Apokalupo

6 AKARA atura au i te Punua-mamoe i te vavaʼi anga i tetai i aua nga akairo ra, e akarongo atura au i te aruru, mei te mangungu ra te tu, e reo no tetai o aua nga mea ora ra, i te tuatua anga mai e, Ka aere mai ka akara.

2 Kua akara atura au, e i na, e oroenua teatea: e e ana ta tei noo ki rungao; e e korona tei orongaia mai nona: aere atura aia ma te upokotu atu e kia upokotu atu rai.

3 E kia vavaʼiia e ia te rua o te akairo ra, akarongo atura au i te rua o nga mea ora, i te na ko anga e, Ka aere mai ka akara.

4 Kua aere atura tetai oroenua kutekute: e e mana tei orongaia mai no tei noo i rungao ra, kia apai ke i te au i te ao nei, e kia ta te tangata ia ratou uaorai: e e koke maata tei orongaia mai nana.

5 E kia vavaʼiia e ia te toru o te akairo ra, akarongo atura au i te toru o nga mea ora, i te na ko anga mai e, Ka aere mai ka akara. Kua akara atura au, e i na, e oroenua kerekere; e e arite tei te rima o tei noo ki rungao.

6 E akarongo atura au i tetai reo i rotopu i nga mea ora e a ra, i te na ko anga e, Okotai arite sitona okotai denari, e e toru arite kerite okotai denari; auraka ra koe e rave kino atu i te olive e te wina.

7 E kia vavaʼiia e ia te a o te akairo ra, akarongo atura au i te a o nga mea ora ra, i te na ko anga e, Ka aere mai ka akara.

8 Akara atura au, e i na, e oroenua teatea: e tona ingoa to tei noo ki rungao, ko Mate ïa, e ko ade tei aru i muri ake iaia ra. E e mana tei orongaia mai no raua kia ta i te a o te tuanga o to te ao nei i te koke, e te onge, e te mate, e te puaka taae o te enua nei.

9 E kia vavaʼiia e ia te rima o te akairo ra, akara atura au i raro ake i te atarau i te au vaerua o te aronga i taia no te tuatua a te Atua, e no te tuatua ta ratou i akakite ra:

10 Kua kapiki atura ratou ma te reo maata, kua na ko atu, Mei te aa te roa, e te Atu tapu e te tuatua-mou, e kore ei koe e akava, e e tutaki mai i to matou toto, i te aronga i noo i te ao nei?

11 E e kakau teatea tei orongaia mai no ratou ravarai e pini rava ake; e kua tuatuaia mai ratou e, e tatari rai ratou e kia ope ake tetai manga tuatau, e kia ope i te mate to ratou au taeake tavini, to ratou au taeake, e kia pou i te taiaia mei ia ratou te tu.

12 Akara atura au e vavaʼiia akera e ia te ono o te akairo ra, e i na, e ngaueue maata to te enua; kerekere atura te rā mei te kakau pakaku uruuru ra, e riro atura te marama mei te toto ra;

13 E kua topa maira te au etu o te rangi ki raro i te enua nei, mei te suke kakaiore e topa, kia ruruia e te matangi maata ra.

14 Ngaro ke atura te rangi mei te tuatua kia pokaikaiia ra; e taka ke atura te au maunga katoa, e te pa enua katoa, i to ratou vairanga.

15 E te au ariki o te ao nei, e te au tangata mamaata ra, e te au tangata apinga ra, e te au rangatira mamaata, e te au tangata mana, e te au tuikaa, e te au rangatira ra, pipini anake atura ïa ki roto i te au ana, e ki roto i te au mato, o te maunga;

16 E kua karanga atura ki te au maunga e te au mato, Ka topa mai ki rungao ia matou, e uuna ia matou, kia ngaro ke atu, i te mata o tei noo ki rungao i te terono ra, e te riri o te Punua-mamoe:

17 Kua tae oki te rā maata no tona riri; e koai oki te tangata e mou?