Ieremia

36 E tae akera ki te a o te mataiti o Iehoiakima, te tamaiti a Iosia, ariki no Iuda ra, i tae mai ei teianei tuatua ki Ieremia, no ki ia Iehova ra, na ko maira,

2 Ka rave ana koe i tetai buka pokaikai ra, ka tataʼi i te au tuatua katoa ki roto, taku i karanga atu kia koe ra ia Iseraela, e ia Iuda, e i te au enua katoa, mei te rā mairai i tuatua atu ei au ia koe ra, mei te au rā mai o Iosia ra, e tae ua maira ki teianei rā.

3 Peneiake ko te akarongo mai te ngutuare o Iuda i te au kino katoa i akakoroia e au e tuku ki runga ia ratou ra, e ko te oki mai ratou, te tangata katoa i tona ra aerenga kino, kia akakore atu au i to ratou kino e ta ratou ara.

4 Kua karanga aturā Ieremia, kia Baruka, te tamaiti a Neria ra: kua tata iorā Baruka i te vaa o Ieremia i te au tuatua katoa a Iehova i tuatua mai kiaia ra, ki roto i taua buka pokaikai ra.

5 Kua karanga aturā Ieremia kia Baruka, na ko atura, Kua tapekaia au, kare au e tika kia aere ki roto i te are o Iehova:

6 Ko koe ra te aere, ka tatau ei i te pokaikai, taau i tata i toku nei vaa, i te au tuatua a Iehova, i te taringa o te au tangata, ki roto i te are o Iehova, i te rā akakoreanga kai; e i te au taringa o to Iuda katoa ra, tei aere mai mei roto mai i to ratou au oire, e tatau katoa atu koe i te reira.

7 Peneiake ratou ko te tuku akaaka mai i ta ratou pure ki mua i te aroaro o Iehova, e ko te ariu mai oki, te tangata katoa i tona ra aerenga kino: e riri maata oki, e te riri otooto, ta Iehova e tuatua nei i teianei aronga tangata.

8 Kua pera oki a Baruka, te tamaiti a Neria ra, i ta te peroveta ra, ta Ieremia, i akaue mai kiaia ra, i te tatau anga i roto i te buka i te au tuatua a Iehova, i roto i te are o Iehova ra.

9 E tae akera ki te mataiti rima o Iehoiakima, te tamaiti a Iosia ra, ariki no Iuda, e te iva o te marama, i akakite aere ei ki to Ierusalema katoa, e te au tangata katoa i aere mai mei roto i te au oire o Iuda, i te akakore anga kai, i mua ia Iehova, i Ierusalema.

10 Kua tatau iorā Baruka i roto i taua buka ra i te au tuatua a Ieremia, i roto i te are o Iehova, i te pia o Gemaria, te tamaiti a Saphana tata tuatua ra, i roto i te paepae teitei ra, i te tomoanga i te ngutupa ou i te are o Iehova, i te taringa o te au tangata katoa ra.

11 E akarongo akerā Mikaia, te tamaiti a Gemaria, te tamaiti a Saphana, i te au tuatua katoa a Iehova, i roto i taua buka ra;

12 Aere atura aia ki raro i te are o te ariki ra, ki roto i te pia o te tata tuatua ra; e i na, tei reira anake te ui ariki i te noo anga, ko Elisama tata tuatua ra, e ko Delaia, te tamaiti a Semaia ra, e ko Elanatana, te tamaiti a Akabora, e ko Gemaria, te tamaiti a Saphana, e ko Zedekia, te tamaiti a Anania, e te ui ariki katoa ra.

13 Kua akakite aturā Mikaia kia ratou i te au tuatua katoa tana i akarongo ra, ka tatau ei a Baruka i taua buka ra, i te taringa o te au tangata ra.

14 Kua tono akera i te ui ariki katoa ia Iehudi, te tamaiti a Netania, te tamaiti a Selamia, te tamaiti a Kusi, kia Baruka, e karanga atu e, Te pokaikai taau i tatau i te taringa o te au tangata ra, ka rave ïa i to rima, ka aere mai. Kua rave iorā Baruka, te tamaiti a Neria, i taua pokaikai ra i tona rima, e kua aere maira kia ratou ra:

15 Kua karanga atura ratou kiaia, Ka noo ana ki raro, ka tatau mai i te reira i to matou nei taringa. Kua tatau iorā Baruka i to ratou taringa.

