Ka Aaere Tatou i te Ingoa o Iehova e Tuatau Ua Atu!

“Ka aaere ra tatou i te ingoa o Iehova, o to tatou Atua, e tuatatau ua atu.”​—MIKA 4:5.

1. Eaa te au karere tei akanooia i roto ia Mika pene 3 ki te 5?

E APINGA ta Iehova ka akakite mai ki tona iti tangata, e te taangaanga ra aia ia Mika ei peroveta nana. E akakoroanga ia no te Atua kia rave i te tutaki i te aronga rave kino. Ka akautunga aia ia Iseraela no tona tu apoteiti. Inara, ma te mataora, ka akameitaki a Iehova i te aronga e aaere ra na roto i tona ingoa. Te kitea taka meitakiia ra teia au tuatua i roto i te pene 3 ki te 5 o te totou a Mika.

2, 3. (a) Ka tau te au arataki o Iseraela kia akaari i teea tu, inara eaa tikai ta ratou e rave ra? (e) Akapeea koe me akamarama i te au tuatua akatutu tei taangaangaia ia Mika 3:2, 3?

² Kua akakite ta te Atua peroveta: “Ka akarongo mai ana kotou, e te aronga nunui i o Iakoba ra, e ko kotou, e te au akava i te ngutuare o Iseraela; kare ainei tei ia kotou te kite i te tuatua-tau?” Ae, ko to ratou akakoroanga ia, inara eaa tikai ta ratou e rave ra? Te karanga ra a Mika: “Ko kotou, ko tei riri ki te meitaki, e tei inangaro ki te kino; ko tei oore i to ratou kiri no runga ia ratou, e to ratou kiko no runga i to ratou au ivi. Ko tei kai i te kiko o toku ra au tangata, e kua oore i te kiri no runga ia ratou ra: e kua atiati i to ratou au ivi, e kua tua ia ratou mei te manga i roto i te pani, e mei te puaka i roto i te pani maata.”​—Mika 3:1-3.

³ Eaa ra, te takinga kino ra te au arataki i te au tangata putaua e te paruru koreia! Te au tuatua akatutu i taangaangaia i konei te maramaia ra e te aronga e akarongo atura ia Mika. Me akateateamamaoia tetai mamoe tamateia na te tunu anga, kua oore ia te pakiri na mua e oti kua atiati ia. Tetai taime kua aatiia te au ivi kia tae mai te uo. Kua tunuia te au kiko e te au ivi ki roto i tetai pani maatamaata, mei tera rai i taikuia i roto ia Mika. (Ezekiela 24:3-5, 10) Mei teaa te tau o te akatutuanga no te akono anga kino te kiteaia ra e te au tangata i to Mika tuatau i te au rima o to ratou au arataki kino!

Tapapa Mai a Iehova ia Tatou kia Akono i te Tuatua Tau

4. Eaa te tukeanga e vaira i rotopu ia Iehova e te au arataki o Iseraela?

⁴ Te vaira te tuke anga maata i rotopu i te Tiaki aroa ua, ko Iehova, e te au arataki o Iseraela. No te mea kare ratou i te rave i te tuatua tau, kua puapinga kore ratou i te akatupu i ta ratou akauenga kia paruru i te anana. Mari ra, kua takinokino manako kore ratou i te mamoe tutu ua, te akakore anga mei ia ratou te tuatua tau e te tuku anga ia ratou kia “ki te toto,” mei tei akakiteia mai ia Mika 3:10. Eaa ta tatou ka kite mai mei teia turanga?

5. Te tapapa maira a Iehova i teaa no te aronga e akono ra i te aratakianga i tona iti tangata?

⁵ Te tapapa maira te Atua e kia akonoia te tuatua tau e te aronga e arataki ra i tona iti tangata. Teia ta tatou e kite nei e kua tika ki to Iehova au tavini i teia tuatau. Pera katoa, te rotai ra teia ia Isaia 32:1, i reira ka tatau tatou: “I na, e tutara mai tetai ariki ma te tuatua-tika ra, e e tutara oki te ui ariki ra ma te tuatua-tau.” Inara, i to Mika tuatau, eaa ta tatou e kite ra? “Ko tei riri ki te meitaki, e tei inangaro ki te kino” te maro ra i te taangaanga tarevake i te tuatua tau.

Kua Pauia Taai Pure?

6, 7. Eaa te tumu puapinga te akakiteia maira ia Mika 3:4?

