Isaia

51 E AKARONGO mai kotou iaku, e tei aruaru ki te tuatua-tika, e tei kimi ia Iehova ra: ka akara ana ki te mato i paoia mai ei kotou na, e ki te tipoko i te vaarua i koia mai ei kotou.

2 Ka akara ana ki to kotou metua tane kia Aberahama, e kia Sara i anau mai ei kotou na: okotai ua aia iaku i kapiki atu ei; kua akaora ra au iaia, e kua akamaata au iaia.

3 E akapumaana oki a Iehova ia Ziona; te au ngai tanea katoa ki ona ra, nana ïa e akapumaana; e nana e akariro atura i tona ngai medebara mei ia Edene, e tona ngai papamarō ra mei te kainga o Iehova; e kitea te rekareka, e te pereperekavana i roto iaia; te akameitaki, e te reo imene ra.

4 E akono mai iaku, e toku aronga tangata e; e anga mai i to kotou taringa, e toku iti-tangata e: na ko nei atu oki te ture iaku nei, e akamou oki au i te tuatua-tau naku ei turama no te au tangata.

5 Kua vaitata te tuatua-tika naku ra; te ora naku kua riro atura; e na toku rima e tuku i te tuatua-tau ki te au tangata; e tapapa mai te au enua taatai iaku, e irinaki mai oki ratou i toku nei rima.

6 Ka nānā ana i to kotou mata ki runga i te au rangi, ka akara oki ki raro ki runga i te enua nei: e peke ke oki te rangi mei te auai, e piro oki te enua mei te kakau ra, e pera rai to tei noo i reira i te mate katoa anga; kareka te ora naku, e tika ïa i te vairanga, e kare oki te tuatua-tika naku ra e poka.

7 E akarongo mai iaku, e te aronga i kite i te tuatua-tika ra, e te aronga tei to kotou ngakau te ture naku ra; auraka kotou e mataku i te akakino a te tangata, auraka oki kotou e tumatetenga i ta ratou taitoito.

8 E pou oki ratou i te neu mei te kakau ra, e kaingaia ratou e te ane mei te uruuru mamoe ra: kareka te tuatua tika naku ra, e tika ïa i te vairanga, e te ora naku ra, ki tera uki ki tera uki.

9 Ka ara, ka ara, ka akakakau ana ki te ririnui, e te rima o Iehova e: ka ara, mei tei te au rā i taito ra, i te au uki takere ra. Kare aina ko koe tei ta ia Rahaba, i putaʼi oki te taae ra?

10 Kare ainei ko koe tei tamarō i te tai, i te tai moana maata ra; ko tei akariro i te tai moana maata ra ei arataa, ei aerenga no te aronga i akaoraia ra?

11 E oki akaou mairai oki tei okoia e Iehova, ka aere mai ei ki Ziona ma te imene ra; e te rekareka mutu kore i runga i to ratou upoko: e rauka ia ratou te rekareka e te pereperekavana; ko te mii ra, e te aue, e rere ke atu ïa.

12 Ko au, ko au nei rai, tei akapumaana ia kotou: koai oki koe i mataku ei koe i te tangata te ka mate, e te tamaiti a te tangata nei, te ka riro ei ngangaere ua ra?

13 Ka akangaropoinaʼi oki koe i tei anga ia koe ra ia Iehova, ko tei totoa i te au rangi ra, e kua akatumu oki i te enua; e i mataku ua rai koe, e kare e rā e tukua, i te riri viviki o te takinga-kino ra, mei te mea e kua vaitata aia i te rave mai e ta? E tenana, teiea iora te riri viviki o taua takinga-kino ra?

14 Kare e roaia kua matara te tuikaa; kare oki aia e mate i roto i te vaarua; kare rai oki e ngere i te kai.

15 Ko au oki to Atua ra ko Iehova; ko tei akamarino i te tai kia aruru tona au ngaru ra: ko Iehova Sabaota ra tona ingoa.

16 E kua tuku au i taku tuatua ki roto i to vaa na, e kua tapoki au ia koe i te marumaru o toku rima nei; kia patia koe i te au rangi, e kia akatumu i te enua; e kia tuatua kia Ziona, Ko koe toku ra iti-tangata.

17 Ka ara, ka ara; e tu ki runga, e Ierusalema! ko tei inu i te rima o Iehova i te kapu o tona ra riri viviki; kua tae ki te ota o te kapu rurutakina i te inumia e koe, kua tatau oki koe i te reira.

18 Kare rava tetai ei arataki iaia i te au tamariki ravarai tana i anau ra; kare rava tetai ei mou i tona rima i te au tamariki katoa tana i rāpu ra.

19 Kua rokoia koe i eianei puke mea e rua; naai koe e tangi atu? ko te pou e te mate, te onge e te koke: naai? naku rai koe e akapumaana atu.

20 Kua rere a mate ua ra to au tamaroa ki raro, te tarava aere ua ra i te openga mai o te au arataa katoa ra, mei te puakatoro momoavao i te kupenga ra: kua ki ratou i te riri viviki o Iehova, i te akamura a toou ra Atua.

21 E teianei e akarongo mai koe i teia, e tei makiia ra, e tei kona ra; kare ra i te wina:

22 Te na ko maira to Atu ra ko Iehova, e to Atua ra tei akatika mai i te tuatua a tona ra iti tangata; I na, ka rave mai au i te kapu rurutakina i to rima na, te ota o te kapu ra o toku riri viviki; kare rava koe e inu akaou i te reira.

23 E tuku ra au i te reira ki te rima o te aronga i takinga-kino mai ia koe ra; ko tei tuatua mai ia koe e, Ka piko ki raro, kia aere matou na rungao: e kua tuku koe i to tua ki raro mei te one, e mei te arataa, i te aronga i aere na reira.