Salamo

45 TE pupu nei toku ngakau i te tuatua meitaki: ka tuatua ana au i tei akaaiteia e au no te ariki ra; e riro oki toku arero mei te peni o te tangata tata viviki i te tuatua.

2 E meitaki maata toou i to te tamariki a te tangata nei: kua maringi te meitaki ki runga i to vaa na; i tamou ei to te Atua akameitaki ia koe ra.

3 E tatua ana to koke ki to ūā, e tei ririnui ra, toou ra kakā e toou ra mana;

4 E ma toou ra mana, ka akaoro ei ma te manuia, ei akatupu i te tuatua-mou, e te maru, e te tuatua-tika; e na to rima katau e apii ia koe i te au mea rikarika.

5 Ka topa te au tangata i raro ia koe! ka kokoi te au kakao noou ra, i te ngakau o te au enemi o te ariki.

6 To terono, e te Atua, e vai rai e tuatau ua atu: e sepeta tuatua-tika te sepeta o toou ra basileia.

7 I inangaro koe i te tuatua-tika, e te rikarika ra koe i te kino; i akatainu ei te Atua, to Atua ra, ia koe, ki te manongi ra o te rekareka e maata rava atura i toou au oa ra.

8 Ko te mura, e te aloe, e te kasia, ko toou ïa kakau; no ko i te au are nio elephana te akarekareka maira ratou ia koe.

9 E aronga tamaine no te ui ariki to roto i tei akaperepereia e koe na; tei to rima katau te ariki vaine te tu anga ma te auro Ophira.

10 E akarongo mai, e tera ra tamaine, e akamaara, e ariu mai i to taringa; e akapoina atu i toou ra au tangata, e te ngutuare o to metua ra;

11 Ei reira e riro ei te ngakau o te ariki ki toou ra meitaki: ko toou ra Atu oki aia, e akamori rai koe iaia.

12 Na te tamaine a Turia e apai mai i te atinga, na te aronga apinga nui e anoano mai kia kiteia atu e koe.

13 Manea maata to te tamaine a te ariki i roto ra: kua akamaneaia tona kakau i te auro.

14 Ka aratakiia aia ki te ariki ra ma te kakau manea maata, tona au oa paretenia i te aru anga iaia, ka aratakiia ratou kia koe.

15 Ka aratakiia ratou ma te rekareka e te pereperekavana: ka tomo oki ratou ki roto i te are o te ariki ra.

16 E tupauia mai to ai metua ra i te au tamariki naau, ko taau ïa e akaariki i te pa enua katoa ra.

17 Ka akariro oki au i to ingoa ra, ei ingoa manakoia, e pini rava ake te au uki katoa ra; ka akameitaki ei te au tangata ia koe, e tuatau e tuatau ua atu.