⁶ Ka rauka ainei i to Mika au taeake kino i te tapapa i to Iehova tu mareka? Kare rava! Te akakite ra a Mika 3:4: “Ei reira ratou e kapiki atu ei kia Iehova, kare ra aia e akarongo mai ia ratou; e puroku ra aia i tona mata ia ratou i taua tuatau ra: no te mea kua kino ïa ta ratou au ravenga.” Te akakite maira teia i tetai tumu manako puapinga.

⁷ Kare a Iehova e pau mai i ta tatou au pure me te rave ra tatou i te ara. Te papu ra te reira me te akono ra tatou i te tu oraanga tu rua, te uuna anga i ta tatou angaanga tarevake koi akameamea ua ei i te tavini tiratiratu i te Atua. Kia tau kia Salamo 26:4, kua imene a Davida: “Kare au i noo i roto i te au tangata tarevakaua, kare oki i kapiti i roto i te aronga pikikaa.” Kare rava a Iehova e pau mai i te au pure a te aronga tei aati akakoro i tana Tuatua!

Akamanaia e te Vaerua o te Atua

8. Kua akamatakiteia te au peroveta pikikaa o te tuatau o Mika i teaa?

⁸ Mei teaa te viivii o te au angaanga matauia i roto i te au arataki pae vaerua o Iseraela! Kua akatarevake te au peroveta pikikaa i to te Atua iti tangata i te pae vaerua. Kua kapiki te au arataki akonoanga noinoi “ei au” inara te akatapu ra i te tamaki e te patoi ra i tetai tei kore i oronga i tetai apinga ei kai na ratou. “E teianei,” i na Iehova ei, “ei po to kotou auraka ei orama; ei poiri to kotou auraka ei totou; e opu oki te rā ki runga i te au peroveta, e riro oki te ao i te po kerekere ki runga ia ratou. Ei reira te au akara e akamaʼi, e e aringaringa te au totou; koia ïa, e tapoki anake ratou i to ratou kumikumi.”​—Mika 3:5-7a.

9, 10. Eaa te aiteanga o te ‘tapoki anake i te kumikumi,’ eaa ra i kore ei a Mika i anoano ia kia rave i te reira?

⁹ Eaa ra ka ‘tapoki anake [ei] i te kumikumi’? E apinga teia tei raveia e te au taeake kino i to Mika tuatau ma te kore e akama. E ka tau teia aronga kino kia akama. “Kare te Atua i ki mai,” i manako ei ratou. (Mika 3:7e) Kare a Iehova e manako mai i te au pure a te au tangata kino e te nengonengo.

¹⁰ Kare o Mika tumu no te ‘tapoki anake i te kumikumi.’ Kare aia e akama. Kua pau mai a Iehova i tana au pure. Akara ana ia Mika 3:8, i reira te karanga ra te peroveta tiratiratu e: ‘Kua ki tikai ra au i te maroiroi i te vaerua o Iehova, e te tuatua-tau, e te ririnui.’ Mei teaa te akameitaki ua ia Mika e i roto i tana angaanga orometua tiratiratu e te roa, kua ‘ki tikai ra aia i te maroiroi i te vaerua o Iehova’! Kua oronga mai teia i te akamaroiroi anga kiaia kia “akakite kia Iakoba i tona kino, e kia Iseraela i tana ara.”

11. Akapeea te au tangata i te akamana angaia kia akakite i ta te Atua au karere?

¹¹ E maata atu ta Mika e anoano ra i te maroiroi tangata e rauka ei i te akakitekite i te karere akavaanga pakari a te Atua. E mea puapinga to Iehova vaerua, me kore te mana ririnui. Akapeea tatou? Ka rauka e kia akatupuia ta tatou angaanga tutuanga me akamaroiroi mai a Iehova ia tatou na roto i tona vaerua tapu. Te tautaanga i te tutu aere ka puapinga kore ia me rave akakoro tatou i te ara. I roto i te reira turanga kare e rauka i te Atua i te pau mai i ta tatou au pure no te maroiroi i te rave i tana angaanga. Papu tikai kare e rauka ia tatou i te akakite i te au karere akavaanga a to tatou Metua i te rangi me kare ‘te vaerua o Iehova’ ki runga ia tatou. Na roto i te au pure tei akarongoia e ma te tauturu o te vaerua tapu, kua rauka ia tatou i te tuatua ma te mataku kore i ta te Atua tuatua mei ia Mika rai.

