Kua karanga atura aia, Ko Iehova taku mato, e taku punanga, e toku nei ora:

3 Ko te Atua o toku mato, koia taku ka irinaki atu: taku paruru, e te tara o toku ora, toku are teitei, e toku pinanga, toku ora: te akaora nei koe iaku i te takinga-kino.

4 E kapiki au ia Iehova, e tau iaia kia akameitakiia; e ka ora iora au i toku au enemi.

5 Kua akapiniia au e te ngaru o te mate, mataku rava akera au i te vai puke o te akono kore i te Atua ra;

6 Kua akapiniia au ki te taura o ade ra; kua tukuia te ereere o te mate iaku:

7 Kua kapiki au ia Iehova i toku tumatetenga ra; kua tautopa au ki taku Atua: e kua akarongo aia i toku reo i tona nao ra, kua tae rava toku aue ki roto i tona taringa.

8 Kua ngaueue iora te enua, e kua rutetetete; kua keukeu iora te au tumu o te rangi, e kua ngaueue, no te mea kua riri aia.

9 Kua peke akera te auai no roto i tona putaiu, e te ai kakai ra no roto i tona vaa; kua ka iora te ngarau ai i te reira.

10 Kua tuku akaaka katoa mai aia i te rangi, e kua eke maira; e poiri pangopango tei raro ake i tona vaevae.

11 Kua noo aia ki runga i te kerubi, e kua rere: kua kitea aia ki runga i te peau o te matangi.

12 Kua akapini aia iaia uaorai ki te poiri, ko tona ïa nooanga, ko te vai poiri, e te tumurangi patapatatue o te rangi ra.

13 No te kakā o tona aroaro, ka atura te ngaru ai ra.

14 Ka tuku mairā Iehova i te mangungu i runga i te rangi ra, kua akakite maira tei Teitei i tona reo.

15 Kua akainana iora aia i tana kakao e akapueurikiriki ke ia ratou; te uira, ati atura ratou.

16 Kua kitea iora te papa o te moana i reira, kua kitea iora te au tumu o te enua, i te akamura anga mai o Iehova, i te aruru anga i te aʼo o tona riri.

17 Kua itae maira aia i tona rima mei runga mai, kua rave maira iaku; kua totō maira iaku no raro i te au vai maata ra.

18 Kua akaora akera aia iaku i toku enemi ririnui ra, i tei makitakita mai iaku ra; no te mea e ririnui to ratou i toku.

19 Kua rokoia putia au e ratou i te rā i tumatetengaʼi au ra; ko Iehova ra toku turu.

20 Kua apai katoa aia iaku ki te ngai atea; kua akaora aia iaku, no te mea te mataora maira aia iaku.

21 Kua tutaki mairā Iehova iaku i tei tau i taku tuatua-tika: kua aite i te viivii kore o toku rima tana tutaki anga mai iaku:

22 No te mea kua akono au i te au arataa o Iehova, e kare rai au i akaruke kino ua i taku Atua.

23 No te mea tei mua tana katoa ra au tuatua-tau iaku; e tana au ture, kare rai au i akaruke i te reira;

24 E tiratiratu katoa toku ki mua iaia, e kua tiaki au iaku uaorai i toku kino:

25 Kua tutaki mai a Iehova iaku i tei tau ki te tuatua-tika naku ra; ko tei tau ki te viivii kore noku i mua i tona aroaro.

26 I te tangata e aroa ua ra, e aroa ua katoa koe: e te tangata tiratiratu ra, e tiratiratu katoa taau.

27 I te tangata e viivii kore ra, e viivii kore katoa taau; kareka te tangata ketaketa ra, e riro katoa koe i te māro.

28 Ko te aronga i tairoia ra e akaoraia ïa e koe ra: tei runga ra oou mata i te aronga nengonengo ra, kia tukuia ïa e koe ki raro.

29 Ko koe rai, e Iehova, toku nei lamepa: e akamārama mai oki a Iehova i toku nei poiri.

30 Ia koe rai i mama atu ei au na roto i te takanava toa ra; kua taea te patu e au i taku Atua.

31 Ko te Atua ra, kua tika rava tona aerenga; e tuatua timata uaia ta Iehova: ko te paruru aia ki te aronga katoa e irinaki iaia ra.

32 Koai tikai te Atua mari ra ko Iehova? koai oki te mato mari ra ko to tatou Atua?

33 Ko te Atua toku ririnui, e toku mana; ko tei akatikaoru ua i toku arataa.

34 Te akaaite nei aia i toku vaevae nei ki to te aili; e te akatinamou nei aia i toku turanga i te ngai teitei.

35 Te apii nei aia i toku rima i te tamaki: kua aatiia e oku nei rima te ana veo ra.

36 Kua oronga katoa mai koe kiaku i te paruru ora naau: e na toou maru i maataʼi au.

37 Kua akaatea koe i toku takainga vaevae i raro ake iaku; kia kore oku vaevae e paeke.

38 I aruaru atura au i toku au enemi, e kua pou ratou iaku; e kare au i oki, e ope akera ratou i te pou.

39 Kua pou ratou iaku, e kua taia ratou, e kare rava akera ratou i tu mai ki runga: kua topa oki ratou ki raro ake i toku vaevae.

40 Naau oki au i tatua ki te maroiroi i te tamaki: e te aronga i tu ki runga iaku nei, kua tuku akaaka koe ki raro ake iaku.

41 E kua oronga mai oki koe i te kaki o toku au enemi; kia pou iaku tei makitakita mai iaku ra.

42 Kua akara ratou, e kare e ora; kua akara ia Iehova, e kare aia i ki mai.

43 Pāpā atura au ia ratou, e ungaungātiti rava akera, mei te one-pueu ra; e takatakaiia e au mei te vari i te arataa ra, e kua oora atura ia ratou.

44 I te karo anga o toku au tangata, kua akaora mai koe iaku, e kua tukuia au e koe ki runga i te au etene; ko te aronga kare i kitea e au ra, ka tavini ïa iaku.

45 Te pa enua ke ke ra, ka tatomo ïa kiaku: tei te kite anga mai iaku ra, ka akarongo mai ratou iaku.

46 Te pa enua ke ke ra, ka mae ïa, e ka mataku ratou i roto i to ratou au punanga ra.

47 Te ora rā Iehova! e kia akameitakiia taua Mato noku ra! e kia akateiteiia te Atua o te mato e oraʼi au ra!

48 Ko te Atua ko tei akaoko mai iaku ra, ko te tuku akaaka mai i te tangata ki raro ake iaku ra,

49 I te arataki anga iaku i toku au enemi ra: e kua akateitei koe iaku i runga ravao i tei māro mai iaku; kua akaora koe iaku i te tangata rotoriri ra.

50 E teianei e akameitaki au ia koe, e Iehova, i rotopu i te au etene ra, e imene akapaapaa rai au i toou ingoa.

51 Koia te punanga ora i tona ariki; e te akakite maira i te aroa ki tei akamainuia e ia, kia Davida, e tona uanga, e tuatau ua atu.