16 E ope akera taua tuatua ra i te akarongoia e ratou ra, kua mataku ua iora ratou tetai e tetai: e kua karanga atura kia Baruka, E riro matou i te akakite ki te ariki i teia katoa nei au tuatua.

17 Kua ui maira ratou kia Baruka, na ko maira, Ka akakite mai na koe kia matou i tenana; i akapeea koe i te tata anga i teianei au tuatua i tona vaa?

18 Kua karanga aturā Baruka kia ratou, Tona uaorai vaa tei tuatua mai kiaku i teia katoa nei au tuatua, e kua tata atura au ki te inika ki roto i te buka.

19 Kua tuatua maira taua ui ariki ra kia Baruka, Ka aere ka pipini, korua ko Ieremia, e auraka e tangata e kite i to korua ngai.

20 Aere atura ratou ki roto i te ariki ra, ki roto i te paepae; vaio iora taua pokaikai ra ki roto i te pia o Elisama, i te tata tuatua ra; e kua akakite atura i taua au tuatua katoa ra i te taringa o te ariki ra.

21 Kua tono akera te ariki ia Iehudi e tiki i taua pokaikai ra; kua rave iora aia i roto i te pia o Elisama tata tuatua ra; e kua tatau a Iehudi i te reira i te taringa o te ariki ra e i te taringa o te ui ariki katoa i tu vaitatao i te ariki ra.

22 Te noo ua ra te ariki ki roto i te pia no te tuatau anu ra, i te iva o te marama, e te ka ua maira te ai i te vairanga ai ki mua iaia.

23 E ope akera nga takiato tuatua e toru, e e a i te tatau ia e Iehudi, kua kokoti iora aia ki te matipi a te tata tuatua ra, e kua titiri ki runga i te ai i te vairanga ai ra, e ope roa akera taua pokaikai ra i te ka i te ai i te vairanga ai ra.

24 Kare ra taua ariki ra, e te au tavini katoa nona ra, tei akarongo i taua au tuatua katoa ra, i mataku, kare oki i aae i to ratou kakau.

25 Pati akatenga atura oki Elanatana, e Delaia, e Gemaria, i te ariki ra, e auraka e tungia taua pokaikai ra ki te ai; kare rava aia i akarongo ia ratou.

26 Kua akaue atura te ariki ia Ierameela, te tamaiti a te ariki ra, e ia Seraia, te tamaiti a Abedeela, e rave ia Baruka tata tuatua ra, e te peroveta ra ko Ieremia: kua uuna rā Iehova ia raua.

27 E kua tae maira te tuatua a Iehova kia Ieremia, i muri ake i te pokaikai i te tutungi angaia e te ariki, e te au tuatua i tataia e Baruka i te vaa o Ieremia, na ko maira,

28 Ka rave rai koe i tetai pokaikai rai, ka tataʼi ki roto i te au tuatua katoa i tataia i muatangana, i tei muatangana ra pokaikai, i tei tutungiia e te ariki o Iuda, e Iehoiakima ra.

29 E karanga atu oki ki te ariki o Iuda, kia Iehoiakima, Te na ko mairā Iehova, Kua tungia e koe taua pokaikai nei, kua na ko maira, Eaa koe i tataʼi ki roto? e i na ko ei oki, E aere mairai te ariki o Babulonia, e e pou roa teianei enua iaia, e e kore iaia te tangata e te puaka katoa oki i reira?

30 E teianei, te na ko mairā Iehova, i te ariki o Iuda ia Iehoiakima, Kare rava ona e okotai iti ake e noo ki runga i te terono o Davida; e akaruke keia tona kopapa mate, kia vai ua ana i te veravera i te ao, e te anu i te po.

31 E tutaki atu au iaia, e tona katoa ra uanga, e tona katoa ra au tavini, i ta ratou ara; e apai mai oki au ki runga ia ratou, e ki runga katoa i to Ierusalema, e ki rungao i te au tangata no Iuda, i te au kino katoa taku i tuatua kia ratou ra, kare ra ratou i akarongo mai.

32 Kua rave iorā Ieremia i tetai pokaikai ke, e kua tuku atura kia Baruka, te tamaiti a Neria tata tuatua ra: kua tata iora aia ki roto i te reira i te vaa o Ieremia, i te au tuatua katoa no te buka, ta te ariki o Iuda ta Iehoiakima i tutungi ki te ai: e kapiki katoaia mai oki te tuatua i reira, mei te reira rai te tu e manganui.