Esetera

5 E TAE akera ki te toru o te rā, kua kakau iorā Esetera ki te kakau ariki nona, e kua tu ua iora ki te paepae i roto rava i te are o te ariki, i anga tika mai ki te are o te ariki ra: te noo maira te ariki ki runga i te terono ariki i roto i te are o te ariki, tei anga tika ki te ngutupa are ra.

2 E kia akara mai te ariki i te ariki vaine ia Esetera i te tu ua anga i roto i te paepae, kiteia maira aia e ia; e kua akatika maira te ariki i te sepeta auro i roto i tona rima kia Esetera, kua akavaitata aturā Esetera, kua akatukia atura i te kauru i taua sepeta ra.

3 Kua tuatua maira te ariki kiaia, Eaa toou anoano, e te ariki vaine e Esetera? eaa taau e pati mai? ka orongaia atu ïa kia koe tae ua atu ki tetai veenga i te basileia nei.

4 Kua karanga aturā Esetera, Kia tika i te ariki ra, e aere mai te ariki, e ko Hamana akonei ki te inumanga i akonokonoia e au nana ra.

5 Kua tuatua maira te ariki, E tuatua ana kia Hamana e akangakoikoi, e akapera i ta Esetera i tuatua maira. Kua aere atura te ariki raua ko Hamana ki te inumanga ta Esetera i akonokono ra.

6 Kua tuatua maira te ariki kia Esetera i taua inumanga wina ra, Eaa toou na anoano? ka orongaia atu ïa kia koe: eaa taau e pati mai? ka akatikaia ïa e tae ua atu ki tetai veenga o te basileia nei.

7 Kua karanga aturā Esetera, na ko atura, Toku anoano, e taku e pati;

8 Te kite aroaia maira au e te ariki ra, e kia tika i te ariki i te oronga mai i toku anoano, e te akatika mai i taku e pati atu, e aere mairai te ariki e ko Hamana ki te inumanga naku e akonokono na raua, e apopo au e peraʼi i ta te ariki i tuatua mai nei.

9 Aere aturā Hamana i taua rā ra ma te rekareka, e te nanave anga o te ngakau; kia akara rā Hamana ia Moredekai i te ngutupa o te ariki ra, e kare aia i tu ki runga, e kare oki i keu ua ake iaia, ki rava akerā Hamana i te riri ia Moredekai.

10 Akakoromito iora rā Hamana; e tae atura aia ki te ngutuare, kua tono atura i te tiki i te au oa e tana vaine ra ia Zeresa.

11 Kua akakite aturā Hamana i te kakā, te apinga maata nana, e te maata o tana au tamariki, kia ratou, e te au mea katoa i akamaataiaʼi aia e te ariki, e kua akateiteiia aia i te au tavini e te ui ariki i o te ariki ra.

12 E kua karanga atura oki a Hamana, E te ariki vaine katoa ko Esetera, kare rava ana tangata i tuku katoa mai ki roto i te inumanga tana i akonokono na te ariki, mari ra ko au anake, e kua tuatua katoaia mai au e aere katoa apopo maua ko te ariki ki ona ra.

13 Eaa ra to reira puapinga, te akara ua nei au i taua ngati Iuda ra ia Moredakai i te noo ua anga i te ngutupa o te ariki ra?

14 Kua tuatua maira tana vaine ra ko Zeresa, e te au oa katoa nona ra, Ei ringa te akatuia kia rima ngauru i te kubiti i te teitei, e karanga atu oki ki te ariki apopo e kia riiā Moredekai ki rungao; ka aere rekareka ua atu ei korua ko te ariki i taua inumanga ra. Mareka rava aturā Hamana i taua tuatua ra; e kua akaue atura i taua ringa ra kia akatuia.