Au Uianga a te Aronga Tatau
Ka akatuia mai ainei te au tangata me kare ratou e ariki i te akonoanga Kerititiano tika tikai i teianei e te mate atu i mua ake i te akamata anga o te mate maata?
E mea meitaki no tatou katoatoa kia patoi i tetai ua atu anoano no te tu atu ei au akava, te kiteanga e i te openga, ko ta Iehova akava anga na roto ia Iesu Karaiti te mea puapinga rava atu. (Ioane 5:22; Angaanga 10:42; 2 Timoteo 4:1) Inara te oronga maira te au Tuatua Tapu i etai au akakite anga tuatua tauturu ei pau i te uianga i runga ake nei.
Tutu aere anga i te tuatua meitaki o te Patireia o te Atua i te ao katoa, e mea puapinga ia o ‘te akairo o te parutia o Iesu.’ Kua kite tikaiia teia akairo mei te akamata anga o teia anere mataiti. Te tupu atura te angaanga tutu aere ki roto i tetai akatakakeanga o te au tangata o te au pa enua katoatoa i te akatupuanga i te akatutu anga a Iesu i “te mamoe” e “te puakanio.” Ma te akaoti anga o teia angaanga tutu aere e te akatakakeanga, ka apai mai te “mate maata” i te akatereanga kino o teianei ki tona openga.—Mataio 24:3, 21, 22; 25:31-46.
Ko Iehova, ma tana Tamaiti, e akava e me ka akapupuia tetai ua atu tei patoi i te tuatua o te Patireia e te mate i mua ake i te akamata anga o te tumatetenga maata ei au puakanio. Kua karanga a Iesu no runga i te au puakanio e “ka aere ke ïa i te mate mutu kore.” No reira, ka rauka ia tatou i te taopenga e ko te aronga tei tamanakoia e te Atua e e au puakanio kare e rauka te tuakaou anga. E akava anga to ratou tei aite ra ki te aronga tei “akautungaia mai ia i te mate mutu kore” i te tuatau o te tumatetenga maata.—2 Tesalonia 1:9.
Inara ka akapeea te aronga penei kare i rava ana i te maeuia ki te tuatua o te Patireia e raukaʼi i te rave tikai i tetai iki anga no te reira me kore te patoi i te tuatua mou i mua ake ka mate ei ratou i te tuatau o teia “au ra openga”?—2 Timoteo 3:1, NW.
Te akara anga e e manganui tei mate koi tere ei te angaanga tutu aere ki mua i mua ake i te tumatetenga maata te ka tuakaou mai. Kua akakiteia teia i roto i ta tatou ka tatau i roto ia Apokalupo 6:7, 8 no runga i te akaoro anga o te au tangata akaoro enua akatutu ua. E manganui te au tangata tei mate ei au tangata noa ua nei o te tamaki, te rava kore o te kai, e te au maki mate. I te mea e ko “ade” te apai ra i teia au tangata nei kia “mate,” ka akatuia mai ratou i te tuatau o te Tutara Anga Tauatini Mataiti a Karaiti, me akiri mai a Ate i tei mate katoatoa i roto i reira ra. (Apokalupo 20:13) Ko tetai numero o te aronga tei akatuia ki te ora penei kua aravei ana ratou i te tuatua o te Patireia i mua ake ka mate ei.
Mei teaa atura te rekareka ia tatou e kare a Iesu i akaruke ua mai i te au tangata kia manako e koia ma te au mamoe e koai ma te au puakanio! Kare e rauka i te au tangata tiama kore i te vaito e mei teaa te maata o te tuatau e raukaʼi i tetai tangata no te akarongo e te ariki i te tuatua meitaki. Ka kite ainei tatou e eaa tona turanga ngakau i te taime mua e i inangaro tikai aia i te tuatua tika? Ka rauka ainei ia tatou i te vaito e mei teaa te maata i tona ariu anga mai tei paria e tona ngutuare tangata, tona tu akonoanga, me kore tetai atu au mana tuke? Kare rava. Inara, ka papu ia tatou e ka rauka i te Atua ko Iehova e Iesu Karaiti i te vaito i teia au mea e oti ka itae atu i te au akava anga tei tiama ra, tika, e te tika tikai.—Deuteronomi 32:4; Isaia 11:1-5.
No reira, kare e tumu no tatou kia tamanako e me ka akatu akaouia mai te aronga tei mate ua ake nei e me kare. Ko teia tetai mea kare tatou i akamanaia no te rave. (Akaaiteia atu kia Luka 12:13, 14.) E mea pakari roa atu no tatou kia tiaki i te au tuku anga a nga Akava tika, ko te Atua ko Iehova e Iesu Karaiti. Ka oronga mai teia i te au maata o te manako ei au tavini no Iehova. Ka tauturu katoa te reira ia tatou kia rave meitaki atu i tei tonoia tatou kia rave—‘ka aere e akariro i to te pa enua katoa ei pipi, ma te apiianga ia ratou, kia akono i te au mea ravarai ta Iesu i akaue.’—Mataio 28:19, 20.
[Akameitakianga no te Tutu i te kapi 31]
Mamoe Leicester, Meyers