12. Eaa ra i rauka ei i te au pipi mua a Iesu kia ‘tuatua ua i ta te Atua au tuatua ma te mataku kore’?

¹² Penei kua maara ia koe te tataanga ia Angaanga 4:23-31. Ka akamanako ana e ko koe tetai o te au pipi a Iesu o te anere mataiti mua. Kua tauta ana te aronga takinokino ma te maro i te akamuteki i te au pipi a Karaiti. Inara kua pure teia aronga tiratiratu ki to ratou Atu Ngateitei, te pati akatenga anga: “E akara mai koe, e te Atu, i ta ratou nei akamataku anga mai, e akamaroiroi mai i to au tavini kia tuatua ua i taau tuatua ma te mataku kore.” Tei tupu? I te pureanga ratou, kua akangaueueia te ngai i akaputuputu atu ei ratou, e ma te katoatoa kua ki ia ratou i te vaerua tapu e te tuatua ra ma te mataku kore i te tuatua a te Atua. Kia akara ua atu tatou kia Iehova na roto i te pure e kia irinaki i tana tauturu na roto i te vaerua tapu ia tatou e rave ra i ta tatou angaanga orometua.

13. Eaa te ka tupu kia Ierusalema e Samaria, e no teaa ra?

¹³ Ka akamanako katoa ana i to Mika tuatau. Kia tau kia Mika 3:9-12, kua akava te au tutara apa i te toto e kia tutaki ia, kua ikuiku te kau taunga ma tetai moni tutaki, e kua raverave te au peroveta pikikaa i te angaanga manamana ma te tutaki. No reira rai te Atua i akava ei i te oire maata o Iuda, ko Ierusalema, e ‘e riro ei au ututua’! I te mea te totoa katoa ra te akamorianga pikikaa e te tu viivii i te pae akono i Iseraela, kua akauruia a Mika kia akamatakite e ka akariro te Atua ia Samaria “ei ututua.” (Mika 1:6) Ko te tika, kua ora atu te peroveta i te kite anga i te akapouanga tei totouia no Samaria i te akatupu angaia e te au vaeau o Asura i te 740 M.T.N. (2 Ariki 17:5, 6; 25:1-21) Te taka meitaki ra e ka akatupu uaia teia au karere patoi ia Ierusalema raua ko Samaria i roto i to Iehova maroiroi.

14. Akapeea te totou i rekotiia ia Mika 3:12, i te akatupu angaia, e akapeea te reira i te akakeu anga ia tatou?

¹⁴ Papu e kare a Iuda e ora mai mei ta Iehova akavaanga pakari. I te akatupuanga i te totou tei tataia ia Mika 3:12, ka “aroteiaʼia [a Ziona] mei te kainga ra.” Mei ta tatou akaraanga o te 21 anere mataiti, kua kite tatou e kua tupu teia au apinga i te akapouanga a Babulonia ia Iuda e Ierusalema i te 607 M.T.N. Kua tupu teia e maata te au mataiti i muri mai i te totou anga a Mika, inara kua papu iaia e ka aere mai te reira. Papu tikai e ka tau tatou kia irinaki e ka ope te akatereanga kino o te au mea ravarai i roto i te “ra [totouia] o Iehova.”​—2 Petero 3:11, 12, NW.

Akatikatika a Iehova i te Au Mea

15. I roto i taau uaorai tuatua, akapeea koe me akataka mai i te totou i tataia ia Mika 4:1-4?

¹⁵ Te akara akaouanga, ka kite tatou e kua oronga atu a Mika i tetai karere maoraora o te manakonakoanga. Mei teaa te pumaana o te au tuatua ka kitea e tatou ia Mika 4:1-4! I tuatua ei a Mika i tetai tuanga: “E riro kia tae ki te au rā openga ra, e akatinamouiaʼi te maunga ra o te are o Iehova ki runga i te take o te au maunga ra, e ka akateiteiia ïa ki rungao i te au tuaivi ra, e ka uipa mai te au tangata ki reira. . . . E nana e akava i rotopu i te tangata e manganui, e e akamura i te au enua ririnui i te atea ke ra; e tupaki ratou i ta ratou au koke ei auri arote, e ta ratou au korare ei tipi tope ïa, kare tetai enua e apai i te koke ki runga i tetai enua kare oki ratou e apii akaou i te tamaki. E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai; ko te vaa oki o Iehova Sabaota ra, tei tuatua mai.”

16, 17. Akapeea a Mika 4:1-4 i te akatupu angaia i teia tuatau?

