Ezekiela

9 KUA kapiki katoa maira aia i te reo maata ki roto i oku taringa, na ko maira, Ka akavaitata mai ana i te aronga i poroakiiaʼi teianei oire, te tangata ravarai ma tona taoonga ta tangata ra i tona rima.

2 E i na, te aere maira nga tangata toko ono i na te ara i te ngutupa i runga ra, e anga tika ki te pae i apatokerau ra, te tangata ravarai ma tona taoonga ta tangata ra i tona rima; e tera tetai i rotopu ia ratou ra, e orongā te kakau, ma te āriki inika a te tata tuatua ra i tona kaokao: aere anake atura ratou ki roto, tu iora ki te pae o te atarau veo ra.

3 Riro atura te kakā o te Atua o Iseraela mei runga i te vairanga i runga i te kerubi ra, ki te turuki o te are ra. Kua kapiki atura aia ki te tangata i kakau ki te orongā ra, tei iaia te āriki inika a te tata tuatua i tona kaokao;

4 E kua karanga aturā Iehova kiaia, Ka aere na rotopu i te oire, na rotopu i Ierusalema, ka tuku ei i te akairo ki runga i te rae o te au tangata i aue ua, e kua kapiki ua, i te au mea viivii katoa i raveia i roto ra.

5 Kua karanga atura oki aia ki tetai pae, ko au tei akarongo, Ka aere kotou na muri iaia na roto i te oire, ka ta ai: auraka to kotou mata e akaperepere, auraka oki kotou e aroa:

6 E ta ua i te ruaine e te mapu, i te paretenia e te tamariki mea riki, e te vaine: auraka ra e akavaitata ua atu ki tetai tangata tei runga iaia te akairo ra; e akamata ana i ko nei na toku ngai-tapu nei. Kua akamata atura ratou i te au tangata pakari ki mua i te are ra.

7 Kua karanga atura aia kia ratou, Ka akaviivii atu i te are, e ka akaki i te au paepae ki te aronga i taia: ka aere kotou. Aere atura ratou, e kua ta i roto i te oire.

8 E te ta ua ra ratou ia ratou, e te toe ra au, kua tipapa iora au ki raro taku mata, e kua kapiki atura au, na ko atura, Aue, e te Atu ra e Iehova! e akapou rava ainei koe i te toenga o Iseraela, i toou riringi anga i to riri otooto ki runga ia Ierusalema?

9 E kua tuatua maira aia kiaku, Te ara a te ngutuare o Iseraela e o Iuda, kua maata rava ïa, e kua ki te enua i te toto, kua ki oki te oire i te tarevake: te karanga nei oki ratou e, Kua akaruke a Iehova i te enua nei, e kare a Iehova e akara mai.

10 E teianei, ko au nei, kare taku mata e akaperepere, kare oki au e aroa atu, e tutaki ra au i to ratou aerenga ki runga i to ratou mimiti.

11 E i na, taua tangata i te kakau orongā ra, nana te āriki inika i tona kaokao ra, kua akakite maira i te tuatua, na ko maira, Kua akapera au mei taau i akaue mai iaku ra.