2 Ariki

12 E TAE akera ki te itu o te mataiti i te au o Iehu, i ariki ei a Ioasa; ka a akera ngauru ona mataiti i te ariki anga i Ierusalema. Ko Zibia te ingoa o tona metua vaine no Bere-seba.

2 Kua rave aturā Ioasa i te mea tika i mua i te aroaro o Iehova, e ope rava ake tona au rā i apiiaʼi aia e Iehoiada taunga ra.

3 Kare ra i akarukeia te au ngai teitei ra: te apai ua ra te au tangata i te atinga, e te tutungi ra i te atinga kakara, i te au ngai teitei ra.

4 Kua karanga aturā Ioasa ki te kau taunga, Te au moni tapu i apaiia mai ki roto i te are o Iehova, te moni a te aronga katoa i tatauia ra, te moni akaora i te vaerua i akonoia no te tangata katoa, e te moni katoa ta te ngakau o te tangata i anoano i te apai mai ki roto i te are o Iehova,

5 Na te kau taunga e akaputuputu no ratou, te tangata katoa tana e tau ra; ka rave akaou ei i te au ngai i ngaangaa i te are nei, kia kitea atu taua au ngai ngaangaa ra.

6 Tae rava atura ra ki te mataiti okotai takau ma toru o te au o te ariki ra ko Ioasa, kare i oti i te kau taunga ra taua au ngai ngaangaa i taua are ra.

7 Kua karanga atura taua ariki ra ko Ioasa ia Iehoiada taunga,e te kau taunga katoa ra, e kua karanga atura kia ratou, Eaa ra kotou i kore ei i tuā i te au ngai ngaangaa o te are nei? Oti ra ua kotou i te rave i te moni i te au tangata i tau ia kotou na, e tuku maira kotou i taua moni ra kia tuāia te au ngai i ngaangaa i te are nei.

8 Kua akatika akera te kau taunga ra, kua oti ua ratou i te rave i te moni a te au tangata ra, e auraka ratou e rave i te au ngai ngaangaa o te are ra.

9 Kua rave akerā Iehoiada taunga i tetai pia, e kua ou aia i tetai rua i te tapoki o taua pia ra, kua tuku iora ki te pae atarau, ki te pae katau kia tomo mai ki roto i te are o Iehova: e kua tuku iora te taunga i tiaki i te ngutupa i te au moni katoa, i apaiia mai ki roto i te are o Iehova, ki roto.

10 E koia rai kia akara ratou e, kua maata te moni i roto i taua pia ra, kua aere maira ki runga te tata tuatua a te ariki, e te taunga maata, kua tatau iora i te moni i rauka i roto i te are o Iehova, e kua aao iora ki roto i te au pute.

11 E oti akera taua moni ra i te tatauia, kua tuku iora ratou ki te rima o te aronga i rave i taua angaanga ra, ko tei akara i taua are o Iehova ra; e pou akera ia ratou i te tutaki aere i te au taunga tarai rakau, e te aronga patu, tei rave i te angaanga i taua are o Iehova ra,

12 E tei te au taunga, e te tarai toka, e tei te oko rakau oki, e te toka taraiia ra, ei tuā i te au ngai i ngaangaa i te are o Iehova, e tei te au mea katoa i okoia ei tuā i taua are ra;

13 Kare ra ratou i anga no te are o Iehova i te au kapu ario, e te au pakoti, e te au kapu, e te au pu, e te au āriki auro, e te au āriki ario, i taua moni i apaiia mai ki roto i te are o Iehova ra:

14 Kua apai ra ratou i te reira na te tangata rave angaanga, i oti ei i taua moni ra te are o Iehova.

15 Kare ra ratou i akaaite i te tuatua i te au tangata, ta ratou i tuku atu i taua moni ra ei tutaki na te rave angaanga: no te mea kua akono ratou i te mea mou ra.

16 Te moni tutakingaara, e te moni tarangaara, kare ïa i apaiia mai ki roto i te are o Iehova: na te kau taunga ïa.

17 Kua aere iora te ariki o Arama ra ko Hazaela ki runga, kua tamaki atura ia Gata, e rauka iora: kua anga akerā Hazaela i tona mata e aere ki runga ki Ierusalema.

18 Kua rave akera te ariki o Iuda ra ko Ioasa i te au mea tapu, ta Iehosaphata, e ta lorama, e ta Ahazia, ta nga ariki o Iuda, nga metua nona, i akatapu ra, e te au mea tapu katoa nana uaorai, e te auro katoa i kitea i roto i te uipaanga apinga i te are o Iehova, e te are katoa o te ariki, e kua akau akera ki te ariki o Arama ra kia Hazaela: kua akaruke maira aia i Ierusalema.

19 E te toenga o te tuatua ia Ioasa e tana katoa i rave, kare ainei kua tataia ki roto i te buka, te tuatua no te au rā o te au ariki o Iuda ra?

20 Kua tu maira tona au tavini, kua kotikoti kupenga akera, e kua ta iora ia Ioasa i te are o Milo, ka eke atu ei ki Sila ra.

21 Na Iozakara te tamaiti a Simeata, e na Iehozabada te tamaiti a Somera, nga tavini nona ra, i ta iaia, e mate atura; tanumia iora aia e ratou ki o tona ai metua ra i te oire o Davida; tupauia akera aia i te au e te tamaiti nana ra e Amazia.