¹⁶ Koai ma te “tangata e manganui” e te “au enua ririnui” i taikuia i konei? Kare ratou e ko te au enua e te au kavamani o teia ao. Mari ra, te tau ra te totou ki te au tangata tataki tai no roto mai i te au enua tei uri ki te angaanga tapu taokotai i to Iehova maunga o te akamorianga mou.

¹⁷ I te akono anga i ta Mika totou, kare e roa atu ka raveia te akamorianga ma a Iehova ma tona ki katoa i te enua katoa. I teia tuatau, ko te au tangata “i akonoia no te ora mutu kore” te ikuikuia nei i teianei i roto i to Iehova au mataara. (Angaanga 13:48) Te tuku nei a Iehova i te akavaanga e te akatikatika ra i te au mea i te pae vaerua no te aronga irinaki e tu ra ratou no te Patireia. Ka ora atu ratou i te “mate maata” e ko tetai ia o te “aronga maata rava.” (Apokalupo 7:9, 14) I te mea kua tupaki ratou i ta ratou au koke ei auri arote, e i teia tuatau te noo au nei ratou ma to ratou au taeake Kite no Iehova e tetai ke atu. Mei teaa te rekareka i te kapiti atu kia ratou!

Tauta Pakari i te Aaere i to Iehova Ingoa

18. Eaa tei akatutuia mai e te ‘nooanga ki raro ake i tana uaorai vine e te suke’?

¹⁸ I to tatou tuatau, me tapoki te mataku i te enua mei tetai tiaorangi kinokino, te rekareka nei tatou e manganui te apii nei i ta Iehova au mataara. Te tapapa nei tatou i te tuatau vaitata ki mua kare rava te aronga inangaro i te Atua e kite akaou i te tamaki mari ra ka noo ki raro ake i ta ratou uaorai vine e te tumu tuke. E tanu matauia ana te tumu tuke i te pae i te aua vine. (Luka 13:6) Te noo anga ki raro i ta tetai uaorai vine e te tumu tuke te akatutu maira i te au turanga ponuiaau, tupu puapinga, e te tinamou. I teianei, te oronga maira to tatou pirianga kia Iehova i te au o te manako e te tinamou i te pae vaerua kia tatou. Me vai taua au turanga i raro ake i te tutara Patireia, kare rava tatou e mataku e ka tinamou pu tikai.

19. Eaa te aiteanga kia aaere i te ingoa o Iehova?

¹⁹ Kia rekareka i te tu mareka anga tu-Atua e te akameitakianga, kia aaere tatou i te ingoa o Iehova. Kua akakite ririnui ia teia ia Mika 4:5, i reira kua akakite te peroveta e: “Kia aaere ua te tangata ravarai i te ingoa o tona uaorai atua, ka aaere ra tatou i te ingoa o Iehova, o to tatou Atua, e tuatatau ua atu.” Te aaere anga i te ingoa o Iehova kare te aiteanga e ka tuatua ua e koia to tatou Atua. E maata atu te umuumuia ra i ta tatou kapitianga ki roto i te au uipaanga Kerititiano e te angaanga tutuanga Patireia, noatu e au angaanga puapinga katoa te reira. Me te aaere ra tatou i te ingoa o Iehova, kua akatapuia tatou kiaia e te tauta ra i te tavini iaia ma te tiratiratu e ma te inangaro ngakau katoa. (Mataio 22:37) E ei aronga akamori iaia, papu tikai te tauta ra tatou i te aaere i te ingoa o Iehova to tatou Atua e tuatau ua atu.

20. Eaa tei totouia ia Mika 4:6-13?

²⁰ I teianei e akamanako i te au tuatua totou a Mika 4:6-13. “Te tamaine a Ziona” ka akatuikaa ia “e tae rava atu ki Babulonia.” Ko te reira tei tupu ki te iti tangata o Ierusalema i roto i te itu anere mataiti M.T.N. Noatu rai, te akakite maira ta Mika totou e ka oki atu tetai toenga ki Iuda, e i te akanoo angaia a Ziona ka akapapu atu a Iehova e ka takoreia tona au enemi.

21, 22. Akapeea a Mika 5:2 i te akatupu angaia?

²¹ Kua totou ia tetai atu au tupuanga oraora i roto ia Mika pene 5. Ei akatauanga, ka akara ana i tei tuatuaia ia Mika 5:2-4. Kua totou a Mika no tetai Tutara akataoongaia e te Atua​—tetai “mei ito mairai oki tona au aerenga”​—ka aere mai mei Betelehema mai. Ka tutara aia ei tiaki “ma te ririnui o Iehova.” Pera katoa, ka maata teia Tutara, kare i roto anake ia Iseraela mari ra ki “te au openga mai o te enua ra.” Penei ka akaoripu tona tu tikai i te maata anga o te ao, inara kare i te mea muna kia tatou.

