2 Korinetia

13 KO te toru teia i toku aere anga atu ia kotou na. “Tei te vaa o nga kite toko rua e toko toru ra e riro ei te au tuatua katoa na ei tuatua-mou.”

2 I karanga na au ia kotou i muatangana, e te tuatua akaou atu nei au, ko te rua ïa, mei te mea tei ko na au; taka ke ua rai nei, te tata nei au i te tuatua i te aronga i ara na, e tetai pae katoa ra, e i tae akaou atu au, kare ua au e akaperepere:

3 Ko kotou oki i umuumu mai i te kite e, te tuatua nei te Mesia iaku nei, kare oki aia i paruparu i roto ia kotou na, te maroiroi ra i roto ia kotou na.

4 I akasatauroia oki aia no te paruparu, te ora ra aia i te mana o te Atua. Te paruparu katoa nei oki matou i roto iaia, e ora ra matou ma ia katoa i te mana o te Atua i roto ia kotou na.

5 E kimi matatio ia kotou uaorai i to kotou akarongo; e akara matariki ia kotou uaorai. Kare kotou uaorai i kite e, kare kotou te aronga tika koreia mai, tei roto ïa Iesu Mesia ia kotou?

6 Te maara nei ra au e, e kite kotou e kare matou te aronga tika koreia mai.

7 E teianei te pure nei au ki te Atua kia kore rava kotou e rave i te kino; kare ra kia kitea e kua akatikaia matou, kia rave ra kotou i te tuatua meitaki ra, riro ua atu rai matou mei te mea tika koreia mai.

8 Kare rava e mea e tika ia matou ei akakore i te tuatua-mou, kareka ei akatika i te tuatua-mou.

9 Kia paruparu oki matou e kia maroiroi kotou, te rekareka nei matou i reira: e te anoano katoa nei oki matou, kia tika rava kotou.

10 I tata atu ei oki au i teianei au tuatua i te atea ke nei, kia kore au e rave viviki atu kia tae atu au i vaitatao, i te mana oki ta te Atu i oronga mai iaku nei kia meitaki, kare oki kia mate.

11 E te openga o taku nei tuatua, e aku au taeake, kia ora na. Kia tika rava, kia pumaana rava, kia okotai rai ngakau, kia noo ma te au; e e noo ïa te Atua nona te aroa e te au i rotopu ia kotou.

12 E aroa kotou tetai ki tetai i te ongi tapu ra.

13 Te aroa nei te aronga tapu ravarai ia kotou.

14 Ei ia kotou katoa na te aroa ua o te Atu ra o Iesu Mesia, e te inangaro o te Atua, e te tau a te Vaerua Tapu ra. Amene.