Te Aue o Ieremia

3 KO au te tangata i kite i te mate i te rakau o tona riri.

2 Kua arataki aia iaku, e kua apai iaku na roto i te poiri, e kare na te mārama.

3 Koia ïa, kua anga akaou maira aia i tona rima e rave iaku e ope ua atu te rā.

4 Kua akapou mai aia i toku kiko e toku kiri; kua akaati aia i toku au ivi.

5 Kua patu mai aia i runga iaku, e kua ta mai i toku upoko, e te mamae nei.

6 Kua akanoo aia iaku ki te au ngai poiri, mei te aronga i mate takere ana ra.

7 Kua koropini mai aia iaku, e kare atura au e tae ki vao: kua akateiaa mai aia i taku pirianganaoa.

8 E kia kaku atu au e kia kapiki maata, kua popani aia i taku pure ki vao.

9 Kua arai aia i taku arataa ki te toka taraiia ra; kua akamingi aia i taku arataa.

10 E daba moetapapa mai aia iaku, e liona i roto i te au ngai pipini anga.

11 Kua akaanga ke aia i toku ra au arataa, e kua aae mai iaku; kua akameamea ua mai aia iaku.

12 Kua akamingi aia i tana ana, e kua akatu iaku ei pa no te kakao.

13 Kua akatae rava aia i te au kakao no tona pia ki roto i taku pukuatu ra.

14 E avirianga au no toku au tangata katoa; ko to ratou ïa amuamu anga e po ua atu te rā.

15 Kua akaki mai aia iaku ki te mea maamaa; kua akakona aia iaku ki te mea kavangu ra.

16 Kua aati oki aia i taku nio ki te kirikiri, kua tapoki aia iaku i te reu ai.

17 Kua akataka ke atura koe i toku vaerua i te au: te meitaki ra, kua ngaro ïa iaku.

18 Kua karanga iora au, Kua kore toku matutu e toku irinaki anga ia Iehova:

19 Te manako anga i toku nei mate e toku nei tumatetenga, e maamaa ïa e te kavangu.

20 Te maara nei rai toku vaerua i te reira, e kua akapikoia ki raro i roto iaku.

21 Teia ra ta taku ngakau e maara nei, e teianei e manakonako anga toku.

22 No te aroa tini o Iehova i kore ei tatou i pou, no te mea kare tona tangi e mutu.

23 E mea ou i te au popongi katoa nei: to tuatua-mou, e mea maata ïa.

24 Ko Iehova taku nei tuanga, te pera nei taku vaerua; no reira au i irinaki atu ei iaia.

25 Meitaki to Iehova kia ratou tei tapapa iaia ra, ki te vaerua i kimi iaia ra.

26 Meitaki oki kia manakonako atu rai, e kia tiaki marie, i te ora na Iehova.

27 E meitaki no te tangata kia apai i te zugo i tona ou anga ra.

28 Te noo meamea ua aia ma te muteki, no te mea kua tukuia ïa e ia ki runga iaia.

29 Kua tuku ua atu aia i tona vaa ki raro i te one-pueu; peneiake e manakonako anga.

30 Kua oronga ua atu aia i te paparinga ki tei ta mai: kua akakiia aia ki te akakino.

31 Kare oki te Atu e akaruke e tuatau ua atu:

32 Tuku ua mai aia i te mate, e aroa mairai aia, e kia tau ki te maata anga o tona aroa.

33 Kare oki aia e tuku inangaro mai i te mate, e te aue ki te tamariki a te tangata nei.

34 I te takatakai anga ki raro ake i te vaevae te aronga ravarai i tapekaia i te enua nei.

35 I te ruri ke anga i te tuatua-tau a te tangata nei ki mua i te aroaro o Tei Teitei ra,

36 I te akakore i ta te tangata nei tuatua, kare te Atu e kite mai i te reira.

37 Koai teia e tuatua nei e kua tupu iora, tei kore i akaueia e te Atu?

38 Kare no roto i te vaa o Tei Teitei e tae mai ei te meitaki e te kino?

39 Eaa i kinokino ei te tangata ora nei? te tangata i te utunga o tana ara.

40 E kimi tatou, e e unuunumou marie, i to tatou au aerenga, ka oki ei kia Iehova ra.

41 Tatou e apai i o tatou ngakau, ma te rima katoa, ki te Atua i runga i te rangi ra.

42 Kua ara matou, e kua meameaau; kare koe i akakore mai;

43 Kua tapoki koe ia matou i to riri, e kua arumaki mai: kua ta koe, kare koe i tangi mai.

44 Kua tapoki koe ia koe uaorai ki te tumurangi, kia kore te pure e tae atu ki roto ra.

45 Kua akariro koe ia matou ei para, e ei teita, i rotopu i te au tangata nei.

46 Kua amama te vaa o to matou au enemi katoa ia matou nei.

47 Kua rokoia matou e te mataku e te ereere, te tanea, e te akapou.

48 Te maringi a kauvai ua nei toku mata i te pou o te tamaine a toku iti-tangata.

49 Te taʼe ua nei toku mata, kare i tukumoe, kare i tivata,

50 E kia akara mai a Iehova ki raro, kia akono mai i runga i te rangi ra.

51 No taku mata nei i mamae ei toku ngakau i te au tamaine katoa o toku nei oire.

52 Te aronga i enemi ua mai iaku nei kare e ara ra, kua arumaki ua mai iaku mei te manu ra.

53 Kua tipu ratou i toku ora i roto i te vaarua, e kua uri mai i te toka ki runga iaku.

54 Kua taʼe te vai na runga i toku mimiti; kua na ko akera au, Kua tipu keia au.

55 Kua kapiki au i to ingoa, e Iehova, mei roto i te vaarua ra ki raro:

56 Kua akarongo oki koe i toku reo: auraka koe e ariu ke i to taringa i toku nei ngengeti anga, i toku nei kapiki.

57 Kua akavaitata mai koe i te rā ka kapiki atu ei au ia koe ra: kua tuatua mai koe, Auraka e mataku.

58 Kua akatika koe, e te Atu, i te au tuatua a toku vaerua; kua oko oki koe i toku ora.

59 Kua akara mai koe, e Iehova, i toku takinga-kino angaia, e akatika mai koe i taku tuatua.

60 Kua akara mai koe i ta ratou au akamoupuku anga katoa ra, to ratou au manako anga iaku nei.

61 Kua akarongo koe i ta ratou akakino, e Iehova, ta ratou au manako anga katoa iaku nei;

62 Te vaa o tei akaenemi mai iaku, e ta ratou akakoro anga iaku nei e po ua atu te rā.

63 Ka akara ana i to ratou noo anga ki raro, e to ratou tu anga ki runga, ko au rai to ratou amu.

64 E tutaki mai koe ia ratou, e Iehova, kia tau i tei raveia e to ratou rima.

65 E oronga koe i te ngakau māro no ratou, ei ia ratou te taumaa naau.

66 E arumaki koe ia ratou ma te riri, kia pou atu ratou ia koe i raro ake i te au rangi o Iehova.