²² Koai te tangata maata roa tei anauia i Betelehema? E koai ka ‘maata e tae rava atu ki te au openga mai o te enua ra’? Kare atu e ko tetai ke mari ra ko te Mesia, ko Iesu Karaiti! I te ui anga a Heroda Maata ki te kau taunga maata e te au tata e ka anauia te Mesia kiea, kua pau atu ratou: “Ei Betelehema Iudea nei.” Kua taiku atu ratou i te au tuatua o Mika 5:2. (Mataio 2:3-6) Kua kite katoa tetai au tangata noa ua i teia, te taiku maira a Ioane 7:42 no ratou i te tuatua anga: “Kare ainei i na ko te tuatua i tataia ra e, no te uanga o Davida te Mesia, no Betelehema ra no te oire no reira Davida ra?”

Akaangaroianga Mou no te Iti Tangata

23. Eaa te tupu nei i teianei ei akatupu anga ia Mika 5:7?

²³ Te akakite maira a Mika 5:5-15 no runga i ta Asura upokotu anga te ka kite atu i te autu anga poto ua e te akakite maira e ka rave te Atua i te tutaki ki rungao i te au enua akarongo kore. Te taputou maira a Mika 5:7 i te akaoki akaou anga o te toenga o te ngati Iuda tei tataraara ki to ratou ipukarea, inara te tau katoa ra teia au tuatua ki to tatou tuatau. Kua akakite a Mika: “E vai rai te toenga o Iakoba i rotopu i te tangata e manganui, mei te au no ko ia Iehova ra; mei te ua toungaunga ki runga i te ngangaere ra.” Kua taangaangaia teia akatutu anga tau kia akakite e ka riro te toenga o Iakoba i te pae vaerua, me kore Iseraela, ei akameitakianga no ko mai i te Atua ki te tangata. Ko ta Iesu “mamoe ke atu,” e manakonakoanga to ratou no te enua, te rekareka ra i te tavini ma te manako okotai ki te toenga o “te Iseraela o te Atua” i teia tuatau, te tauturu anga i te akaoraora i tetai ke i te pae vaerua. (Ioane 10:16; Galatia 6:16; Zephania 3:9) Na teia tu, te vaira tetai tumu tuatua kia akamanakoia. Ei aronga akakitekite i te Patireia, ka tau tatou katoatoa kia akaperepere i ta tatou akameitakianga no te apai anga atu i te akaangaroianga mou ki tetai ke.

24. Eaa te au manako mei ia Mika pene 3 ki te 5 tei akakeu ia koe?

²⁴ Eaa taau i kite mai mei nga pene 3 ki te pene 5 o ta Mika totou? Penei ko te au manako mei teia: (1) Te tapapa maira te Atua e kia raveia te tuatua tau e te aronga e akono ra i te aratakianga i tona iti tangata. (2) Kare a Iehova e pau i ta tatou pure me rave akakoro tatou i te ara. (3) Ka akatupu uaia ta tatou akauenga tutuanga me akamaroiroi mai te Atua ia tatou na roto i tona vaerua tapu. (4) E raukai te marekaanga tu-Atua, kia aaere tatou i te ingoa o Iehova. (5) Ei aronga akakitekite i te Patireia, ka tau tatou kia akaperepere i ta tatou akameitakianga no te apai anga i te akaangaroianga mou ki te tangata. Penei kua akakeu tetai atu manako ke ia koe. Eaa atu ta tatou ka apii mai mei teia puka Pipiria tei totouia? Ka tauturu te atikara e aru mai nei ia tatou kia akono i te au apiianga tau mei nga pene openga o te totou akamaroiroi i te akarongo a Mika.

Akapeea Koe me Pau?

• Eaa ta te Atua e tapapa maira no te aronga e akono ra i te aratakianga i tona iti tangata?

• Eaa ra i puapinga ei te pure e te vaerua tapu ki ta tatou angaanga kia Iehova?

• Akapeea te tangata i te ‘aaere anga i te ingoa o Iehova’?

[Tutu i te kapi 15]

Ka rauka ainei ia koe te akamarama i ta Mika akatutuanga o te pani maata?

[Au Tutu i te kapi 16]

Mei ia Mika rai, te rave mataku kore ra tatou i ta tatou angaanga orometua