Mika
3 KUA karanga atura oki au, Ka akarongo mai ana kotou, e te aronga nunui i o Iakoba ra, e ko kotou, e te au akava i te ngutuare o Iseraela; kare ainei tei ia kotou te kite i te tuatua-tau?
2 Ko kotou, ko tei riri ki te meitaki, e tei inangaro ki te kino; ko tei oore i to ratou kiri no runga ia ratou, e to ratou kiko no runga i to ratou au ivi.
3 Ko tei kai i te kiko o toku ra au tangata, e kua oore i te kiri no runga ia ratou ra: e kua atiati i to ratou au ivi, e kua tua ia ratou mei te manga i roto i te pani, e mei te puaka i roto i te pani maata.
4 Ei reira ratou e kapiki atu ei kia Iehova, kare ra aia e akarongo mai ia ratou; e puroku ra aia i tona mata ia ratou i taua tuatau ra: no te mea kua kino ïa ta ratou au ravenga.
5 Te na ko mairā Iehova i te au peroveta, i tei akatareva ke i toku ra au tangata; i tei kakati to ratou nio, ka karangaʼi e, Ei au; e tei kore i tuku mai i te kai ki roto i to ratou vaa, kua akonokono ratou i te tamaki iaia.
6 E teianei ei po to kotou auraka ei orama; ei poiri to kotou auraka ei totou; e opu oki te rā ki runga i te au peroveta, e riro oki te ao i te po kerekere ki runga ia ratou.
7 Ei reira te au akara e akamaʼi, e e aringaringa te au totou; koia ïa, e tapoki anake ratou i to ratou kumikumi; no te mea, kare te Atua i ki mai.
8 Kua ki tikai ra au i te maroiroi i te Vaerua o Iehova, e te tuatua-tau, e te ririnui; ei akakite kia Iakoba i tona kino, e kia Iseraela i tana ara.
9 Ka akarongo mai ana kotou i teia, e te aronga nunui i te ngutuare o Iakoba, e te ui akava i te ngutuare o Iseraela, ko tei akaviivii i te tuatua-tau, e tei taruri ke i te tuatua-tika ravarai:
10 I te patu anga ia Ziona ki te toto e ia Ierusalema ki te kino.
11 Tei te oko e akavaʼi to reira aronga nunui, e tei te ario e apii ei tona kau taunga: e tei te moni e totou ei tona au peroveta; irinaki uaʼi ratou ki runga ia Iehova, i te na ko anga e, Kare ainei a Iehova i rotopu ia tatou nei? kare tatou e rokoia e te kino.
12 E teianei, no kotou, ka aroteiaʼi Ziona mei te kainga ra, e e riro Ierusalema ei au ututua, e te maunga i te are nei ei vaorakau teitei.