Salamo
10 EAA koe, e Iehova, i akaateaʼi? eaa koe i pipini ei i te tuatau tumatetenga nei?
2 No te nengonengo o te tangata kino i takinga-kino mai ei aia i te tangata ao: kua iiia ratou i te akakoroanga ta ratou i kimi ra.
3 Te akatietie ra te tangata kino i te inangaro o tona ra ngakau, te akameitaki ra te noinoi apinga i ta Iehova i akaviivii ra.
4 No te nengonengo i kore ei i kimi i te tangata kino iaia; kare te Atua i roto i tona katoa ra au manako.
5 E aerenga manuia anake tona au aerenga: taau ra au tuatua-tau, tei runga roa ïa, kare e utoaia atu; tona katoa ra au enemi, kua akavaavaa aia ia ratou.
6 Kua tuatua oki aia i roto i tona ngakau, Kare au e ngaueue; kare rai au e kino e tuatau ua atu.
7 Kua ki tona vaa i te tao, e te pikikaa, e te takinga-kino: tei raro ake i tona arero te kino e te tuatua mingi.
8 Te pipini ua ra aia ki roto i te au ngai ngarongaro o te au vila ra; ei roto i te au vaarua aia i ta ai i te aronga ara kore: e tiroi matariki poiri ua aia i te aronga ao.
9 E moetapapa ra aia mei te liona i roto i tona rua ra; te moetapapa ra aia, kia rauka te tangata rikiriki; kua opukia te tangata rikiriki, kia totō aia iaia ki roto i tana kupenga.
10 Kua akaopuku rava aia ki raro, kua akaiti iaia uaorai, kia inga te ao ki roto i tona ra rima pakari.
11 Kua tuatua oki aia i roto i tona ngakau, Kua ngaropoina ïa i te Atua; kua uuna ke tona mata; kare roa teia e akaraia mai.
12 Ka tu, e Iehova; e akateitei i to rima, e te Atua e! auraka tei tairoia nei e akangaropoina roaia e koe.
13 Eaa te aronga kino i akavaavaaʼi i te Atua? kua tuatua aia ki roto i tona ngakau e, Kare koe e ui mai.
14 Te akara maira koe; te kite maira oki koe i te kino, e te aue, kia tutakiia te reira e to rima na: e oro te tangata ao ra kia koe; ko koe te tauturu o te matiroeroe.
15 E aati ana koe i te rima o te akono kore i te Atua e te tangata kino ra: e kimi matatio koe i tana ravenga kino, e kare atu i toe.
16 Ko Iehova te ariki e tuatau ua atu: kua pou te aronga etene i tona enua.
17 Kua akarongo mai koe, e Iehova, i te anoano o tei akaaka ra: kua akatinamou koe i to ratou ngakau, kua akarongo to taringa:
18 Kia akatikaia te matiroeroe e tei takinga-kinoia, e auraka te tangata o te enua nei kia takinga-kino akaou atu.